9. уда̄йӣсуттам̣

159. евам̣ ме сутам̣ – екам̣ самайам̣ бхагава̄ косамбийам̣ вихарати гхосита̄ра̄ме. тена кхо пана самайена а̄йасма̄ уда̄йӣ махатийа̄ гихипариса̄йа паривуто дхаммам̣ десенто нисинно хоти. аддаса̄ кхо а̄йасма̄ а̄нандо а̄йасмантам̣ уда̄йим̣ махатийа̄ гихипариса̄йа паривутам̣ дхаммам̣ десентам̣ нисиннам̣. дисва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘а̄йасма̄, бханте, уда̄йӣ махатийа̄ гихипариса̄йа паривуто дхаммам̣ десетӣ’’ти [десенто нисинно’’ти (сйа̄.)].

‘‘на кхо, а̄нанда, сукарам̣ паресам̣ дхаммам̣ десетум̣. паресам̣, а̄нанда, дхаммам̣ десентена пан̃ча дхамме аджджхаттам̣ упат̣т̣ха̄петва̄ паресам̣ дхаммо десетаббо. катаме пан̃ча? ‘анупуббим̣ катхам̣ [а̄нупуббикатхам̣ (сӣ.), анупуббикатхам̣ (сйа̄. пӣ. ка.)] катхесса̄мӣ’ти паресам̣ дхаммо десетаббо; ‘парийа̄йадасса̄вӣ катхам̣ катхесса̄мӣ’ти паресам̣ дхаммо десетаббо; ‘ануддайатам̣ пат̣ичча катхам̣ катхесса̄мӣ’ти паресам̣ дхаммо десетаббо; ‘на а̄мисантаро катхам̣ катхесса̄мӣ’ти паресам̣ дхаммо десетаббо; ‘атта̄нан̃ча паран̃ча анупахачча катхам̣ катхесса̄мӣ’ти паресам̣ дхаммо десетаббо. на кхо, а̄нанда, сукарам̣ паресам̣ дхаммам̣ десетум̣. паресам̣, а̄нанда, дхаммам̣ десентена име пан̃ча дхамме аджджхаттам̣ упат̣т̣ха̄петва̄ паресам̣ дхаммо десетаббо’’ти. навамам̣.