7. девата̄вагго

1. ана̄га̄мипхаласуттам̣

65. ‘‘чха, бхиккхаве, дхамме аппаха̄йа абхаббо ана̄га̄мипхалам̣ саччхика̄тум̣. катаме чха? ассаддхийам̣, ахирикам̣, аноттаппам̣, косаджджам̣, мут̣т̣хассаччам̣, дуппан̃н̃атам̣ – име кхо, бхиккхаве, чха дхамме аппаха̄йа абхаббо ана̄га̄мипхалам̣ саччхика̄тум̣.

‘‘чха, бхиккхаве, дхамме паха̄йа бхаббо ана̄га̄мипхалам̣ саччхика̄тум̣. катаме чха? ассаддхийам̣, ахирикам̣, аноттаппам̣, косаджджам̣, мут̣т̣хассаччам̣, дуппан̃н̃атам̣ – име кхо, бхиккхаве, чха дхамме паха̄йа бхаббо ана̄га̄мипхалам̣ саччхика̄ту’’нти. пат̣хамам̣.

2. арахаттасуттам̣

66. ‘‘чха, бхиккхаве, дхамме аппаха̄йа абхаббо арахаттам̣ саччхика̄тум̣. катаме чха? тхинам̣ [тхӣнам̣ (сӣ. сйа̄. кам̣. пӣ.)], миддхам̣, уддхаччам̣, куккуччам̣, ассаддхийам̣, пама̄дам̣ – име кхо, бхиккхаве, чха дхамме аппаха̄йа абхаббо арахаттам̣ саччхика̄тум̣.

‘‘чха, бхиккхаве, дхамме паха̄йа бхаббо арахаттам̣ саччхика̄тум̣. катаме чха? тхинам̣, миддхам̣, уддхаччам̣, куккуччам̣, ассаддхийам̣, пама̄дам̣ – име кхо, бхиккхаве, чха дхамме паха̄йа бхаббо арахаттам̣ саччхика̄ту’’нти. дутийам̣.

3. миттасуттам̣

67. ‘‘‘со вата, бхиккхаве, бхиккху па̄памитто па̄пасаха̄йо па̄пасампаван̇ко, па̄памитте [па̄паке митте (ка.)] севама̄но бхаджама̄но пайирупа̄сама̄но, тесан̃ча дит̣т̣ха̄нугатим̣ а̄паджджама̄но а̄бхисама̄ча̄рикам̣ дхаммам̣ парипӯрессатӣ’ти нетам̣ т̣ха̄нам̣ виджджати. ‘а̄бхисама̄ча̄рикам̣ дхаммам̣ апарипӯретва̄ секхам̣ дхаммам̣ парипӯрессатӣ’ти нетам̣ т̣ха̄нам̣ виджджати. ‘секхам̣ дхаммам̣ апарипӯретва̄ сӣла̄ни парипӯрессатӣ’ти нетам̣ т̣ха̄нам̣ виджджати. ‘сӣла̄ни апарипӯретва̄ ка̄мара̄гам̣ ва̄ рӯпара̄гам̣ ва̄ арӯпара̄гам̣ ва̄ паджахиссатӣ’ти нетам̣ т̣ха̄нам̣ виджджати.

‘‘‘со вата, бхиккхаве, бхиккху калйа̄н̣амитто калйа̄н̣асаха̄йо калйа̄н̣асампаван̇ко, калйа̄н̣амитте севама̄но бхаджама̄но пайирупа̄сама̄но, тесан̃ча дит̣т̣ха̄нугатим̣ а̄паджджама̄но а̄бхисама̄ча̄рикам̣ дхаммам̣ парипӯрессатӣ’ти т̣ха̄наметам̣ виджджати. ‘а̄бхисама̄ча̄рикам̣ дхаммам̣ парипӯретва̄ секхам̣ дхаммам̣ парипӯрессатӣ’ти т̣ха̄наметам̣ виджджати. ‘секхам̣ дхаммам̣ парипӯретва̄ сӣла̄ни парипӯрессатӣ’ти т̣ха̄наметам̣ виджджати. ‘сӣла̄ни парипӯретва̄ ка̄мара̄гам̣ ва̄ рӯпара̄гам̣ ва̄ арӯпара̄гам̣ ва̄ паджахиссатӣ’ти т̣ха̄наметам̣ виджджатӣ’’ти. татийам̣.

4. сан̇ган̣ика̄ра̄масуттам̣

68. ‘‘‘со вата, бхиккхаве, бхиккху сан̇ган̣ика̄ра̄мо сан̇ган̣икарато сан̇ган̣ика̄ра̄матам̣ ануйутто, ган̣а̄ра̄мо ган̣арато ган̣а̄ра̄матам̣ ануйутто, еко павивеке абхирамиссатӣ’ти нетам̣ т̣ха̄нам̣ виджджати. ‘еко павивеке анабхираманто читтасса нимиттам̣ гахессатӣ’ти нетам̣ т̣ха̄нам̣ виджджати. ‘читтасса нимиттам̣ аган̣ханто самма̄дит̣т̣хим̣ парипӯрессатӣ’ти нетам̣ т̣ха̄нам̣ виджджати. ‘самма̄дит̣т̣хим̣ апарипӯретва̄ самма̄сама̄дхим̣ парипӯрессатӣ’ти нетам̣ т̣ха̄нам̣ виджджати. ‘самма̄сама̄дхим̣ апарипӯретва̄ сам̣йоджана̄ни паджахиссатӣ’ти нетам̣ т̣ха̄нам̣ виджджати. ‘сам̣йоджана̄ни аппаха̄йа нибба̄нам̣ саччхикариссатӣ’ти нетам̣ т̣ха̄нам̣ виджджати.

‘‘‘со вата, бхиккхаве, бхиккху на сан̇ган̣ика̄ра̄мо на сан̇ган̣икарато на сан̇ган̣ика̄ра̄матам̣ ануйутто, на ган̣а̄ра̄мо на ган̣арато на ган̣а̄ра̄матам̣ ануйутто, еко павивеке абхирамиссатӣ’ти т̣ха̄наметам̣ виджджати. ‘еко павивеке абхираманто читтасса нимиттам̣ гахессатӣ’ти т̣ха̄наметам̣ виджджати. ‘читтасса нимиттам̣ ган̣ханто самма̄дит̣т̣хим̣ парипӯрессатӣ’ти т̣ха̄наметам̣ виджджати. ‘самма̄дит̣т̣хим̣ парипӯретва̄ самма̄сама̄дхим̣ парипӯрессатӣ’ти т̣ха̄наметам̣ виджджати. ‘самма̄сама̄дхим̣ парипӯретва̄ сам̣йоджана̄ни паджахиссатӣ’ти т̣ха̄наметам̣ виджджати. ‘сам̣йоджана̄ни паха̄йа нибба̄нам̣ саччхикариссатӣ’ти т̣ха̄наметам̣ виджджатӣ’’ти. чатуттхам̣.

5. девата̄суттам̣

69. атха кхо ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо са̄ девата̄ бхагавантам̣ етадавоча – ‘‘чхайиме, бханте, дхамма̄ бхиккхуно апариха̄на̄йа сам̣ваттанти. катаме чха? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, совачассата̄, калйа̄н̣амиттата̄ – име кхо, бханте, чха дхамма̄ бхиккхуно апариха̄на̄йа сам̣ваттантӣ’’ти. идамавоча са̄ девата̄. саманун̃н̃о саттха̄ ахоси. атха кхо са̄ девата̄ ‘‘саманун̃н̃о ме саттха̄’’ти бхагавантам̣ абхива̄детва̄ падаккхин̣ам̣ катва̄ таттхевантарадха̄йи.

атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо, бхиккхаве, са̄ девата̄ мам̣ етадавоча – ‘чхайиме, бханте, дхамма̄ бхиккхуно апариха̄на̄йа сам̣ваттанти. катаме чха? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, совачассата̄, калйа̄н̣амиттата̄ – име кхо, бханте, чха дхамма̄ бхиккхуно апариха̄на̄йа сам̣ваттантӣ’ти. идамавоча, бхиккхаве, са̄ девата̄. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йӣ’’ти.

евам̣ вутте а̄йасма̄ са̄рипутто бхагавантам̣ абхива̄детва̄ етадавоча – ‘‘имасса кхо ахам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄ми. идха, бханте, бхиккху аттана̄ ча саттхуга̄раво хоти саттхуга̄равата̄йа ча ван̣н̣ава̄дӣ. йе чан̃н̃е бхиккхӯ на саттхуга̄рава̄ те ча саттхуга̄равата̄йа сама̄дапети. йе чан̃н̃е бхиккхӯ саттхуга̄рава̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. аттана̄ ча дхаммага̄раво хоти…пе… сан̇гхага̄раво хоти… сиккха̄га̄раво хоти … сувачо хоти… калйа̄н̣амитто хоти калйа̄н̣амиттата̄йа ча ван̣н̣ава̄дӣ. йе чан̃н̃е бхиккхӯ на калйа̄н̣амитта̄ те ча калйа̄н̣амиттата̄йа сама̄дапети. йе чан̃н̃е бхиккхӯ калйа̄н̣амитта̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. имасса кхо ахам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти.

‘‘са̄дху са̄дху, са̄рипутта! са̄дху кхо твам̣, са̄рипутта, имасса майа̄ сам̣кхиттена бха̄ситасса евам̣ виттха̄рена аттхам̣ а̄джа̄на̄си. идха, са̄рипутта, бхиккху аттана̄ ча саттхуга̄раво хоти саттхуга̄равата̄йа ча ван̣н̣ава̄дӣ. йе чан̃н̃е бхиккхӯ на саттхуга̄рава̄ те ча саттхуга̄равата̄йа сама̄дапети. йе чан̃н̃е бхиккхӯ саттхуга̄рава̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. аттана̄ ча дхаммага̄раво хоти…пе… сан̇гхага̄раво хоти… сиккха̄га̄раво хоти… сувачо хоти… калйа̄н̣амитто хоти калйа̄н̣амиттата̄йа ча ван̣н̣ава̄дӣ. йе чан̃н̃е бхиккхӯ на калйа̄н̣амитта̄ те ча калйа̄н̣амиттата̄йа сама̄дапети. йе чан̃н̃е бхиккхӯ калйа̄н̣амитта̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. имасса кхо, са̄рипутта, майа̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти. пан̃чамам̣.

6. сама̄дхисуттам̣

70. ‘‘‘со вата, бхиккхаве, бхиккху на сантена сама̄дхина̄ на пан̣ӣтена на пат̣иппассаддхиладдхена [на пат̣иппассаддхаладдхена (сӣ.)] на екодибха̄ва̄дхигатена анекавихитам̣ иддхивидхам̣ паччанубхависсати – екопи хутва̄ бахудха̄ бхависсати, бахудха̄пи хутва̄ еко бхависсати…пе… йа̄ва брахмалока̄пи ка̄йена васам̣ ваттессатӣ’ти нетам̣ т̣ха̄нам̣ виджджати. ‘дибба̄йа сотадха̄туйа̄ висуддха̄йа атиккантама̄нусика̄йа убхо садде сун̣иссати – диббе ча ма̄нусе ча йе дӯре сантике ча̄’ти нетам̣ т̣ха̄нам̣ виджджати. ‘парасатта̄нам̣ парапуггала̄нам̣ четаса̄ чето паричча паджа̄ниссати – сара̄гам̣ ва̄ читтам̣ сара̄гам̣ читтанти паджа̄ниссати …пе… вимуттам̣ ва̄ читтам̣ вимуттам̣ читтанти паджа̄ниссатӣ’ти нетам̣ т̣ха̄нам̣ виджджати. ‘анекавихитам̣ пуббенива̄сам̣ ануссариссати, сеййатхидам̣ – екампи джа̄тим̣, двепи джа̄тийо…пе… ити са̄ка̄рам̣ сауддесам̣ анекавихитам̣ пуббенива̄сам̣ ануссариссатӣ’ти нетам̣ т̣ха̄нам̣ виджджати. ‘диббена чаккхуна̄ висуддхена атиккантама̄нусакена сатте пассиссати…пе… йатха̄каммӯпаге сатте паджа̄ниссатӣ’ти нетам̣ т̣ха̄нам̣ виджджати. ‘а̄сава̄нам̣ кхайа̄…пе… саччхикатва̄ упасампаджджа вихариссатӣ’ти нетам̣ т̣ха̄нам̣ виджджати.

‘‘‘со вата, бхиккхаве, бхиккху сантена сама̄дхина̄ пан̣ӣтена пат̣иппассаддхиладдхена екодибха̄ва̄дхигатена анекавихитам̣ иддхивидхам̣ паччанубхависсати…пе… йа̄ва брахмалока̄пи ка̄йена васам̣ ваттессатӣ’ти т̣ха̄наметам̣ виджджати. ‘дибба̄йа сотадха̄туйа̄ висуддха̄йа атиккантама̄нусика̄йа убхо садде сун̣иссати – диббе ча ма̄нусе ча йе дӯре сантике ча̄’ти т̣ха̄наметам̣ виджджати. ‘парасатта̄нам̣ парапуггала̄нам̣ четаса̄ чето паричча паджа̄ниссати – сара̄гам̣ ва̄ читтам̣ сара̄гам̣ читтанти паджа̄ниссати…пе… вимуттам̣ ва̄ читтам̣ вимуттам̣ читтанти паджа̄ниссатӣ’ти т̣ха̄наметам̣ виджджати. ‘анекавихитам̣ пуббенива̄сам̣ ануссариссати, сеййатхидам̣ – екампи джа̄тим̣, двепи джа̄тийо…пе… ити са̄ка̄рам̣ сауддесам̣ анекавихитам̣ пуббенива̄сам̣ ануссариссатӣ’ти т̣ха̄наметам̣ виджджати. ‘диббена чаккхуна̄ висуддхена атиккантама̄нусакена сатте пассиссати чавама̄не упападжджама̄не хӣне пан̣ӣте суван̣н̣е дуббан̣н̣е, сугате дуггате йатха̄каммӯпаге сатте паджа̄ниссатӣ’ти т̣ха̄наметам̣ виджджати. ‘а̄сава̄нам̣ кхайа̄ ана̄савам̣ четовимуттим̣…пе… саччхикатва̄ упасампаджджа вихариссатӣ’ти т̣ха̄наметам̣ виджджатӣ’’ти. чхат̣т̣хам̣.

7. саккхибхаббасуттам̣

71. ‘‘чхахи, бхиккхаве, дхаммехи саманна̄гато бхиккху абхаббо татра татрева саккхибхаббатам̣ па̄пун̣итум̣ сати сати а̄йатане. катамехи чхахи? идха, бхиккхаве, бхиккху ‘име ха̄набха̄гийа̄ дхамма̄’ти йатха̄бхӯтам̣ наппаджа̄на̄ти, ‘име т̣хитибха̄гийа̄ дхамма̄’ти йатха̄бхӯтам̣ наппаджа̄на̄ти, ‘име висесабха̄гийа̄ дхамма̄’ти йатха̄бхӯтам̣ наппаджа̄на̄ти, ‘име ниббедхабха̄гийа̄ дхамма̄’ти йатха̄бхӯтам̣ наппаджа̄на̄ти, асаккаччака̄рӣ ча хоти, асаппа̄йака̄рӣ ча. имехи кхо, бхиккхаве, чхахи дхаммехи саманна̄гато бхиккху абхаббо татра татрева саккхибхаббатам̣ па̄пун̣итум̣ сати сати а̄йатане.

‘‘чхахи, бхиккхаве, дхаммехи саманна̄гато бхиккху бхаббо татра татрева саккхибхаббатам̣ па̄пун̣итум̣ сати сати а̄йатане. катамехи чхахи? идха, бхиккхаве, бхиккху ‘име ха̄набха̄гийа̄ дхамма̄’ти йатха̄бхӯтам̣ паджа̄на̄ти, ‘име т̣хитибха̄гийа̄ дхамма̄’ти йатха̄бхӯтам̣ паджа̄на̄ти, ‘име висесабха̄гийа̄ дхамма̄’ти йатха̄бхӯтам̣ паджа̄на̄ти, ‘име ниббедхабха̄гийа̄ дхамма̄’ти йатха̄бхӯтам̣ паджа̄на̄ти, саккаччака̄рӣ ча хоти, саппа̄йака̄рӣ ча. имехи кхо, бхиккхаве, чхахи дхаммехи саманна̄гато бхиккху бхаббо татра татрева саккхибхаббатам̣ па̄пун̣итум̣ сати сати а̄йатане’’ти. саттамам̣.

8. баласуттам̣

72. ‘‘чхахи, бхиккхаве, дхаммехи саманна̄гато бхиккху абхаббо сама̄дхисмим̣ [сама̄дхимхи (ка.)] балатам̣ па̄пун̣итум̣. катамехи чхахи? идха, бхиккхаве, бхиккху на сама̄дхисса сама̄паттикусало хоти, на сама̄дхисса т̣хитикусало хоти, на сама̄дхисса [на сама̄дхимха̄ (ка.) упарисаттаканипа̄те девата̄вагге пана саббаттхапи ‘‘сама̄дхисса’’итвева диссати] вут̣т̣ха̄накусало хоти, асаккаччака̄рӣ ча хоти, аса̄таччака̄рӣ ча, асаппа̄йака̄рӣ ча. имехи кхо, бхиккхаве, чхахи дхаммехи саманна̄гато бхиккху абхаббо сама̄дхисмим̣ балатам̣ па̄пун̣итум̣.

‘‘чхахи, бхиккхаве, дхаммехи саманна̄гато бхиккху бхаббо сама̄дхисмим̣ балатам̣ па̄пун̣итум̣. катамехи чхахи? идха, бхиккхаве, бхиккху сама̄дхисса сама̄паттикусало хоти, сама̄дхисса т̣хитикусало хоти, сама̄дхисса вут̣т̣ха̄накусало хоти, саккаччака̄рӣ ча хоти, са̄таччака̄рӣ ча, саппа̄йака̄рӣ ча. имехи кхо, бхиккхаве, чхахи дхаммехи саманна̄гато бхиккху бхаббо сама̄дхисмим̣ балатам̣ па̄пун̣иту’’нти. ат̣т̣хамам̣.

9. пат̣хаматаджджха̄насуттам̣

73. ‘‘чха, бхиккхаве, дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣. катаме чха? ка̄маччхандам̣, бйа̄па̄дам̣, тхинамиддхам̣, уддхаччакуккуччам̣, вичикиччхам̣. ка̄месу кхо панасса а̄дӣнаво на йатха̄бхӯтам̣ саммаппан̃н̃а̄йа судит̣т̣хо хоти. име кхо, бхиккхаве, чха дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣.

‘‘чха, бхиккхаве, дхамме паха̄йа бхаббо пат̣хамам̣ джха̄нам̣ упасампаджджа вихаритум̣. катаме чха? ка̄маччхандам̣, бйа̄па̄дам̣, тхинамиддхам̣, уддхаччакуккуччам̣, вичикиччхам̣, ка̄месу кхо панасса а̄дӣнаво на йатха̄бхӯтам̣ саммаппан̃н̃а̄йа судит̣т̣хо хоти. име кхо, бхиккхаве, чха дхамме паха̄йа бхаббо пат̣хамам̣ джха̄нам̣ упасампаджджа вихариту’’нти. навамам̣.

10. дутийатаджджха̄насуттам̣

74. ‘‘чха, бхиккхаве, дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣. катаме чха? ка̄мавитаккам̣, бйа̄па̄давитаккам̣, вихим̣са̄витаккам̣, ка̄масан̃н̃ам̣, бйа̄па̄дасан̃н̃ам̣, вихим̣са̄сан̃н̃ам̣ – име кхо, бхиккхаве, чха дхамме аппаха̄йа абхаббо пат̣хамам̣ джха̄нам̣ упасампаджджа вихаритум̣.

‘‘чха, бхиккхаве, дхамме паха̄йа бхаббо пат̣хамам̣ джха̄нам̣ упасампаджджа вихаритум̣. катаме чха? ка̄мавитаккам̣, бйа̄па̄давитаккам̣, вихим̣са̄витаккам̣, ка̄масан̃н̃ам̣, бйа̄па̄дасан̃н̃ам̣, вихим̣са̄сан̃н̃ам̣ – име кхо, бхиккхаве, чха дхамме паха̄йа бхаббо пат̣хамам̣ джха̄нам̣ упасампаджджа вихариту’’нти. дасамам̣.

девата̄вагго саттамо. [дутийо (сйа̄. ка.)]