4. дутийасаттакасуттам̣

24. [дӣ. ни. 2.138] ‘‘сатта во, бхиккхаве, апариха̄нийе дхамме десесса̄ми. там̣ сун̣а̄тха, са̄дхукам̣ манаси каротха…пе… катаме ча, бхиккхаве, сатта апариха̄нийа̄ дхамма̄?

йа̄вакӣван̃ча, бхиккхаве, бхиккхӯ на камма̄ра̄ма̄ бхависсанти, на каммарата̄, на камма̄ра̄матам̣ ануйутта̄; вуддхийева, бхиккхаве, бхиккхӯнам̣ па̄т̣икан̇кха̄, но париха̄ни.

‘‘йа̄вакӣван̃ча, бхиккхаве, бхиккхӯ на бхасса̄ра̄ма̄ бхависсанти…пе… на нидда̄ра̄ма̄ бхависсанти… на сан̇ган̣ика̄ра̄ма̄ бхависсанти… на па̄пиччха̄ бхависсанти на па̄пика̄нам̣ иччха̄нам̣ васам̣ гата̄… на па̄памитта̄ бхависсанти на па̄пасаха̄йа̄ на па̄пасампаван̇ка̄… на ораматтакена висеса̄дхигамена антара̄воса̄нам̣ а̄паджджиссанти; вуддхийева, бхиккхаве, бхиккхӯнам̣ па̄т̣икан̇кха̄, но париха̄ни.

‘‘йа̄вакӣван̃ча, бхиккхаве, име сатта апариха̄нийа̄ дхамма̄ бхиккхӯсу т̣хассанти, имесу ча саттасу апариха̄нийесу дхаммесу бхиккхӯ сандиссиссанти; вуддхийева, бхиккхаве, бхиккхӯнам̣ па̄т̣икан̇кха̄, но париха̄нӣ’’ти. чатуттхам̣.