8. аттака̄рӣсуттам̣

38. атха кхо ан̃н̃атаро бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо со бра̄хман̣о бхагавантам̣ етадавоча – ‘‘ахан̃хи, бхо готама, евам̣ва̄дӣ евам̣дит̣т̣хи – ‘наттхи аттака̄ро, наттхи парака̄ро’’’ти. ‘‘ма̄хам̣, бра̄хман̣а, евам̣ва̄дим̣ евам̣дит̣т̣хим̣ аддасам̣ ва̄ ассосим̣ ва̄. катхан̃хи на̄ма сайам̣ абхиккаманто, сайам̣ пат̣иккаманто евам̣ ваккхати – ‘наттхи аттака̄ро, наттхи парака̄ро’’’ти!

‘‘там̣ ким̣ ман̃н̃аси, бра̄хман̣а, аттхи а̄раббхадха̄тӯ’’ти? ‘‘евам̣, бхо’’. ‘‘а̄раббхадха̄туйа̄ сати а̄раббхаванто сатта̄ пан̃н̃а̄йантӣ’’ти? ‘‘евам̣, бхо’’. ‘‘йам̣ кхо, бра̄хман̣а, а̄раббхадха̄туйа̄ сати а̄раббхаванто сатта̄ пан̃н̃а̄йанти, айам̣ сатта̄нам̣ аттака̄ро айам̣ парака̄ро’’.

‘‘там̣ ким̣ ман̃н̃аси, бра̄хман̣а, аттхи никкамадха̄ту…пе… аттхи параккамадха̄ту… аттхи тха̄мадха̄ту… аттхи т̣хитидха̄ту… аттхи упаккамадха̄тӯ’’ти? ‘‘евам̣, бхо’’. ‘‘упаккамадха̄туйа̄ сати упаккамаванто сатта̄ пан̃н̃а̄йантӣ’’ти? ‘‘евам̣, бхо’’. ‘‘йам̣ кхо, бра̄хман̣а, упаккамадха̄туйа̄ сати упаккамаванто сатта̄ пан̃н̃а̄йанти, айам̣ сатта̄нам̣ аттака̄ро айам̣ парака̄ро’’.

‘‘ма̄хам̣, бра̄хман̣а [там̣ ким̣ ман̃н̃аси бра̄хман̣а ма̄хам̣ (ка.)], евам̣ва̄дим̣ евам̣дит̣т̣хим̣ аддасам̣ ва̄ ассосим̣ ва̄. катхан̃хи на̄ма сайам̣ абхиккаманто сайам̣ пат̣иккаманто евам̣ ваккхати – ‘наттхи аттака̄ро наттхи парака̄ро’’’ти.

‘‘абхиккантам̣, бхо готама…пе… аджджатагге па̄н̣упетам̣ саран̣ам̣ гата’’нти! ат̣т̣хамам̣.