4. сӣхасена̄патисуттам̣

57. евам̣ ме сутам̣ – екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо сӣхо сена̄пати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо сӣхо сена̄пати бхагавантам̣ етадавоча – ‘‘сакка̄ ну кхо, бханте, сандит̣т̣хикам̣ да̄напхалам̣ пан̃н̃а̄пету’’нти?

‘‘тена хи, сӣха, тан̃н̃еветтха пат̣ипуччхисса̄ми, йатха̄ те кхамеййа татха̄ нам̣ бйа̄кареййа̄си. там̣ ким̣ ман̃н̃аси, сӣха, идха две пуриса̄ – еко пурисо ассаддхо маччхарӣ кадарийо парибха̄сако, еко пурисо саддхо да̄напати ануппада̄нарато. там̣ ким̣ ман̃н̃аси, сӣха, кам̣ ну кхо [ким̣ ну кхо (ка.)] араханто пат̣хамам̣ анукампанта̄ анукампеййум̣ – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти?

‘‘йо со, бханте, пурисо ассаддхо маччхарӣ кадарийо парибха̄сако, кинтам̣ [кинти (ка.)] араханто пат̣хамам̣ анукампанта̄ анукамписсанти! йо ча кхо со, бханте, пурисо саддхо да̄напати ануппада̄нарато там̣йева араханто пат̣хамам̣ анукампанта̄ анукампеййум̣’’.

‘‘там̣ ким̣ ман̃н̃аси, сӣха, кам̣ ну кхо араханто пат̣хамам̣ упасан̇каманта̄ упасан̇камеййум̣ – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, кинтам̣ араханто пат̣хамам̣ упасан̇каманта̄ упасан̇камиссанти! йо ча кхо со, бханте, пурисо саддхо да̄напати ануппада̄нарато там̣йева араханто пат̣хамам̣ упасан̇каманта̄ упасан̇камеййум̣’’.

‘‘там̣ ким̣ ман̃н̃аси, сӣха, касса ну кхо араханто пат̣хамам̣ пат̣игган̣ханта̄ пат̣игган̣хеййум̣ – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, кинтам̣ тасса араханто пат̣хамам̣ пат̣игган̣ханта̄ пат̣игган̣хиссанти! йо ча кхо со, бханте, пурисо саддхо да̄напати ануппада̄нарато тассева араханто пат̣хамам̣ пат̣игган̣ханта̄ пат̣игган̣хеййум̣’’’.

‘‘там̣ ким̣ ман̃н̃аси, сӣха, касса ну кхо араханто пат̣хамам̣ дхаммам̣ десента̄ десеййум̣ – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, кинтам̣ тасса араханто пат̣хамам̣ дхаммам̣ десента̄ десессанти! йо ча кхо со, бханте, пурисо саддхо да̄напати ануппада̄нарато тассева араханто пат̣хамам̣ дхаммам̣ десента̄ десеййум̣’’.

‘‘там̣ ким̣ ман̃н̃аси, сӣха, касса ну кхо калйа̄н̣о киттисаддо аббхуггаччхеййа – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, кинтам̣ тасса калйа̄н̣о киттисаддо аббхуггаччхиссати! йо ча кхо со, бханте, пурисо саддхо да̄напати ануппада̄нарато тассева калйа̄н̣о киттисаддо аббхуггаччхеййа’’.

‘‘там̣ ким̣ ман̃н̃аси, сӣха, ко ну кхо йам̣йадева парисам̣ упасан̇камеййа, йади кхаттийапарисам̣ йади бра̄хман̣апарисам̣ йади гахапатипарисам̣ йади саман̣апарисам̣ виса̄радо упасан̇камеййа аман̇кубхӯто – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, ким̣ со йам̣йадева парисам̣ упасан̇камиссати, йади кхаттийапарисам̣ йади бра̄хман̣апарисам̣ йади гахапатипарисам̣ йади саман̣апарисам̣ виса̄радо упасан̇камиссати аман̇кубхӯто! йо ча кхо со, бханте, пурисо саддхо да̄напати ануппада̄нарато со йам̣йадева парисам̣ упасан̇камеййа, йади кхаттийапарисам̣ йади бра̄хман̣апарисам̣ йади гахапатипарисам̣ йади саман̣апарисам̣ виса̄радо упасан̇камеййа аман̇кубхӯто’’.

‘‘там̣ ким̣ ман̃н̃аси, сӣха, ко ну кхо ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа – ‘йо ва̄ со пурисо ассаддхо маччхарӣ кадарийо парибха̄сако, йо ва̄ со пурисо саддхо да̄напати ануппада̄нарато’’’ти? ‘‘йо со, бханте, пурисо ассаддхо маччхарӣ кадарийо парибха̄сако, ким̣ со ка̄йасса бхеда̄ парам̣ маран̣а̄ сугатим̣ саггам̣ локам̣ упападжджиссати! йо ча кхо со, бханте, пурисо саддхо да̄напати ануппада̄нарато со ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа’’.

‘‘йа̄нима̄ни, бханте, бхагавата̄ сандит̣т̣хика̄ни да̄напхала̄ни аккха̄та̄ни, на̄хам̣ еттха бхагавато саддха̄йа гаччха̄ми. ахампи ета̄ни джа̄на̄ми. ахам̣, бханте, да̄йако да̄напати, мам̣ араханто пат̣хамам̣ анукампанта̄ анукампанти. ахам̣, бханте, да̄йако да̄напати, мам̣ араханто пат̣хамам̣ упасан̇каманта̄ упасан̇каманти. ахам̣, бханте, да̄йако да̄напати, майхам̣ араханто пат̣хамам̣ пат̣игган̣ханта̄ пат̣игган̣ханти. ахам̣, бханте, да̄йако да̄напати, майхам̣ араханто пат̣хамам̣ дхаммам̣ десента̄ десенти. ахам̣, бханте, да̄йако да̄напати, майхам̣ калйа̄н̣о киттисаддо аббхуггато – ‘сӣхо сена̄пати да̄йако ка̄рако сан̇гхупат̣т̣ха̄ко’ти. ахам̣, бханте, да̄йако да̄напати йам̣йадева парисам̣ упасан̇кама̄ми, йади кхаттийапарисам̣…пе… йади саман̣апарисам̣ виса̄радо упасан̇кама̄ми аман̇кубхӯто. йа̄нима̄ни, бханте, бхагавата̄ сандит̣т̣хика̄ни да̄напхала̄ни аккха̄та̄ни, на̄хам̣ еттха бхагавато саддха̄йа гаччха̄ми. ахампи ета̄ни джа̄на̄ми. йан̃ча кхо мам̣, бханте, бхагава̄ евама̄ха – ‘да̄йако, сӣха, да̄напати ка̄йасса бхеда̄ парам̣ маран̣а̄ сугатим̣ саггам̣ локам̣ упападжджатӣ’ти. ета̄хам̣ на джа̄на̄ми, еттха ча пана̄хам̣, бхагавато саддха̄йа гаччха̄мӣ’’ти. ‘‘еваметам̣, сӣха; еваметам̣, сӣха! да̄йако, сӣха, да̄напати ка̄йасса бхеда̄ парам̣ маран̣а̄ сугатим̣ саггам̣ локам̣ упападжджатӣ’’ти. чатуттхам̣.