6. пӣтисуттам̣

176. атха кхо ана̄тхапин̣д̣ико гахапати пан̃чаматтехи упа̄сакасатехи паривуто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ана̄тхапин̣д̣икам̣ гахапатим̣ бхагава̄ етадавоча –

‘‘тумхе кхо, гахапати, бхиккхусан̇гхам̣ паччупат̣т̣хита̄ чӣварапин̣д̣апа̄тасена̄санагила̄наппаччайабхесаджджапариккха̄рена. на кхо, гахапати, та̄ватакенева тут̣т̣хи каран̣ӣйа̄ – ‘майам̣ бхиккхусан̇гхам̣ паччупат̣т̣хита̄ чӣварапин̣д̣апа̄тасена̄санагила̄наппаччайабхесаджджапариккха̄рена̄’ти. тасма̄тиха, гахапати, евам̣ сиккхитаббам̣ – ‘кинти майам̣ ка̄лена ка̄лам̣ павивекам̣ пӣтим̣ упасампаджджа вихареййа̄ма̄’ти! еван̃хи во, гахапати, сиккхитабба’’нти.

евам̣ вутте а̄йасма̄ са̄рипутто бхагавантам̣ етадавоча – ‘‘аччхарийам̣, бханте, аббхутам̣, бханте! йа̄ва субха̄ситам̣ чидам̣, бханте, бхагавата̄ – ‘тумхе кхо, гахапати, бхиккхусан̇гхам̣ паччупат̣т̣хита̄ чӣварапин̣д̣апа̄тасена̄санагила̄наппаччайабхесаджджапариккха̄рена. на кхо, гахапати, та̄ватакенева тут̣т̣хи каран̣ӣйа̄ – майам̣ бхиккхусан̇гхам̣ паччупат̣т̣хита̄ чӣварапин̣д̣апа̄тасена̄санагила̄наппаччайабхесаджджапариккха̄рена̄ти. тасма̄тиха, гахапати, евам̣ сиккхитаббам̣ – кинти майам̣ ка̄лена ка̄лам̣ павивекам̣ пӣтим̣ упасампаджджа вихареййа̄ма̄ти! еван̃хи во, гахапати, сиккхитабба’нти. йасмим̣, бханте, самайе арийаса̄вако павивекам̣ пӣтим̣ упасампаджджа вихарати, пан̃часса т̣ха̄на̄ни тасмим̣ самайе на хонти. йамписса ка̄мӯпасам̣хитам̣ дуккхам̣ доманассам̣, тамписса тасмим̣ самайе на хоти. йамписса ка̄мӯпасам̣хитам̣ сукхам̣ соманассам̣, тамписса тасмим̣ самайе на хоти. йамписса акусалӯпасам̣хитам̣ дуккхам̣ доманассам̣, тамписса тасмим̣ самайе на хоти. йамписса акусалӯпасам̣хитам̣ сукхам̣ соманассам̣, тамписса тасмим̣ самайе на хоти. йамписса кусалӯпасам̣хитам̣ дуккхам̣ доманассам̣, тамписса тасмим̣ самайе на хоти. йасмим̣, бханте, самайе арийаса̄вако павивекам̣ пӣтим̣ упасампаджджа вихарати, има̄нисса пан̃ча [има̄ни пан̃часса (сйа̄. кам̣.)] т̣ха̄на̄ни тасмим̣ самайе на хонтӣ’’ти.

‘‘са̄дху са̄дху, са̄рипутта! йасмим̣, са̄рипутта, самайе арийаса̄вако павивекам̣ пӣтим̣ упасампаджджа вихарати, пан̃часса т̣ха̄на̄ни тасмим̣ самайе на хонти. йамписса ка̄мӯпасам̣хитам̣ дуккхам̣ доманассам̣, тамписса тасмим̣ самайе на хоти. йамписса ка̄мӯпасам̣хитам̣ сукхам̣ соманассам̣, тамписса тасмим̣ самайе на хоти. йамписса акусалӯпасам̣хитам̣ дуккхам̣ доманассам̣, тамписса тасмим̣ самайе на хоти. йамписса акусалӯпасам̣хитам̣ сукхам̣ соманассам̣, тамписса тасмим̣ самайе на хоти. йамписса кусалӯпасам̣хитам̣ дуккхам̣ доманассам̣, тамписса тасмим̣ самайе на хоти. йасмим̣, са̄рипутта, самайе арийаса̄вако павивекам̣ пӣтим̣ упасампаджджа вихарати, има̄нисса [има̄неттха (сӣ.)] пан̃ча т̣ха̄на̄ни тасмим̣ самайе на хонтӣ’’ти. чхат̣т̣хам̣.