8. дутийаверасуттам̣

28. [сам̣. ни. 5.1025] ‘‘йато кхо, бхиккхаве, арийаса̄вакасса пан̃ча бхайа̄ни вера̄ни вӯпасанта̄ни хонти, чатӯхи ча сота̄паттийан̇гехи саманна̄гато хоти, со а̄кан̇кхама̄но аттана̄ва атта̄нам̣ бйа̄кареййа – ‘кхӣн̣анирайомхи кхӣн̣атираччха̄найони кхӣн̣апеттивисайо кхӣн̣а̄па̄йадуггативинипа̄то; сота̄паннохамасми авинипа̄тадхаммо нийато самбодхипара̄йан̣о’’’ти.

‘‘катама̄ни пан̃ча бхайа̄ни вера̄ни вӯпасанта̄ни хонти? йам̣, бхиккхаве, па̄н̣а̄типа̄тӣ па̄н̣а̄типа̄тапаччайа̄ дит̣т̣хадхаммикампи бхайам̣ верам̣ пасавати, сампара̄йикампи бхайам̣ верам̣ пасавати, четасикампи дуккхам̣ доманассам̣ пат̣исам̣ведети, па̄н̣а̄типа̄та̄ пат̣ивирато…пе… евам̣ там̣ бхайам̣ верам̣ вӯпасантам̣ хоти.

‘‘йам̣, бхиккхаве, адинна̄да̄йӣ…пе… сура̄мерайамаджджапама̄дат̣т̣ха̄йӣ сура̄мерайамаджджапама̄дат̣т̣ха̄напаччайа̄ дит̣т̣хадхаммикампи бхайам̣ верам̣ пасавати, сампара̄йикампи бхайам̣ верам̣ пасавати, четасикампи дуккхам̣ доманассам̣ пат̣исам̣ведети, сура̄мерайамаджджапама̄дат̣т̣ха̄на̄ пат̣ивирато нева дит̣т̣хадхаммикампи бхайам̣ верам̣ пасавати, на сампара̄йикампи бхайам̣ верам̣ пасавати, на четасикампи дуккхам̣ доманассам̣ пат̣исам̣ведети. сура̄мерайамаджджапама̄дат̣т̣ха̄на̄ пат̣ивиратасса евам̣ там̣ бхайам̣ верам̣ вӯпасантам̣ хоти. има̄ни пан̃ча бхайа̄ни вера̄ни вӯпасанта̄ни хонти.

‘‘катамехи чатӯхи сота̄паттийан̇гехи саманна̄гато хоти? идха, бхиккхаве, арийаса̄вако буддхе авеччаппаса̄дена саманна̄гато хоти – ‘итипи со бхагава̄…пе… саттха̄ деваманусса̄нам̣ буддхо бхагава̄’ти. дхамме…пе… сан̇гхе… арийакантехи сӣлехи саманна̄гато хоти акхан̣д̣ехи аччхиддехи асабалехи акамма̄сехи бхуджиссехи вин̃н̃уппасаттхехи апара̄мат̣т̣хехи сама̄дхисам̣ваттаникехи. имехи чатӯхи сота̄паттийан̇гехи саманна̄гато хоти.

‘‘йато кхо, бхиккхаве, арийаса̄вакасса има̄ни пан̃ча бхайа̄ни вера̄ни вӯпасанта̄ни хонти, имехи ча чатӯхи сота̄паттийан̇гехи саманна̄гато хоти, со а̄кан̇кхама̄но аттана̄ва атта̄нам̣ бйа̄кареййа – ‘кхӣн̣анирайомхи кхӣн̣атираччха̄найони кхӣн̣апеттивисайо кхӣн̣а̄па̄йадуггативинипа̄то; сота̄паннохамасми авинипа̄тадхаммо нийато самбодхипара̄йан̣о’’’ти. ат̣т̣хамам̣.