4. дутийахаттхакасуттам̣

24. екам̣ самайам̣ бхагава̄ а̄л̣авийам̣ вихарати агга̄л̣аве четийе. атха кхо хаттхако а̄л̣авако пан̃чаматтехи упа̄сакасатехи паривуто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо хаттхакам̣ а̄л̣авакам̣ бхагава̄ етадавоча – ‘‘махатӣ кхо тйа̄йам̣, хаттхака, париса̄. катхам̣ пана твам̣, хаттхака, имам̣ махатим̣ парисам̣ сан̇ган̣ха̄сӣ’’ти? ‘‘йа̄нима̄ни, бханте, бхагавата̄ десита̄ни [а. ни. 4.32; дӣ. ни. 3.313] чатта̄ри сан̇гахаваттхӯни, теха̄хам̣ [тена̄хам̣ (сӣ.)] имам̣ махатим̣ парисам̣ сан̇ган̣ха̄ми. ахам̣, бханте, йам̣ джа̄на̄ми – ‘айам̣ да̄нена сан̇гахетаббо’ти, там̣ да̄нена сан̇ган̣ха̄ми; йам̣ джа̄на̄ми – ‘айам̣ пеййаваджджена сан̇гахетаббо’ти, там̣ пеййаваджджена сан̇ган̣ха̄ми; йам̣ джа̄на̄ми – ‘айам̣ аттхачарийа̄йа сан̇гахетаббо’ти, там̣ аттхачарийа̄йа сан̇ган̣ха̄ми; йам̣ джа̄на̄ми – ‘айам̣ сама̄наттата̄йа сан̇гахетаббо’ти, там̣ сама̄наттата̄йа сан̇ган̣ха̄ми. сам̣виджджанти кхо пана ме, бханте, куле бхога̄. далиддасса кхо но татха̄ сотаббам̣ ман̃н̃антӣ’’ти. ‘‘са̄дху са̄дху, хаттхака! йони кхо тйа̄йам̣, хаттхака, махатим̣ парисам̣ сан̇гахетум̣. йе хи кечи, хаттхака, атӣтамаддха̄нам̣ махатим̣ парисам̣ сан̇гахесум̣, саббе те имехева чатӯхи сан̇гахаваттхӯхи махатим̣ парисам̣ сан̇гахесум̣. йепи хи кечи, хаттхака, ана̄гатамаддха̄нам̣ махатим̣ парисам̣ сан̇ган̣хиссанти, саббе те имехева чатӯхи сан̇гахаваттхӯхи махатим̣ парисам̣ сан̇ган̣хиссанти. йепи хи кечи, хаттхака, етарахи махатим̣ парисам̣ сан̇ган̣ханти, саббе те имехева чатӯхи сан̇гахаваттхӯхи махатим̣ парисам̣ сан̇ган̣хантӣ’’ти.

атха кхо хаттхако а̄л̣авако бхагавата̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо бхагава̄ ачирапакканте хаттхаке а̄л̣аваке бхиккхӯ а̄мантеси – ‘‘ат̣т̣хахи, бхиккхаве, аччхарийехи аббхутехи дхаммехи саманна̄гатам̣ хаттхакам̣ а̄л̣авакам̣ дха̄ретха. катамехи ат̣т̣хахи? саддхо, бхиккхаве, хаттхако а̄л̣авако; сӣлава̄, бхиккхаве…пе… хирӣма̄… оттаппӣ… бахуссуто… ча̄гава̄… пан̃н̃ава̄, бхиккхаве, хаттхако а̄л̣авако; аппиччхо, бхиккхаве, хаттхако а̄л̣авако. имехи кхо, бхиккхаве, ат̣т̣хахи аччхарийехи аббхутехи дхаммехи саманна̄гатам̣ хаттхакам̣ а̄л̣авакам̣ дха̄ретха̄’’ти. чатуттхам̣.