1. гила̄насуттам̣

121. екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо бхагава̄ са̄йанхасамайам̣ пат̣исалла̄на̄ вут̣т̣хито йена гила̄наса̄ла̄ тенупасан̇ками. аддаса̄ кхо бхагава̄ ан̃н̃атарам̣ бхиккхум̣ дуббалам̣ гила̄накам̣; дисва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси –

‘‘йам̣ кин̃чи [йам̣ кин̃чи (сйа̄. кам̣.)], бхиккхаве, бхиккхум̣ дуббалам̣ [бхиккхаве дуббалам̣ (сӣ. сйа̄. кам̣. пӣ.)] гила̄накам̣ пан̃ча дхамма̄ на виджаханти, тассетам̣ па̄т̣икан̇кхам̣ – ‘начирассева а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихариссатӣ’’’ти.

‘‘катаме пан̃ча? идха, бхиккхаве, бхиккху асубха̄нупассӣ ка̄йе вихарати, а̄ха̄ре пат̣икӯласан̃н̃ӣ, саббалоке анабхиратасан̃н̃ӣ [саббаттхапи евамева диссати], саббасан̇кха̄ресу аничча̄нупассӣ, маран̣асан̃н̃а̄ кхо панасса аджджхаттам̣ сӯпат̣т̣хита̄ хоти. йам̣ кин̃чи, бхиккхаве, бхиккхум̣ дуббалам̣ гила̄накам̣ име пан̃ча дхамма̄ на виджаханти, тассетам̣ па̄т̣икан̇кхам̣ – ‘начирассева а̄сава̄нам̣ кхайа̄…пе… саччхикатва̄ упасампаджджа вихариссатӣ’’’ти. пат̣хамам̣.