1. са̄макасуттам̣

21. екам̣ самайам̣ бхагава̄ саккесу вихарати са̄мага̄маке поккхаран̣ийа̄йам̣. атха кхо ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ поккхаран̣ийам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо са̄ девата̄ бхагавантам̣ етадавоча –

‘‘тайоме, бханте, дхамма̄ бхиккхуно париха̄на̄йа сам̣ваттанти. катаме тайо? камма̄ра̄мата̄, бхасса̄ра̄мата̄, нидда̄ра̄мата̄ – име кхо, бханте, тайо дхамма̄ бхиккхуно париха̄на̄йа сам̣ваттантӣ’’ти. идамавоча са̄ девата̄. саманун̃н̃о саттха̄ ахоси. атха кхо са̄ девата̄ ‘‘саманун̃н̃о ме саттха̄’’ти бхагавантам̣ абхива̄детва̄ падаккхин̣ам̣ катва̄ таттхевантарадха̄йи.

атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ поккхаран̣ийам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо, бхиккхаве, са̄ девата̄ мам̣ етадавоча – ‘тайоме, бханте, дхамма̄ бхиккхуно париха̄на̄йа сам̣ваттанти. катаме тайо? камма̄ра̄мата̄, бхасса̄ра̄мата̄, нидда̄ра̄мата̄ – име кхо, бханте, тайо дхамма̄ бхиккхуно париха̄на̄йа сам̣ваттантӣ’ти. идамавоча, бхиккхаве, са̄ девата̄. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йи. тесам̣ во [кхо (ка.)], бхиккхаве, ала̄бха̄ тесам̣ дулладдхам̣, йе во девата̄пи джа̄нанти кусалехи дхаммехи париха̄йама̄не’’.

‘‘апарепи, бхиккхаве, тайо париха̄нийе дхамме десесса̄ми. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча – ‘‘катаме ча, бхиккхаве, тайо париха̄нийа̄ дхамма̄? сан̇ган̣ика̄ра̄мата̄, довачассата̄, па̄памиттата̄ – име кхо, бхиккхаве, тайо париха̄нийа̄ дхамма̄’’.

‘‘йе хи кечи, бхиккхаве, атӣтамаддха̄нам̣ париха̄йим̣су кусалехи дхаммехи, саббете имехева чхахи дхаммехи париха̄йим̣су кусалехи дхаммехи. йепи хи кечи, бхиккхаве, ана̄гатамаддха̄нам̣ париха̄йиссанти кусалехи дхаммехи, саббете имехева чхахи дхаммехи париха̄йиссанти кусалехи дхаммехи. йепи хи кечи, бхиккхаве, етарахи париха̄йанти кусалехи дхаммехи, саббете имехева чхахи дхаммехи париха̄йанти кусалехи дхаммехӣ’’ти. пат̣хамам̣.