4. анантарапаччайо

катамо анантарапаччайо. анантаре кхан̣е нируддхо читта четасикадхаммасамӯхо анантарапаччайо.

катамо дхаммо анантарапаччайасса паччайуппанно. паччхиме анантаре ева кхан̣е уппанно читтачетасикадхаммасамӯхо тасса паччайасса паччайуппанно.

екасмим̣ бхаве пат̣исандхичиттам̣ пат̣хамабхаван̇гачиттасса анантара паччайо, пат̣хама бхаван̇гачиттам̣ дутийабхаван̇гачиттасса анантарапаччайотиа̄дина̄ ваттаббо.

йада̄ пана дхаммайамаке суддха̄ва̄са̄нам̣ дутийе акусале читте ваттама̄нети вуттанайена тасса саттасса аттано абхинавам̣ аттабха̄вам̣ а̄раббха етам̣ мама есохамасми есо ме атта̄ти паваттам̣ бхаваникантика тан̣ха̄сахагатачиттам̣ уппаджджати. тада̄ пат̣хамам̣ двиккхаттум̣ бхаван̇гам̣ чалати. тато манодва̄ра̄ваджджаначиттам̣ уппаджджати. тато сатта бхаваникантикаджавана̄ни уппаджджанти. тато парам̣ бхаван̇гава̄ро.

апи ча со сатто тада̄ паччуппаннабхаве кин̃чи на джа̄на̄ти, пуббабхаве аттана̄ анубхӯтам̣ а̄рамман̣ам̣ ануссарама̄но аччхати. ваттхусса пана атидуббалатта̄ тан̃ча а̄рамман̣ам̣ апарибйаттамева хоти. там̣ а̄раббха уддхаччасахагатачиттамева бахулам̣ паваттати.

йада̄ габбхо тхокам̣ вад̣д̣хама̄но хоти атирекадвема̄сам̣ гато, тада̄ чаккха̄дӣни индрийа̄ни парипун̣н̣а̄ни хонти. евам̣ сантепи ма̄тугаббхе а̄лока̄дӣнам̣ паччайа̄нам̣ абха̄вато чаккхувин̃н̃а̄н̣а̄дӣни чатта̄ри вин̃н̃а̄н̣а̄ни нуппаджджанти, ка̄йавин̃н̃а̄н̣амановин̃н̃а̄н̣а̄ни ева уппаджджанти. со сатто ма̄туйа̄ ирийа̄патхапариваттана̄дӣсу бахӯни дуккхадоманасса̄ни паччанубхоти. виджа̄йанака̄ле пана бхусам̣ дуккхам̣ нигаччхатийева. виджа̄йитва̄пи йа̄ва ваттхурӯпа̄ни мудӯни хонти, парипа̄кам̣ на гаччханти, та̄ва со атимандарӯпо утта̄насеййако хутва̄ аччхати. на кин̃чи паччуппаннам̣ а̄рамман̣ам̣ саллаккхети. йебхуййена пурима бхава̄нуса̄рӣ ева тасса вин̃н̃а̄н̣ам̣ хоти. саче со нирайа бхавато а̄гато хоти, со вирӯпамукхабахуло хоти. пурима̄ни нирайа̄рамман̣а̄ни а̄раббха кхан̣е кхан̣е вирӯпамукхамасса пан̃н̃а̄йати. атха девалокато а̄гато хоти, дибба̄ни а̄рамман̣а̄ни а̄раббха виппасаннамукхабахуло хоти, кхан̣е кхан̣е михитамукхамасса пан̃н̃а̄йати.

йада̄ пана ваттхурӯпа̄ни тиккха̄ни хонти, парипа̄кам̣ гаччханти. вин̃н̃а̄н̣а̄ни часса сувисада̄ни паваттанти. тада̄ амандарӯпо хутва̄ кӣл̣анто лӣл̣анто моданто памоданто аччхати. паччуппанне а̄рамман̣а̄ни саллаккхети. ма̄тубха̄сам̣ саллаккхети. идха лока̄нуса̄рӣ вин̃н̃а̄н̣амасса бахулам̣ паваттати. пуримаджа̄тим̣ памуссати.

ким̣ пана саббопи сатто имасмим̣ т̣ха̄не ева пуримам̣ джа̄тим̣ памуссатӣти че. на саббопи сатто имасмим̣ т̣ха̄не ева памуссати. кочи атирекатарам̣ гамбхава̄садуккхена парипӣл̣ито габбхе ева памуссати. кочи виджа̄йанака̄ле, кочи имасмим̣ т̣ха̄не памуссати. кочи итопарампи дахарака̄ле на памуссати. вуд̣д̣хака̄ле ева памуссати. кочи йа̄ваджӣвам̣пи на памуссати. две тайо бхаве ануссарантопи аттхийева. име джа̄тиссарасатта̄ на̄ма хонти.

таттха виджа̄йанака̄лато пат̣т̣ха̄йа чхадва̄рикавӣтхичитта̄ни паваттанти. паччуппанна̄рамман̣ам̣ саллаккхан̣ато пат̣т̣ха̄йа чхадва̄рикавӣтхи читта̄ни парипун̣н̣а̄ни паваттанти. саббаттхапи пуримам̣ пуримам̣ анантаре нируддхам̣ читтам̣ паччхимасса паччхимасса анантаре уппаннасса читтасса анантара паччайо хоти. айан̃ча анантарапаччайо на̄ма анаматагге сам̣са̄ре екасса саттасса екаппабандхо ева хоти. йада̄ сатто арахатта маггам̣ лабхитва̄ кхандхапаринибба̄нам̣ па̄пун̣а̄ти, тада̄ ева со пабандхо чхиджджати.

кенат̣т̣хена анантаро, кенат̣т̣хена паччайоти. аттано анантаре аттасадисасса дхаммантарасса уппа̄данат̣т̣хена анантаро, упака̄ракат̣т̣хена паччайо. таттха аттасадисасса̄ти са̄рамман̣а бха̄вена аттана̄ садисасса. са̄рамман̣абха̄вена̄ти ча йо дхаммо а̄рамман̣ена вина̄ на паваттати, со са̄рамман̣о на̄ма, евам̣ са̄рамман̣абха̄вена. дхаммантарасса уппа̄данат̣т̣хена̄ти пуримасмим̣ читте нируддхепи тасса чинтанакирийа̄вего на вӯпасаммати, паччхимам̣ читтам̣ уппа̄детва̄ ева вӯпасаммати, евам̣ паччхимасса дхаммантарасса уппа̄данат̣т̣хена.

таттха пурима̄ пурима̄ ма̄тупарампара̄ вийа анантарапаччайапарампара̄ дат̣т̣хабба̄. паччхима̄ паччхима̄ дхӣтупарампара̄ вийа тасса паччайуппаннапарампара̄ дат̣т̣хабба̄. евам̣ санте араханта̄нам̣ саббапаччхимам̣ паринибба̄начиттампи пуна пат̣исандхичиттасан̇кха̄там̣ дхаммантарам̣ уппа̄деййа̄ти. на уппа̄деййа. касма̄, тада̄ каммакилесавега̄нам̣ саббасо пат̣иппассаддхибха̄вена аччантасантатаратта̄ тасса читтасса̄ти. анантарапаччайа дӣпана̄ нит̣т̣хита̄.