2. дутийауггасуттам̣

22. екам̣ самайам̣ бхагава̄ ваджджӣсу вихарати хаттхига̄ме. татра кхо бхагава̄ бхиккхӯ а̄мантеси – ‘‘ат̣т̣хахи, бхиккхаве, аччхарийехи аббхутехи дхаммехи саманна̄гатам̣ уггам̣ гахапатим̣ хаттхига̄макам̣ дха̄ретха̄’’ти. идамавоча бхагава̄. идам̣ ватва̄на сугато ут̣т̣ха̄йа̄сана̄ виха̄рам̣ па̄виси.

атха кхо ан̃н̃атаро бхиккху пуббан̣хасамайам̣ нива̄сетва̄ паттачӣварама̄да̄йа йена уггасса гахапатино хаттхига̄макасса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо угго гахапати хаттхига̄мако йена со бхиккху тенупасан̇ками; упасан̇камитва̄ там̣ бхиккхум̣ абхива̄детва̄ екамантам̣ нисӣди. екамантам̣ нисиннам̣ кхо уггам̣ гахапатим̣ хаттхига̄макам̣ со бхиккху етадавоча – ‘‘ат̣т̣хахи кхо твам̣, гахапати, аччхарийехи аббхутехи дхаммехи саманна̄гато бхагавата̄ бйа̄като. катаме те, гахапати, ат̣т̣ха аччхарийа̄ аббхута̄ дхамма̄, йехи твам̣ саманна̄гато бхагавата̄ бйа̄като’’ти?

‘‘на кхо ахам̣, бханте, джа̄на̄ми – катамехи ат̣т̣хахи аччхарийехи аббхутехи дхаммехи саманна̄гато бхагавата̄ бйа̄катоти. апи ча, бханте, йе ме ат̣т̣ха аччхарийа̄ аббхута̄ дхамма̄ сам̣виджджанти, там̣ сун̣а̄хи, са̄дхукам̣ манаси карохи; бха̄сисса̄мӣ’’ти. ‘‘евам̣, гахапатӣ’’ти кхо со бхиккху уггасса гахапатино хаттхига̄макасса паччассоси. угго гахапати хаттхига̄мако етадавоча – ‘‘йада̄хам̣, бханте, на̄гаване паричаранто бхагавантам̣ пат̣хамам̣ дӯратова аддасам̣; саха дассаненева ме, бханте, бхагавато читтам̣ пасӣди, сура̄мадо ча пахӣйи. айам̣ кхо ме, бханте, пат̣хамо аччхарийо аббхуто дхаммо сам̣виджджати.

‘‘со кхо ахам̣, бханте, пасанначитто бхагавантам̣ пайирупа̄сим̣. тасса ме бхагава̄ анупуббим̣ катхам̣ катхеси, сеййатхидам̣ – да̄накатхам̣ сӣлакатхам̣ саггакатхам̣; ка̄ма̄нам̣ а̄дӣнавам̣ ока̄рам̣ сам̣килесам̣, неккхамме а̄нисам̣сам̣ пака̄сеси. йада̄ мам̣ бхагава̄ ан̃н̃а̄си каллачиттам̣ мудучиттам̣ винӣваран̣ачиттам̣ удаггачиттам̣ пасанначиттам̣, атха йа̄ буддха̄нам̣ са̄муккам̣сика̄ дхаммадесана̄ там̣ пака̄сеси – дуккхам̣, самудайам̣, ниродхам̣, маггам̣. сеййатха̄пи на̄ма суддхам̣ ваттхам̣ апагатака̄л̣акам̣ саммадева раджанам̣ пат̣игган̣хеййа; евамевам̣ кхо ме тасмим̣йева а̄сане вираджам̣ вӣтамалам̣ дхаммачаккхум̣ удапа̄ди – ‘йам̣ кин̃чи самудайадхаммам̣, саббам̣ там̣ ниродхадхамма’нти. со кхо ахам̣, бханте, дит̣т̣хадхаммо паттадхаммо видитадхаммо парийога̄л̣хадхаммо тин̣н̣авичикиччхо вигатакатхам̣катхо веса̄раджджаппатто апараппаччайо саттхуса̄сане таттхева буддхан̃ча дхамман̃ча сан̇гхан̃ча саран̣ам̣ агама̄сим̣, брахмачарийапан̃чама̄ни ча сиккха̄пада̄ни сама̄дийим̣. айам̣ кхо ме, бханте, дутийо аччхарийо аббхуто дхаммо сам̣виджджати.

‘‘тасса майхам̣, бханте, чатассо кома̄рийо паджа̄патийо ахесум̣. атха кхва̄хам̣, бханте, йена та̄ паджа̄патийо тенупасан̇камим̣; упасан̇камитва̄ та̄ паджа̄патийо етадавачам̣ – ‘майа̄ кхо, бхагинийо, брахмачарийапан̃чама̄ни сиккха̄пада̄ни сама̄динна̄ни. йа̄ иччхати са̄ идхева бхоге ча бхун̃джату пун̃н̃а̄ни ча кароту, сака̄ни ва̄ н̃а̄тикула̄ни гаччхату. хоти ва̄ пана пуриса̄дхиппа̄йо, касса во даммӣ’ти? евам̣ вутте са̄, бханте, джет̣т̣ха̄ паджа̄пати мам̣ етадавоча – ‘иттханна̄масса мам̣, аййапутта, пурисасса дехӣ’ти. атха кхо ахам̣, бханте, там̣ пурисам̣ паккоса̄петва̄ ва̄мена хаттхена паджа̄патим̣ гахетва̄ даккхин̣ена хаттхена бхин̇га̄рам̣ гахетва̄ тасса пурисасса он̣оджесим̣. кома̄рим̣ кхо пана̄хам̣, бханте, да̄рам̣ париччаджанто на̄бхиджа̄на̄ми читтасса ан̃н̃атхаттам̣. айам̣ кхо ме, бханте, татийо аччхарийо аббхуто дхаммо сам̣виджджати.

‘‘сам̣виджджанти кхо пана ме, бханте, куле бхога̄. те ча кхо аппат̣ивибхатта̄ сӣлавантехи калйа̄н̣адхаммехи. айам̣ кхо ме, бханте, чатуттхо аччхарийо аббхуто дхаммо сам̣виджджати.

‘‘йам̣ кхо пана̄хам̣, бханте, бхиккхум̣ пайирупа̄са̄ми; саккаччам̣йева пайирупа̄са̄ми, но асаккаччам̣. со че ме а̄йасма̄ дхаммам̣ десети; саккаччам̣йева сун̣оми, но асаккаччам̣. но че ме со а̄йасма̄ дхаммам̣ десети, ахамасса дхаммам̣ десеми. айам̣ кхо ме, бханте, пан̃чамо аччхарийо аббхуто дхаммо сам̣виджджати.

‘‘аначчхарийам̣ кхо пана, бханте, сан̇гхе нимантите девата̄ упасан̇камитва̄ а̄роченти – ‘асуко, гахапати, бхиккху убхатобха̄гавимутто асуко пан̃н̃а̄вимутто асуко ка̄йасаккхӣ асуко дит̣т̣хиппатто [дит̣т̣хаппатто (ка.)] асуко саддха̄вимутто асуко дхамма̄нуса̄рӣ асуко саддха̄нуса̄рӣ асуко сӣлава̄ калйа̄н̣адхаммо асуко дуссӣло па̄падхаммо’ти. сан̇гхам̣ кхо пана̄хам̣, бханте, паривисанто на̄бхиджа̄на̄ми евам̣ читтам̣ уппа̄денто – ‘имасса ва̄ тхокам̣ деми имасса ва̄ бахука’нти. атха кхва̄хам̣, бханте, самачиттова деми. айам̣ кхо ме, бханте, чхат̣т̣хо аччхарийо аббхуто дхаммо сам̣виджджати.

‘‘аначчхарийам̣ кхо пана мам̣, бханте, девата̄ упасан̇камитва̄ а̄роченти – ‘сва̄ккха̄то, гахапати, бхагавата̄ дхаммо’ти. евам̣ вутте ахам̣, бханте, та̄ девата̄ евам̣ вадеми – ‘вадеййа̄тха ва̄ евам̣ кхо тумхе девата̄ но ва̄ вадеййа̄тха, атха кхо сва̄ккха̄то бхагавата̄ дхаммо’ти. на кхо пана̄хам̣, бханте, абхиджа̄на̄ми татонида̄нам̣ читтасса уннатим̣ – ‘мам̣ та̄ девата̄ упасан̇каманти, ахам̣ ва̄ девата̄хи саддхим̣ саллапа̄мӣ’ти. айам̣ кхо ме, бханте, саттамо аччхарийо аббхуто дхаммо сам̣виджджати.

‘‘саче кхо пана̄хам̣, бханте, бхагавато пат̣хаматарам̣ ка̄лам̣ кареййам̣, аначчхарийам̣ кхо панетам̣ йам̣ мам̣ бхагава̄ евам̣ бйа̄кареййа – ‘наттхи там̣ сам̣йоджанам̣ йена сам̣йутто угго гахапати хаттхига̄мако пуна имам̣ локам̣ а̄гаччхеййа̄’ти. айам̣ кхо ме, бханте, ат̣т̣хамо аччхарийо аббхуто дхаммо сам̣виджджати. име кхо ме, бханте, ат̣т̣ха аччхарийа̄ аббхута̄ дхамма̄ сам̣виджджанти. на ча кхо ахам̣ джа̄на̄ми – катамехи ча̄хам̣ ат̣т̣хахи аччхарийехи аббхутехи дхаммехи саманна̄гато бхагавата̄ бйа̄като’’ти.

‘‘атха кхо со бхиккху уггасса гахапатино хаттхига̄макасса нивесане пин̣д̣апа̄там̣ гахетва̄ ут̣т̣ха̄йа̄сана̄ пакка̄ми. атха кхо со бхиккху паччха̄бхаттам̣ пин̣д̣апа̄тапат̣икканто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху йа̄ватако ахоси уггена гахапатина̄ хаттхига̄макена саддхим̣ катха̄салла̄по, там̣ саббам̣ бхагавато а̄рочеси.

‘‘са̄дху са̄дху, бхиккху! йатха̄ там̣ угго гахапати хаттхига̄мако самма̄ бйа̄карама̄но бйа̄кареййа, имехева кхо бхиккху, ат̣т̣хахи аччхарийехи аббхутехи дхаммехи саманна̄гато угго гахапати хаттхига̄мако майа̄ бйа̄като. имехи ча пана, бхиккху, ат̣т̣хахи аччхарийехи аббхутехи дхаммехи саманна̄гатам̣ уггам̣ гахапатим̣ хаттхига̄макам̣ дха̄рехӣ’’ти. дутийам̣.