5. ануссатит̣т̣ха̄насуттам̣

25. ‘‘чхайима̄ни, бхиккхаве, ануссатит̣т̣ха̄на̄ни. катама̄ни чха? идха, бхиккхаве, арийаса̄вако татха̄гатам̣ ануссарати – ‘итипи со бхагава̄…пе… саттха̄ деваманусса̄нам̣ буддхо бхагава̄’ти. йасмим̣, бхиккхаве, самайе арийаса̄вако татха̄гатам̣ ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти, никкхантам̣ муттам̣ вут̣т̣хитам̣ гедхамха̄. ‘гедхо’ти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идампи кхо, бхиккхаве, а̄рамман̣ам̣ каритва̄ евамидхекачче сатта̄ висуджджханти.

‘‘пуна чапарам̣, бхиккхаве, арийаса̄вако дхаммам̣ ануссарати – ‘сва̄ккха̄то бхагавата̄ дхаммо…пе… паччаттам̣ ведитаббо вин̃н̃ӯхӣ’ти. йасмим̣, бхиккхаве, самайе арийаса̄вако дхаммам̣ ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти, никкхантам̣ муттам̣ вут̣т̣хитам̣ гедхамха̄. ‘гедхо’ти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идампи кхо, бхиккхаве, а̄рамман̣ам̣ каритва̄ евамидхекачче сатта̄ висуджджханти.

‘‘пуна чапарам̣, бхиккхаве, арийаса̄вако сан̇гхам̣ ануссарати – ‘суппат̣ипанно бхагавато са̄вакасан̇гхо…пе… ануттарам̣ пун̃н̃аккхеттам̣ локасса̄’ти. йасмим̣, бхиккхаве, самайе арийаса̄вако сан̇гхам̣ ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти, никкхантам̣ муттам̣ вут̣т̣хитам̣ гедхамха̄. ‘гедхо’ти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идампи кхо, бхиккхаве, а̄рамман̣ам̣ каритва̄ евамидхекачче сатта̄ висуджджханти.

‘‘пуна чапарам̣, бхиккхаве, арийаса̄вако аттано сӣла̄ни ануссарати акхан̣д̣а̄ни…пе… сама̄дхисам̣ваттаника̄ни. йасмим̣, бхиккхаве, самайе арийаса̄вако сӣлам̣ ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти, никкхантам̣ муттам̣ вут̣т̣хитам̣ гедхамха̄. ‘гедхо’ти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идампи кхо, бхиккхаве, а̄рамман̣ам̣ каритва̄ евамидхекачче сатта̄ висуджджханти.

‘‘пуна чапарам̣, бхиккхаве, арийаса̄вако аттано ча̄гам̣ ануссарати – ‘ла̄бха̄ вата ме! суладдхам̣ вата ме…пе… йа̄чайого да̄насам̣вибха̄гарато’ти. йасмим̣…пе… евамидхекачче сатта̄ висуджджханти.

‘‘пуна чапарам̣, бхиккхаве, арийаса̄вако девата̄ ануссарати – ‘санти дева̄ ча̄тумаха̄ра̄джика̄, санти дева̄ та̄ватим̣са̄, санти дева̄ йа̄ма̄, санти дева̄ тусита̄, санти дева̄ нимма̄наратино, санти дева̄ параниммитавасаваттино, санти дева̄ брахмака̄йика̄, санти дева̄ татуттари. йатха̄рӯпа̄йа саддха̄йа саманна̄гата̄ та̄ девата̄ ито чута̄ таттха упапанна̄; майхампи татха̄рӯпа̄ саддха̄ сам̣виджджати. йатха̄рӯпена сӣлена… сутена… ча̄гена… пан̃н̃а̄йа саманна̄гата̄ та̄ девата̄ ито чута̄ таттха упапанна̄; майхампи татха̄рӯпа̄ пан̃н̃а̄ сам̣виджджатӣ’’’ ти.

‘‘йасмим̣, бхиккхаве, самайе арийаса̄вако аттано ча та̄сан̃ча девата̄нам̣ саддхан̃ча сӣлан̃ча сутан̃ча ча̄ган̃ча пан̃н̃ан̃ча ануссарати невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти, никкхантам̣ муттам̣ вут̣т̣хитам̣ гедхамха̄. ‘гедхо’ти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идампи кхо, бхиккхаве, а̄рамман̣ам̣ каритва̄ евамидхекачче сатта̄ висуджджханти. има̄ни кхо, бхиккхаве, чха ануссатит̣т̣ха̄на̄нӣ’’ти. пан̃чамам̣.