9. атаммайасуттам̣

104. ‘‘чха, бхиккхаве, а̄нисам̣се сампассама̄нена аламева бхиккхуна̄ саббадхаммесу анодхим̣ каритва̄ анаттасан̃н̃ам̣ упат̣т̣ха̄петум̣. катаме чха? саббалоке ча атаммайо бхависса̄ми, ахан̇ка̄ра̄ ча ме упаруджджхиссанти, маман̇ка̄ра̄ ча ме упаруджджхиссанти, аса̄дха̄ран̣ена ча н̃а̄н̣ена саманна̄гато бхависса̄ми, хету ча ме судит̣т̣хо бхависсати, хетусамуппанна̄ ча дхамма̄. име кхо, бхиккхаве, чха а̄нисам̣се сампассама̄нена аламева бхиккхуна̄ саббадхаммесу анодхим̣ каритва̄ анаттасан̃н̃ам̣ упат̣т̣ха̄пету’’нти. навамам̣.