9. париса̄суттам̣

69. ‘‘ат̣т̣хима̄, бхиккхаве, париса̄. катама̄ ат̣т̣ха? кхаттийапариса̄, бра̄хман̣апариса̄, гахапатипариса̄, саман̣апариса̄, ча̄тумаха̄ра̄джикапариса̄, та̄ватим̣сапариса̄, ма̄рапариса̄, брахмапариса̄. абхиджа̄на̄ми кхо пана̄хам̣, бхиккхаве, анекасатам̣ кхаттийапарисам̣ упасан̇камита̄. татрапи майа̄ саннисиннапуббан̃чева саллапитапуббан̃ча са̄каччха̄ ча сама̄паннапубба̄. таттха йа̄дисако тесам̣ ван̣н̣о хоти та̄дисако майхам̣ ван̣н̣о хоти, йа̄дисако тесам̣ саро хоти та̄дисако майхам̣ саро хоти. дхаммийа̄ ча катха̄йа сандассеми сама̄дапеми самуттеджеми сампахам̣семи. бха̄сама̄нан̃ча мам̣ на джа̄нанти – ‘ко ну кхо айам̣ бха̄сати дево ва̄ мануссо ва̄’ти. дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ антарадха̄йа̄ми. антарахитан̃ча мам̣ на джа̄нанти – ‘ко ну кхо айам̣ антарахито дево ва̄ мануссо ва̄’’’ти.

‘‘абхиджа̄на̄ми кхо пана̄хам̣, бхиккхаве, анекасатам̣ бра̄хман̣апарисам̣…пе… гахапатипарисам̣… саман̣апарисам̣… ча̄тумаха̄ра̄джикапарисам̣… та̄ватим̣сапарисам̣… ма̄рапарисам̣… брахмапарисам̣ упасан̇камита̄. татрапи майа̄ саннисиннапуббан̃чева саллапитапуббан̃ча са̄каччха̄ ча сама̄паннапубба̄. таттха йа̄дисако тесам̣ ван̣н̣о хоти та̄дисако майхам̣ ван̣н̣о хоти, йа̄дисако тесам̣ саро хоти та̄дисако майхам̣ саро хоти. дхаммийа̄ ча катха̄йа сандассеми сама̄дапеми самуттеджеми сампахам̣семи. бха̄сама̄нан̃ча мам̣ на джа̄нанти – ‘ко ну кхо айам̣ бха̄сати дево ва̄ мануссо ва̄’ти. дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ антарадха̄йа̄ми. антарахитан̃ча мам̣ на джа̄нанти – ‘ко ну кхо айам̣ антарахито дево ва̄ мануссо ва̄’ти. има̄ кхо, бхиккхаве, ат̣т̣ха париса̄’’ти. навамам̣.