8. индрийасам̣варасуттам̣

50. [а. ни. 5.24, 168; 2.7.65] ‘‘индрийасам̣варе, бхиккхаве, асати индрийасам̣варавипаннасса хатӯпанисам̣ хоти сӣлам̣; сӣле асати сӣлавипаннасса хатӯпанисо хоти самма̄сама̄дхи; самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣; йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпанисо хоти ниббида̄вира̄го; ниббида̄вира̄ге асати ниббида̄вира̄гавипаннасса хатӯпанисам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄савипанно. тасса папат̣ика̄пи на па̄рипӯрим̣ гаччхати, тачопи на па̄рипӯрим̣ гаччхати, пхеггупи на па̄рипӯрим̣ гаччхати, са̄ропи на па̄рипӯрим̣ гаччхати. евамевам̣ кхо, бхиккхаве, индрийасам̣варе асати индрийасам̣варавипаннасса хатӯпанисам̣ хоти сӣлам̣…пе… вимуттин̃а̄н̣адассанам̣.

‘‘индрийасам̣варе, бхиккхаве, сати индрийасам̣варасампаннасса упанисасампаннам̣ хоти сӣлам̣; сӣле сати сӣласампаннасса упанисасампанно хоти самма̄сама̄дхи; самма̄сама̄дхимхи сати самма̄сама̄дхисампаннасса упанисасампаннам̣ хоти йатха̄бхӯтан̃а̄н̣адассанам̣; йатха̄бхӯтан̃а̄н̣адассане сати йатха̄бхӯтан̃а̄н̣адассанасампаннасса упанисасампанно хоти ниббида̄вира̄го; ниббида̄вира̄ге сати ниббида̄вира̄гасампаннасса упанисасампаннам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄сасампанно. тасса папат̣ика̄пи па̄рипӯрим̣ гаччхати, тачопи па̄рипӯрим̣ гаччхати, пхеггупи па̄рипӯрим̣ гаччхати, са̄ропи па̄рипӯрим̣ гаччхати. евамевам̣ кхо, бхиккхаве, индрийасам̣варе сати индрийасам̣варасампаннасса упанисасампаннам̣ хоти сӣлам̣…пе… вимуттин̃а̄н̣адассана’’нти. ат̣т̣хамам̣.