15. а̄ха̄рапаччайо

дувидхо а̄ха̄рапаччайо рӯпа̄ха̄рапаччайо арӯпа̄ха̄ра паччайо.

таттха рӯпа̄ха̄рапаччайо на̄ма кабал̣ӣка̄ра̄ха̄расан̇кха̄там̣ оджа рӯпам̣ вуччати. со ча аджджхатта̄ха̄ро бахиддха̄ха̄роти дувидхо. кабал̣ӣка̄ра̄ха̄рабхаккха̄нам̣ сатта̄нам̣ саббепи чатусамут̣т̣ха̄никарӯпадхамма̄ тасса дувидхасса рӯпа̄ха̄расса паччайуппанна̄.

арӯпа̄ха̄ро пана тивидхо пхасса̄ха̄ро маносан̃четана̄ ха̄ро вин̃н̃а̄н̣а̄ха̄ро ча. тайопете дхамма̄ сахаджа̄та̄нам̣ на̄марӯпадхамма̄нам̣ а̄ха̄рапаччайо хонти. сахаджа̄та̄ ча на̄марӯпа дхамма̄ тесам̣ паччайуппанна̄.

кенат̣т̣хена а̄ха̄роти. бхусам̣ харан̣ат̣т̣хена а̄ха̄ро. бхусам̣ харан̣ат̣т̣хена̄тича дал̣хам̣ паватта̄панат̣т̣хена, чирака̄лам̣ т̣хитийа̄ вуд̣д̣хийа̄ вирул̣хийа̄ вепулла̄йа упаттхамбханат̣т̣хена̄ти вуттам̣ хоти. джананакиччайуттопи а̄ха̄ро упаттхамбханакиччаппадха̄но хотӣти.

таттха дувидхо рӯпа̄ха̄ро аджджхаттасанта̄не чатусамут̣т̣ха̄никам̣ рӯпака̄йам̣ упабрӯхайанто бхусам̣ харати, дал̣хам̣ паваттети, чирам̣ аддха̄нам̣ гамети, там̣ там̣ а̄йукаппапарийоса̄нам̣ па̄петӣти а̄ха̄ро.

пхасса̄ха̄ро а̄рамман̣есу ит̣т̣ха̄нит̣т̣харасам̣ нӣхаранто сампайуттадхамме бхусам̣ харати. маносан̃четана̄ха̄ро ка̄йавачӣ манокаммесу усса̄хам̣ джаненто сампайуттадхамме бхусам̣ харати. вин̃н̃а̄н̣а̄ха̄ро а̄рамман̣авиджа̄нанат̣т̣хена пуббан̇гамакиччам̣ ваханто сампайуттадхамме бхусам̣ харати, дал̣хам̣ паваттети, чирам̣ аддха̄нам̣ гаметӣти а̄ха̄ро. сампайуттадхамме бхусам̣ харанто сахаджа̄тарӯпадхаммепи бхусам̣ харатийева.

идха суттантанайопи ваттаббо. йатха̄ сакун̣а̄ на̄ма чаккхӯхи диса̄видисам̣ вибха̄ветва̄ паттехи руккхато руккхам̣ ванато ванам̣ а̄ка̄сена паккхандитва̄ тун̣д̣акехи пхала̄пхала̄ни тудитва̄ йа̄ваджӣвам̣ атта̄нам̣ йа̄пенти. татха̄ име сатта̄ чхахи вин̃н̃а̄н̣ехи а̄рамман̣а̄ни вибха̄ветва̄ чхахи маносан̃четана̄ха̄рехи а̄рамман̣аваттхуппат̣ила̄бхаттха̄йа уссукканам̣ катва̄ чхахи пхасса̄ха̄рехи а̄рамман̣есу расам̣ па̄тубхавантам̣ катва̄ сукхадуккхам̣ анубхаванти. вин̃н̃а̄н̣ехи ва̄ а̄рамман̣а̄ни вибха̄ветва̄ на̄марӯпа сампаттим̣ са̄дхенти. пхассехи а̄рамман̣есу расам̣ па̄тубхавантам̣ катва̄ а̄рамман̣араса̄нубхаванам̣ веданам̣ сампа̄детва̄ тан̣ха̄вепуллам̣ а̄паджджанти. четана̄хи тан̣ха̄мӯлака̄ни на̄на̄камма̄ни пасаветва̄ бхавато бхавам̣ сам̣саранти. евам̣ а̄ха̄радхамма̄нам̣ махантам̣ а̄ха̄ракиччам̣ ведитаббанти. а̄ха̄рапаччайадӣпана̄ нит̣т̣хита̄.