3. пат̣хамахаттхакасуттам̣

23. екам̣ самайам̣ бхагава̄ а̄л̣авийам̣ вихарати агга̄л̣аве четийе. татра кхо бхагава̄ бхиккхӯ а̄мантеси – ‘‘саттахи, бхиккхаве, аччхарийехи аббхутехи дхаммехи саманна̄гатам̣ хаттхакам̣ а̄л̣авакам̣ дха̄ретха. катамехи саттахи? саддхо хи, бхиккхаве, хаттхако а̄л̣авако; сӣлава̄, бхиккхаве, хаттхако а̄л̣авако; хирӣма̄, бхиккхаве, хаттхако а̄л̣авако; оттаппӣ, бхиккхаве, хаттхако а̄л̣авако; бахуссуто, бхиккхаве, хаттхако а̄л̣авако; ча̄гава̄, бхиккхаве, хаттхако а̄л̣авако; пан̃н̃ава̄, бхиккхаве, хаттхако а̄л̣авако – имехи кхо, бхиккхаве, саттахи аччхарийехи аббхутехи дхаммехи саманна̄гатам̣ хаттхакам̣ а̄л̣авакам̣ дха̄ретха̄’’ти. идамавоча бхагава̄. идам̣ ватва̄на сугато ут̣т̣ха̄йа̄сана̄ виха̄рам̣ па̄виси.

атха кхо ан̃н̃атаро бхиккху пуббан̣хасамайам̣ нива̄сетва̄ паттачӣварама̄да̄йа йена хаттхакасса а̄л̣авакасса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо хаттхако а̄л̣авако йена со бхиккху тенупасан̇ками; упасан̇камитва̄ там̣ бхиккхум̣ абхива̄детва̄ екамантам̣ нисӣди. екамантам̣ нисиннам̣ кхо хаттхакам̣ а̄л̣авакам̣ со бхиккху етадавоча –

‘‘саттахи кхо твам̣, а̄вусо, аччхарийехи аббхутехи дхаммехи саманна̄гато бхагавата̄ бйа̄като. катамехи саттахи? ‘саддхо, бхиккхаве, хаттхако а̄л̣авако; сӣлава̄…пе… хирима̄… оттаппӣ… бахуссуто… ча̄гава̄… пан̃н̃ава̄, бхиккхаве, хаттхако а̄л̣авако’ти. имехи кхо твам̣, а̄вусо, саттахи аччхарийехи аббхутехи дхаммехи саманна̄гато бхагавата̄ бйа̄като’’ти. ‘‘каччиттха, бханте, на кочи гихӣ ахоси ода̄тавасано’’ти? ‘‘на хеттха, а̄вусо, кочи гихӣ ахоси ода̄тавасано’’ти. ‘‘са̄дху, бханте, йадеттха на кочи гихӣ ахоси ода̄тавасано’’ти.

атха кхо со бхиккху хаттхакасса а̄л̣авакасса нивесане пин̣д̣апа̄там̣ гахетва̄ ут̣т̣ха̄йа̄сана̄ пакка̄ми. атха кхо со бхиккху паччха̄бхаттам̣ пин̣д̣апа̄тапат̣икканто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху бхагавантам̣ етадавоча –

‘‘идха̄хам̣, бханте, пуббан̣хасамайам̣ нива̄сетва̄ паттачӣварама̄да̄йа йена хаттхакасса а̄л̣авакасса нивесанам̣ тенупасан̇камим̣; упасан̇камитва̄ пан̃н̃атте а̄сане нисӣдим̣. атха кхо, бханте, хаттхако а̄л̣авако йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ нисӣди. екамантам̣ нисиннам̣ кхо ахам̣, бханте, хаттхакам̣ а̄л̣авакам̣ етадавачам̣ – ‘саттахи кхо твам̣, а̄вусо, аччхарийехи аббхутехи дхаммехи саманна̄гато бхагавата̄ бйа̄като. катамехи саттахи? саддхо, бхиккхаве, хаттхако а̄л̣авако; сӣлава̄…пе… хирима̄… оттаппӣ… бахуссуто… ча̄гава̄… пан̃н̃ава̄, бхиккхаве, хаттхако а̄л̣авакоти. имехи кхо твам̣, а̄вусо, саттахи аччхарийехи аббхутехи дхаммехи саманна̄гато бхагавата̄ бйа̄като’ти.

‘‘евам̣ вутте, бханте, хаттхако мам̣ етадавоча – ‘каччиттха, бханте, на кочи гихӣ ахоси ода̄тавасано’ти? ‘на хеттха, а̄вусо, кочи гихӣ ахоси ода̄тавасано’ти. ‘са̄дху, бханте, йадеттха на кочи гихӣ ахоси ода̄тавасано’’’ти.

‘‘са̄дху са̄дху, бхиккху! аппиччхо со, бхиккху, кулапутто. сантейева аттани кусаладхамме на иччхати парехи н̃а̄йама̄не [пан̃н̃а̄пайама̄не (ка.)]. тена хи твам̣, бхиккху, имина̄пи ат̣т̣хамена аччхарийена аббхутена дхаммена саманна̄гатам̣ хаттхакам̣ а̄л̣авакам̣ дха̄рехи, йадидам̣ аппиччхата̄йа̄’’ти. татийам̣.