5. абхибха̄йатанасуттам̣

65. [дӣ. ни. 3.338, 358; а. ни. 10.29] ‘‘ат̣т̣хима̄ни, бхиккхаве, абхибха̄йатана̄ни. катама̄ни ат̣т̣ха? аджджхаттам̣ рӯпасан̃н̃ӣ еко бахиддха̄ рӯпа̄ни пассати паритта̄ни суван̣н̣адуббан̣н̣а̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ пат̣хамам̣ абхибха̄йатанам̣.

‘‘аджджхаттам̣ рӯпасан̃н̃ӣ еко бахиддха̄ рӯпа̄ни пассати аппама̄н̣а̄ни суван̣н̣адуббан̣н̣а̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ дутийам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати паритта̄ни суван̣н̣адуббан̣н̣а̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ татийам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати аппама̄н̣а̄ни суван̣н̣адуббан̣н̣а̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ чатуттхам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати нӣла̄ни нӣлаван̣н̣а̄ни нӣланидассана̄ни нӣланибха̄са̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ пан̃чамам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати пӣта̄ни пӣтаван̣н̣а̄ни пӣтанидассана̄ни пӣтанибха̄са̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ чхат̣т̣хам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати лохитака̄ни лохитакаван̣н̣а̄ни лохитаканидассана̄ни лохитаканибха̄са̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ саттамам̣ абхибха̄йатанам̣.

‘‘аджджхаттам̣ арӯпасан̃н̃ӣ еко бахиддха̄ рӯпа̄ни пассати ода̄та̄ни ода̄таван̣н̣а̄ни ода̄танидассана̄ни ода̄танибха̄са̄ни. ‘та̄ни абхибхуййа джа̄на̄ми пасса̄мӣ’ти, евам̣сан̃н̃ӣ хоти. идам̣ ат̣т̣хамам̣ абхибха̄йатанам̣. има̄ни кхо, бхиккхаве, ат̣т̣ха абхибха̄йатана̄нӣ’’ти. пан̃чамам̣.