2. ассакхал̣ун̇касуттам̣

22. [а. ни. 3.141] ‘‘тайо ча, бхиккхаве, ассакхал̣ун̇ке десесса̄ми тайо ча пурисакхал̣ун̇ке тайо ча ассапарассе [ассасадассе (сӣ. сйа̄. пӣ.) а. ни. 3.142] тайо ча пурисапарассе [пурисасадассе (сӣ. сйа̄. пӣ.)] тайо ча бхадде асса̄джа̄нӣйе тайо ча бхадде пуриса̄джа̄нӣйе. там̣ сун̣а̄тха.

‘‘катаме ча, бхиккхаве, тайо ассакхал̣ун̇ка̄? идха, бхиккхаве, екаччо ассакхал̣ун̇ко джавасампанно хоти, на ван̣н̣асампанно, на а̄рохапарин̣а̄хасампанно. идха пана, бхиккхаве, екаччо ассакхал̣ун̇ко джавасампанно ча хоти ван̣н̣асампанно ча, на а̄рохапарин̣а̄хасампанно. идха пана, бхиккхаве, екаччо ассакхал̣ун̇ко джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо ассакхал̣ун̇ка̄.

‘‘катаме ча, бхиккхаве, тайо пурисакхал̣ун̇ка̄? идха, бхиккхаве, екаччо пурисакхал̣ун̇ко джавасампанно хоти, на ван̣н̣асампанно, на а̄рохапарин̣а̄хасампанно. идха пана, бхиккхаве, екаччо пурисакхал̣ун̇ко джавасампанно ча хоти ван̣н̣асампанно ча, на а̄рохапарин̣а̄хасампанно. идха пана, бхиккхаве, екаччо пурисакхал̣ун̇ко джавасампанно ча хоти ван̣н̣асампанно ча а̄рохапарин̣а̄хасампанно ча.

‘‘катхан̃ча, бхиккхаве, пурисакхал̣ун̇ко джавасампанно хоти, на ван̣н̣асампанно на а̄рохапарин̣а̄хасампанно? идха, бхиккхаве, бхиккху ‘идам̣ дуккха’нти йатха̄бхӯтам̣ паджа̄на̄ти, ‘айам̣ дуккхасамудайо’ти йатха̄бхӯтам̣ паджа̄на̄ти, ‘айам̣ дуккханиродхо’ти йатха̄бхӯтам̣ паджа̄на̄ти, ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо сам̣са̄дети [сам̣са̄рети (ка.) а. ни. 1.3.141], но виссаджджети. идамасса на ван̣н̣асмим̣ вада̄ми. на кхо пана ла̄бхӣ хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. идамасса на а̄рохапарин̣а̄хасмим̣ вада̄ми. евам̣ кхо, бхиккхаве, пурисакхал̣ун̇ко джавасампанно хоти, на ван̣н̣асампанно на а̄рохапарин̣а̄хасампанно.

‘‘катхан̃ча, бхиккхаве, пурисакхал̣ун̇ко джавасампанно ча хоти ван̣н̣асампанно ча, на а̄рохапарин̣а̄хасампанно? идха, бхиккхаве, бхиккху ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо виссаджджети, но сам̣са̄дети. идамасса ван̣н̣асмим̣ вада̄ми. на кхо пана ла̄бхӣ хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. идамасса на а̄рохапарин̣а̄хасмим̣ вада̄ми. евам̣ кхо, бхиккхаве, пурисакхал̣ун̇ко джавасампанно ча хоти ван̣н̣асампанно ча, на а̄рохапарин̣а̄хасампанно.

‘‘катхан̃ча, бхиккхаве, пурисакхал̣ун̇ко джавасампанно ча хоти ван̣н̣асампанно ча а̄рохапарин̣а̄хасампанно ча? идха, бхиккхаве, бхиккху ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо виссаджджети, но сам̣са̄дети. идамасса ван̣н̣асмим̣ вада̄ми. ла̄бхӣ кхо пана хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. идамасса а̄рохапарин̣а̄хасмим̣ вада̄ми. евам̣ кхо, бхиккхаве, пурисакхал̣ун̇ко джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо пурисакхал̣ун̇ка̄.

‘‘катаме ча, бхиккхаве, тайо ассапарасса̄? идха, бхиккхаве, екаччо ассапарассо…пе… джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо ассапарасса̄.

‘‘катаме ча, бхиккхаве, тайо пурисапарасса̄? идха, бхиккхаве, екаччо пурисапарассо…пе… джавасампанно ча хоти ван̣н̣асампанно ча а̄рохапарин̣а̄хасампанно ча.

‘‘катхан̃ча, бхиккхаве, пурисапарассо…пе… джавасампанно ча хоти ван̣н̣асампанно ча а̄рохапарин̣а̄хасампанно ча? идха, бхиккхаве, бхиккху пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ опапа̄тико хоти, таттха паринибба̄йӣ ана̄ваттидхаммо тасма̄ лока̄. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо виссаджджети, но сам̣са̄дети. идамасса ван̣н̣асмим̣ вада̄ми. ла̄бхӣ кхо пана хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. идамасса а̄рохапарин̣а̄хасмим̣ вада̄ми. евам̣ кхо, бхиккхаве, пурисапарассо джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо пурисапарасса̄.

‘‘катаме ча, бхиккхаве, тайо бхадда̄ асса̄джа̄нӣйа̄? идха, бхиккхаве, екаччо бхаддо асса̄джа̄нӣйо…пе… джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо бхадда̄ асса̄джа̄нӣйа̄.

‘‘катаме ча, бхиккхаве, тайо бхадда̄ пуриса̄джа̄нӣйа̄? идха, бхиккхаве, екаччо бхаддо пуриса̄джа̄нӣйо…пе… джавасампанно ча хоти ван̣н̣асампанно ча а̄рохапарин̣а̄хасампанно ча.

‘‘катхан̃ча, бхиккхаве, бхаддо пуриса̄джа̄нӣйо…пе… джавасампанно ча хоти ван̣н̣асампанно ча а̄рохапарин̣а̄хасампанно ча? идха, бхиккхаве, бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо виссаджджети, но сам̣са̄дети. идамасса ван̣н̣асмим̣ вада̄ми. ла̄бхӣ кхо пана хоти чӣварапин̣д̣апа̄тасена̄санагила̄напаччайабхесаджджапариккха̄ра̄нам̣. идамасса а̄рохапарин̣а̄хасмим̣ вада̄ми. евам̣ кхо, бхиккхаве, бхаддо пуриса̄джа̄нӣйо джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо бхадда̄ пуриса̄джа̄нӣйа̄’’ти. дутийам̣.