8. саджджхасуттам̣

8. екам̣ самайам̣ бхагава̄ ра̄джагахе вихарати гиджджхакӯт̣е паббате. атха кхо саджджхо парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо саджджхо парибба̄джако бхагавантам̣ етадавоча –

‘‘екамида̄хам̣, бханте, самайам̣ бхагава̄ идхева ра̄джагахе вихара̄ми гириббадже. татра ме, бханте, бхагавато саммукха̄ сутам̣ саммукха̄ пат̣иггахитам̣ – ‘йо со, саджджха, бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄вимутто, абхаббо со пан̃ча т̣ха̄на̄ни аджджха̄чаритум̣ – абхаббо кхӣн̣а̄саво бхиккху сан̃чичча па̄н̣ам̣ джӣвита̄ воропетум̣, абхаббо кхӣн̣а̄саво бхиккху адиннам̣ тхеййасан̇кха̄там̣ а̄да̄тум̣, абхаббо кхӣн̣а̄саво бхиккху метхунам̣ дхаммам̣ пат̣исевитум̣, абхаббо кхӣн̣а̄саво бхиккху сампаджа̄намуса̄ бха̄ситум̣, абхаббо кхӣн̣а̄саво бхиккху саннидхика̄ракам̣ ка̄ме парибхун̃джитум̣ сеййатха̄пи пуббе ага̄рийабхӯто’ти. каччи метам̣, бханте, бхагавато суссутам̣ суггахитам̣ суманасикатам̣ сӯпадха̄рита’’нти?

‘‘таггха те етам̣, саджджха, суссутам̣ суггахитам̣ суманасикатам̣ сӯпадха̄ритам̣. пуббе ча̄хам̣, саджджха, етарахи ча евам̣ вада̄ми – ‘йо со бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄вимутто, абхаббо со нава т̣ха̄на̄ни аджджха̄чаритум̣ – абхаббо кхӣн̣а̄саво бхиккху сан̃чичча па̄н̣ам̣ джӣвита̄ воропетум̣…пе… абхаббо кхӣн̣а̄саво бхиккху саннидхика̄ракам̣ ка̄ме парибхун̃джитум̣ сеййатха̄пи пуббе ага̄рийабхӯто, абхаббо кхӣн̣а̄саво бхиккху буддхам̣ паччаккха̄тум̣, абхаббо кхӣн̣а̄саво бхиккху дхаммам̣ паччаккха̄тум̣, абхаббо кхӣн̣а̄саво бхиккху сан̇гхам̣ паччаккха̄тум̣, абхаббо кхӣн̣а̄саво бхиккху сиккхам̣ паччаккха̄тум̣’. пуббе ча̄хам̣, саджджха, етарахи ча евам̣ вада̄ми – ‘йо со бхиккху арахам̣ кхӣн̣а̄саво вуситава̄ катакаран̣ӣйо охитабха̄ро ануппаттасадаттхо париккхӣн̣абхавасам̣йоджано саммадан̃н̃а̄вимутто, абхаббо со има̄ни нава т̣ха̄на̄ни аджджха̄чариту’’’нти. ат̣т̣хамам̣.