4. нандакасуттам̣

4. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ нандако упат̣т̣ха̄наса̄ла̄йам̣ бхиккхӯ дхаммийа̄ катха̄йа сандассети сама̄дапети самуттеджети сампахам̣сети. атха кхо бхагава̄ са̄йанхасамайам̣ пат̣исалла̄на̄ вут̣т̣хито йенупат̣т̣ха̄наса̄ла̄ тенупасан̇ками; упасан̇камитва̄ бахидва̄ракот̣т̣хаке ат̣т̣ха̄си катха̄парийоса̄нам̣ а̄гамайама̄но. атха кхо бхагава̄ катха̄парийоса̄нам̣ видитва̄ укка̄сетва̄ аггал̣ам̣ а̄кот̣еси. виварим̣су кхо те бхиккхӯ бхагавато два̄рам̣.

атха кхо бхагава̄ упат̣т̣ха̄наса̄лам̣ пависитва̄ пан̃н̃атта̄сане нисӣди. нисаджджа кхо бхагава̄ а̄йасмантам̣ нандакам̣ етадавоча – ‘‘дӣгхо кхо тйа̄йам̣, нандака, дхаммапарийа̄йо бхиккхӯнам̣ пат̣ибха̄си. апи ме пит̣т̣хи а̄гила̄йати бахидва̄ракот̣т̣хаке т̣хитасса катха̄парийоса̄нам̣ а̄гамайама̄насса̄’’ти.

евам̣ вутте а̄йасма̄ нандако са̄раджджама̄нарӯпо бхагавантам̣ етадавоча – ‘‘на кхо пана майам̣, бханте, джа̄на̄ма ‘бхагава̄ бахидва̄ракот̣т̣хаке т̣хито’ти. саче хи майам̣, бханте, джа̄неййа̄ма ‘бхагава̄ бахидва̄ракот̣т̣хаке т̣хито’ти, еттакампи ( ) [(дхаммам̣) каттхачи] но наппат̣ибха̄сеййа̄’’ти.

атха кхо бхагава̄ а̄йасмантам̣ нандакам̣ са̄раджджама̄нарӯпам̣ видитва̄ а̄йасмантам̣ нандакам̣ етадавоча – ‘‘са̄дху, са̄дху, нандака! етам̣ кхо, нандака, тумха̄кам̣ патирӯпам̣ кулапутта̄нам̣ саддха̄йа ага̄расма̄ анага̄рийам̣ паббаджита̄нам̣, йам̣ тумхе дхаммийа̄ катха̄йа саннисӣдеййа̄тха. саннипатита̄нам̣ во, нандака, двайам̣ каран̣ӣйам̣ – дхаммӣ ва̄ катха̄ арийо ва̄ тун̣хӣбха̄во. [а. ни. 8.71; 9.1] саддхо ча, нандака, бхиккху хоти, но ча сӣлава̄. евам̣ со тенан̇гена апарипӯро хоти. тена там̣ ан̇гам̣ парипӯретаббам̣ – ‘кинта̄хам̣ саддхо ча ассам̣ сӣлава̄ ча̄’ти. йато ча кхо, нандака, бхиккху саддхо ча хоти сӣлава̄ ча, евам̣ со тенан̇гена парипӯро хоти.

‘‘саддхо ча, нандака, бхиккху хоти сӣлава̄ ча, но ча ла̄бхӣ аджджхаттам̣ четосама̄дхисса. евам̣ со тенан̇гена апарипӯро хоти. тена там̣ ан̇гам̣ парипӯретаббам̣ – ‘кинта̄хам̣ саддхо ча ассам̣ сӣлава̄ ча ла̄бхӣ ча аджджхаттам̣ четосама̄дхисса̄’ти. йато ча кхо, нандака, бхиккху саддхо ча хоти сӣлава̄ ча ла̄бхӣ ча аджджхаттам̣ четосама̄дхисса, евам̣ со тенан̇гена парипӯро хоти.

‘‘саддхо ча, нандака, бхиккху хоти сӣлава̄ ча ла̄бхӣ ча аджджхаттам̣ четосама̄дхисса, на ла̄бхӣ адхипан̃н̃а̄дхаммавипассана̄йа. евам̣ со тенан̇гена апарипӯро хоти. сеййатха̄пи, нандака, па̄н̣ако чатуппа̄дако асса. тасса еко па̄до омако ла̄мако. евам̣ со тенан̇гена апарипӯро асса. евамевам̣ кхо, нандака, бхиккху саддхо ча хоти сӣлава̄ ча ла̄бхӣ ча аджджхаттам̣ четосама̄дхисса, на ла̄бхӣ адхипан̃н̃а̄дхаммавипассана̄йа. евам̣ со тенан̇гена апарипӯро хоти. тена там̣ ан̇гам̣ парипӯретаббам̣ – ‘кинта̄хам̣ саддхо ча ассам̣ сӣлава̄ ча ла̄бхӣ ча аджджхаттам̣ четосама̄дхисса ла̄бхӣ ча адхипан̃н̃а̄дхаммавипассана̄йа̄’’’ти.

‘‘йато ча кхо, нандака, бхиккху саддхо ча хоти сӣлава̄ ча ла̄бхӣ ча аджджхаттам̣ четосама̄дхисса ла̄бхӣ ча адхипан̃н̃а̄дхаммавипассана̄йа, евам̣ со тенан̇гена парипӯро хотӣ’’ти. идамавоча бхагава̄. идам̣ ватва̄на сугато ут̣т̣ха̄йа̄сана̄ виха̄рам̣ па̄виси.

атха кхо а̄йасма̄ нандако ачирапаккантасса бхагавато бхиккхӯ а̄мантеси – ‘‘ида̄ни, а̄вусо, бхагава̄ чатӯхи падехи кевалапарипун̣н̣ам̣ парисуддхам̣ брахмачарийам̣ пака̄сетва̄ ут̣т̣ха̄йа̄сана̄ виха̄рам̣ павит̣т̣хо – ‘саддхо ча, нандака, бхиккху хоти, но ча сӣлава̄. евам̣ со тенан̇гена апарипӯро хоти. тена там̣ ан̇гам̣ парипӯретаббам̣ – кинта̄хам̣ саддхо ча ассам̣ сӣлава̄ ча̄’ти. йато ча кхо нандака бхиккху саддхо ча хоти сӣлава̄ ча, евам̣ со тенан̇гена парипӯро хоти. саддхо ча нандака бхиккху хоти сӣлава̄ ча, но ча ла̄бхӣ аджджхаттам̣ четосама̄дхисса…пе… ла̄бхӣ ча аджджхаттам̣ четосама̄дхисса, на ла̄бхӣ адхипан̃н̃а̄дхаммавипассана̄йа, евам̣ со тенан̇гена апарипӯро хоти. сеййатха̄пи нандака па̄н̣ако чатуппа̄дако асса, тасса еко па̄до омако ла̄мако, евам̣ со тенан̇гена апарипӯро асса. евамевам̣ кхо, нандака, бхиккху саддхо ча хоти сӣлава̄ ча, ла̄бхӣ ча аджджхаттам̣ четосама̄дхисса, на ла̄бхӣ адхипан̃н̃а̄дхаммавипассана̄йа, евам̣ со тенан̇гена апарипӯро хоти, тена там̣ ан̇гам̣ парипӯретаббам̣ ‘кинта̄хам̣ саддхо ча ассам̣ сӣлава̄ ча, ла̄бхӣ ча аджджхаттам̣ четосама̄дхисса, ла̄бхӣ ча адхипан̃н̃а̄дхаммавипассана̄йа̄’ти. йато ча кхо, нандака, бхиккху саддхо ча хоти сӣлава̄ ча ла̄бхӣ ча аджджхаттам̣ четосама̄дхисса ла̄бхӣ ча адхипан̃н̃а̄дхаммавипассана̄йа, евам̣ со тенан̇гена парипӯро хотӣ’’ти.

‘‘пан̃чиме, а̄вусо, а̄нисам̣са̄ ка̄лена дхаммассаване ка̄лена дхаммаса̄каччха̄йа. катаме пан̃ча? идха̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сети. йатха̄ йатха̄, а̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сети, татха̄ татха̄ со саттху пийо ча хоти мана̄по ча гару ча бха̄ванӣйо ча. айам̣, а̄вусо, пат̣хамо а̄нисам̣со ка̄лена дхаммассаване ка̄лена дхаммаса̄каччха̄йа.

‘‘пуна чапарам̣, а̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣…пе… брахмачарийам̣ пака̄сети. йатха̄ йатха̄, а̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣…пе… брахмачарийам̣ пака̄сети, татха̄ татха̄ нам̣ сабрахмача̄рӣ уттари самбха̄венти – ‘аддха̄ айама̄йасма̄ патто ва̄ паджджати ва̄’. айам̣, а̄вусо, чатуттхо а̄нисам̣со ка̄лена дхаммассаване ка̄лена дхаммаса̄каччха̄йа.

‘‘пуна чапарам̣, а̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сети. йатха̄ йатха̄, а̄вусо, бхиккху бхиккхӯнам̣ дхаммам̣ десети а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сети, таттха йе кхо бхиккхӯ секха̄ аппаттама̄наса̄ ануттарам̣ йогаккхемам̣ паттхайама̄на̄ вихаранти, те там̣ дхаммам̣ сутва̄ вӣрийам̣ а̄рабханти аппаттасса паттийа̄ анадхигатасса адхигама̄йа асаччхикатасса саччхикирийа̄йа. йе пана таттха бхиккхӯ араханто кхӣн̣а̄сава̄ вуситаванто катакаран̣ӣйа̄ охитабха̄ра̄ ануппаттасадаттха̄ париккхӣн̣абхавасам̣йоджана̄ саммадан̃н̃а̄вимутта̄, те там̣ дхаммам̣ сутва̄ дит̣т̣хадхаммасукхавиха̄рам̣йева ануйутта̄ вихаранти. айам̣, а̄вусо, пан̃чамо а̄нисам̣со ка̄лена дхаммассаване ка̄лена дхаммаса̄каччха̄йа. име кхо, а̄вусо, пан̃ча а̄нисам̣са̄ ка̄лена дхаммассаване ка̄лена дхаммаса̄каччха̄йа̄’’ти. чатуттхам̣.