10. паттапин̣д̣икасуттам̣

190. ‘‘пан̃чиме, бхиккхаве, паттапин̣д̣ика̄. катаме пан̃ча? мандатта̄ момӯхатта̄ паттапин̣д̣ико хоти, па̄пиччхо иччха̄пакато паттапин̣д̣ико хоти, умма̄да̄ читтаккхепа̄ паттапин̣д̣ико хоти, ‘ван̣н̣итам̣ буддхехи буддхаса̄вакехӣ’ти паттапин̣д̣ико хоти, аппиччхатам̣йева нисса̄йа сантут̣т̣хим̣йева нисса̄йа саллекхам̣йева нисса̄йа павивекам̣йева нисса̄йа идаматтхитам̣йева нисса̄йа паттапин̣д̣ико хоти. име кхо, бхиккхаве, пан̃ча паттапин̣д̣ика̄. имесам̣ кхо, бхиккхаве, пан̃чаннам̣ паттапин̣д̣ика̄нам̣ йва̄йам̣ паттапин̣д̣ико аппиччхатам̣йева нисса̄йа сантут̣т̣хим̣йева нисса̄йа саллекхам̣йева нисса̄йа павивекам̣йева нисса̄йа идаматтхитам̣йева нисса̄йа паттапин̣д̣ико хоти, айам̣ имесам̣ пан̃чаннам̣ паттапин̣д̣ика̄нам̣ агго ча сет̣т̣хо ча моккхо ча уттамо ча паваро ча.

‘‘сеййатха̄пи, бхиккхаве, гава̄ кхӣрам̣, кхӣрамха̄ дадхи, дадхимха̄ наванӣтам̣, наванӣтамха̄ саппи, саппимха̄ саппиман̣д̣о, саппиман̣д̣о таттха аггамаккха̄йати; евамевам̣ кхо, бхиккхаве, имесам̣ пан̃чаннам̣ паттапин̣д̣ика̄нам̣ йва̄йам̣ паттапин̣д̣ико аппиччхатам̣йева нисса̄йа сантут̣т̣хим̣йева нисса̄йа саллекхам̣йева нисса̄йа павивекам̣йева нисса̄йа идаматтхитам̣йева нисса̄йа паттапин̣д̣ико хоти, айам̣ имесам̣ пан̃чаннам̣ паттапин̣д̣ика̄нам̣ агго ча сет̣т̣хо ча моккхо ча уттамо ча паваро ча̄’’ти. дасамам̣.

аран̃н̃авагго чатуттхо.