6. севана̄суттам̣

6. татра кхо а̄йасма̄ са̄рипутто бхиккхӯ а̄мантеси…пе… а̄йасма̄ са̄рипутто етадавоча –

‘‘пуггалопи, а̄вусо, дувидхена ведитаббо – севитаббопи асевитаббопи. чӣварампи, а̄вусо, дувидхена ведитаббам̣ – севитаббампи асевитаббампи. пин̣д̣апа̄топи, а̄вусо, дувидхена ведитаббо – севитаббопи асевитаббопи. сена̄санампи, а̄вусо, дувидхена ведитаббам̣ – севитаббампи асевитаббампи. га̄манигамопи, а̄вусо, дувидхена ведитаббо – севитаббопи асевитаббопи. джанападападесопи а̄вусо, дувидхена ведитаббо – севитаббопи асевитаббопи.

‘‘‘пуггалопи, а̄вусо, дувидхена ведитаббо – севитаббопи асевитаббопӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ пуггалам̣ – ‘имам̣ кхо ме пуггалам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йанти; йе ча кхо ме паббаджитена джӣвитапариккха̄ра̄ самуда̄нетабба̄ чӣварапин̣д̣апа̄тасена̄санагила̄напаччайабхесаджджапариккха̄ра̄ те ча касирена самуда̄гаччханти; йасса чамхи аттха̄йа ага̄расма̄ анага̄рийам̣ паббаджито со ча ме са̄ман̃н̃аттхо на бха̄вана̄па̄рипӯрим̣ гаччхатӣ’ти, тена̄вусо, пуггалена со пуггало раттибха̄гам̣ ва̄ дивасабха̄гам̣ ва̄ сан̇кха̄пи ана̄пуччха̄ паккамитаббам̣ на̄нубандхитаббо.

‘‘таттха йам̣ джан̃н̃а̄ пуггалам̣ – ‘имам̣ кхо ме пуггалам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йанти; йе ча кхо ме паббаджитена джӣвитапариккха̄ра̄ самуда̄нетабба̄ чӣварапин̣д̣апа̄тасена̄санагила̄напаччайабхесаджджапариккха̄ра̄ те ча аппакасирена самуда̄гаччханти; йасса чамхи аттха̄йа ага̄расма̄ анага̄рийам̣ паббаджито со ча ме са̄ман̃н̃аттхо на бха̄вана̄па̄рипӯрим̣ гаччхатӣ’ти, тена̄вусо, пуггалена со пуггало сан̇кха̄пи ана̄пуччха̄ паккамитаббам̣ на̄нубандхитаббо.

‘‘таттха йам̣ джан̃н̃а̄ пуггалам̣ – ‘имам̣ кхо ме пуггалам̣ севато акусала̄ дхамма̄ париха̄йанти, кусала̄ дхамма̄ абхивад̣д̣ханти; йе ча кхо ме паббаджитена джӣвитапариккха̄ра̄ самуда̄нетабба̄ чӣварапин̣д̣апа̄тасена̄санагила̄напаччайабхесаджджапариккха̄ра̄ те ча касирена самуда̄гаччханти; йасса чамхи аттха̄йа ага̄расма̄ анага̄рийам̣ паббаджито со ча ме са̄ман̃н̃аттхо бха̄вана̄па̄рипӯрим̣ гаччхатӣ’ти, тена̄вусо, пуггалена со пуггало сан̇кха̄пи анубандхитаббо на паккамитаббам̣.

‘‘таттха йам̣ джан̃н̃а̄ пуггалам̣ – ‘имам̣ кхо ме пуггалам̣ севато акусала̄ дхамма̄ париха̄йанти, кусала̄ дхамма̄ абхивад̣д̣ханти; йе ча кхо ме паббаджитена джӣвитапариккха̄ра̄ самуда̄нетабба̄ чӣварапин̣д̣апа̄тасена̄санагила̄напаччайабхесаджджапариккха̄ра̄ те ча аппакасирена самуда̄гаччханти; йасса чамхи аттха̄йа ага̄расма̄ анага̄рийам̣ паббаджито со ча ме са̄ман̃н̃аттхо бха̄вана̄па̄рипӯрим̣ гаччхатӣ’ти, тена̄вусо, пуггалена со пуггало йа̄ваджӣвам̣ анубандхитаббо на паккамитаббам̣ апи пануджджама̄нена [пан̣уджджама̄нена (?)]. ‘пуггалопи, а̄вусо, дувидхена ведитаббо – севитаббопи асевитаббопӣ’ти, ити йам̣ там̣ вуттам̣, идаметам̣ пат̣ичча вуттам̣.

‘‘‘чӣварампи, а̄вусо, дувидхена ведитаббам̣ – севитаббампи асевитаббампӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ чӣварам̣ – ‘идам̣ кхо ме чӣварам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йантӣ’ти, еварӯпам̣ чӣварам̣ на севитаббам̣. таттха йам̣ джан̃н̃а̄ чӣварам̣ – ‘идам̣ кхо ме чӣварам̣ севато акусала̄ дхамма̄ париха̄йанти, кусала̄ дхамма̄ абхивад̣д̣хантӣ’ти, еварӯпам̣ чӣварам̣ севитаббам̣. ‘чӣварампи, а̄вусо, дувидхена ведитаббам̣ – севитаббампи асевитаббампӣ’ти, ити йам̣ там̣ вуттам̣, идаметам̣ пат̣ичча вуттам̣.

‘‘‘пин̣д̣апа̄топи, а̄вусо, дувидхена ведитаббо – севитаббопи асевитаббопӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ пин̣д̣апа̄там̣ – ‘имам̣ кхо ме пин̣д̣апа̄там̣ севато акусала̄ дхамма̄ абхивад̣д̣ханти, кусала̄ дхамма̄ париха̄йантӣ’ти, еварӯпо пин̣д̣апа̄то на севитаббо. таттха йам̣ джан̃н̃а̄ пин̣д̣апа̄там̣ – ‘имам̣ кхо ме пин̣д̣апа̄там̣ севато акусала̄ дхамма̄ париха̄йанти, кусала̄ дхамма̄ абхивад̣д̣хантӣ’ти, еварӯпо пин̣д̣апа̄то севитаббо. ‘пин̣д̣апа̄топи, а̄вусо, дувидхена ведитаббо – севитаббопи асевитаббопӣ’ти, ити йам̣ там̣ вуттам̣, идаметам̣ пат̣ичча вуттам̣.

‘‘‘сена̄санампи, а̄вусо, дувидхена ведитаббам̣ – севитаббампи асевитаббампӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ сена̄санам̣ – ‘‘идам̣ кхо ме сена̄санам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йантӣ’ти, еварӯпам̣ сена̄санам̣ на севитаббам̣. таттха йам̣ джан̃н̃а̄ сена̄санам̣ – ‘идам̣ кхо ме сена̄санам̣ севато акусала̄ дхамма̄ париха̄йанти, кусала̄ дхамма̄ абхивад̣д̣хантӣ’ти, еварӯпам̣ сена̄санам̣ севитаббам̣. ‘сена̄санампи, а̄вусо, дувидхена ведитаббам̣ – севитаббампи асевитаббампӣ’ти, ити йам̣ там̣ вуттам̣, идаметам̣ пат̣ичча вуттам̣.

‘‘‘га̄манигамопи, а̄вусо, дувидхена ведитаббо – севитаббопи асевитаббопӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ га̄манигамам̣ – ‘имам̣ кхо ме га̄манигамам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йантӣ’ти, еварӯпо га̄манигамо на севитаббо. таттха йам̣ джан̃н̃а̄ га̄манигамам̣ – ‘имам̣ кхо, ме га̄манигамам̣ севато акусала̄ дхамма̄ париха̄йанти, кусала̄ дхамма̄ абхивад̣д̣хантӣ’ти, еварӯпо га̄манигамо севитаббо. ‘га̄манигамопи, а̄вусо, дувидхена ведитаббо – севитаббопи асевитаббопӣ’ти, ити йам̣ там̣ вуттам̣, идаметам̣ пат̣ичча вуттам̣.

‘‘‘джанападападесопи, а̄вусо, дувидхена ведитаббо – севитаббопи асевитаббопӣ’ти, ити кхо панетам̣ вуттам̣. кин̃четам̣ пат̣ичча вуттам̣? таттха йам̣ джан̃н̃а̄ джанападападесам̣ – ‘имам̣ кхо ме джанападападесам̣ севато акусала̄ дхамма̄ абхивад̣д̣ханти, кусала̄ дхамма̄ париха̄йантӣ’ти, еварӯпо джанападападесо на севитаббо. таттха йам̣ джан̃н̃а̄ джанападападесам̣ – ‘имам̣ кхо ме джанападападесам̣ севато акусала̄ дхамма̄ париха̄йанти, кусала̄ дхамма̄ абхивад̣д̣хантӣ’ти, еварӯпо джанападападесо севитаббо. ‘джанападападесопи, а̄вусо, дувидхена ведитаббо – севитаббопи асевитаббопӣ’ти, ити йам̣ там̣ вуттам̣, идаметам̣ пат̣ичча вутта’’нти. чхат̣т̣хам̣.