7. пат̣хамапат̣исамбхида̄суттам̣

38. ‘‘саттахи, бхиккхаве, дхаммехи саманна̄гато бхиккху начирассева чатассо пат̣исамбхида̄ сайам̣ абхин̃н̃а̄ саччхикатва̄ упасампаджджа вихареййа. катамехи саттахи? идха, бхиккхаве, бхиккху ‘идам̣ ме четасо лӣнатта’нти йатха̄бхӯтам̣ паджа̄на̄ти; аджджхаттам̣ сам̣кхиттам̣ ва̄ читтам̣ ‘аджджхаттам̣ ме сам̣кхиттам̣ читта’нти йатха̄бхӯтам̣ паджа̄на̄ти; бахиддха̄ виккхиттам̣ ва̄ читтам̣ ‘бахиддха̄ ме виккхиттам̣ читта’нти йатха̄бхӯтам̣ паджа̄на̄ти; тасса видита̄ ведана̄ уппаджджанти, видита̄ упат̣т̣хаханти, видита̄ аббхаттхам̣ гаччханти; видита̄ сан̃н̃а̄ уппаджджанти, видита̄ упат̣т̣хаханти, видита̄ аббхаттхам̣ гаччханти; видита̄ витакка̄ уппаджджанти, видита̄ упат̣т̣хаханти, видита̄ аббхаттхам̣ гаччханти; саппа̄йа̄саппа̄йесу кхо панасса дхаммесу хӣнаппан̣ӣтесу кан̣хасуккасаппатибха̄гесу нимиттам̣ суггахитам̣ хоти суманасикатам̣ сӯпадха̄ритам̣ суппат̣ивиддхам̣ пан̃н̃а̄йа. имехи кхо, бхиккхаве, саттахи дхаммехи саманна̄гато бхиккху начирассева чатассо пат̣исамбхида̄ сайам̣ абхин̃н̃а̄ саччхикатва̄ упасампаджджа вихареййа̄’’ти. саттамам̣.