7. абхин̣хапаччавеккхитаббат̣ха̄насуттам̣

57. ‘‘пан̃чима̄ни, бхиккхаве, т̣ха̄на̄ни абхин̣хам̣ паччавеккхитабба̄ни иттхийа̄ ва̄ пурисена ва̄ гахат̣т̣хена ва̄ паббаджитена ва̄. катама̄ни пан̃ча? ‘джара̄дхаммомхи, джарам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄. ‘бйа̄дхидхаммомхи, бйа̄дхим̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄. ‘маран̣адхаммомхи, маран̣ам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄. ‘саббехи ме пийехи мана̄пехи на̄на̄бха̄во вина̄бха̄во’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄. ‘каммассакомхи, каммада̄йа̄до каммайони каммабандху каммапат̣исаран̣о. йам̣ каммам̣ карисса̄ми – калйа̄н̣ам̣ ва̄ па̄пакам̣ ва̄ – тасса да̄йа̄до бхависса̄мӣ’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘кин̃ча, бхиккхаве, аттхавасам̣ пат̣ичча ‘джара̄дхаммомхи, джарам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄? аттхи, бхиккхаве, сатта̄нам̣ йоббане йоббанамадо, йена мадена матта̄ ка̄йена дуччаритам̣ чаранти, ва̄ча̄йа дуччаритам̣ чаранти, манаса̄ дуччаритам̣ чаранти. тасса там̣ т̣ха̄нам̣ абхин̣хам̣ паччавеккхато йо йоббане йоббанамадо со саббасо ва̄ пахӣйати тану ва̄ пана хоти. идам̣ кхо, бхиккхаве, аттхавасам̣ пат̣ичча ‘джара̄дхаммомхи, джарам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘кин̃ча, бхиккхаве, аттхавасам̣ пат̣ичча ‘бйа̄дхидхаммомхи, бйа̄дхим̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄? аттхи, бхиккхаве, сатта̄нам̣ а̄рогйе а̄рогйамадо, йена мадена матта̄ ка̄йена дуччаритам̣ чаранти, ва̄ча̄йа дуччаритам̣ чаранти, манаса̄ дуччаритам̣ чаранти. тасса там̣ т̣ха̄нам̣ абхин̣хам̣ паччавеккхато йо а̄рогйе а̄рогйамадо со саббасо ва̄ пахӣйати тану ва̄ пана хоти. идам̣ кхо, бхиккхаве, аттхавасам̣ пат̣ичча ‘бйа̄дхидхаммомхи, бйа̄дхим̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘кин̃ча, бхиккхаве, аттхавасам̣ пат̣ичча ‘маран̣адхаммомхи, маран̣ам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄? аттхи, бхиккхаве, сатта̄нам̣ джӣвите джӣвитамадо, йена мадена матта̄ ка̄йена дуччаритам̣ чаранти, ва̄ча̄йа дуччаритам̣ чаранти, манаса̄ дуччаритам̣ чаранти. тасса там̣ т̣ха̄нам̣ абхин̣хам̣ паччавеккхато йо джӣвите джӣвитамадо со саббасо ва̄ пахӣйати тану ва̄ пана хоти. идам̣ кхо, бхиккхаве, аттхавасам̣ пат̣ичча ‘маран̣адхаммомхи, маран̣ам̣ анатӣто’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘кин̃ча, бхиккхаве, аттхавасам̣ пат̣ичча ‘саббехи ме пийехи мана̄пехи на̄на̄бха̄во вина̄бха̄во’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄? аттхи, бхиккхаве, сатта̄нам̣ пийесу мана̄песу йо чхандара̄го йена ра̄гена ратта̄ ка̄йена дуччаритам̣ чаранти, ва̄ча̄йа дуччаритам̣ чаранти, манаса̄ дуччаритам̣ чаранти. тасса там̣ т̣ха̄нам̣ абхин̣хам̣ паччавеккхато йо пийесу мана̄песу чхандара̄го со саббасо ва̄ пахӣйати тану ва̄ пана хоти. идам̣ кхо, бхиккхаве, аттхавасам̣ пат̣ичча ‘саббехи ме пийехи мана̄пехи на̄на̄бха̄во вина̄бха̄во’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘кин̃ча, бхиккхаве, аттхавасам̣ пат̣ичча ‘каммассакомхи, каммада̄йа̄до каммайони каммабандху каммапат̣исаран̣о, йам̣ каммам̣ карисса̄ми – калйа̄н̣ам̣ ва̄ па̄пакам̣ ва̄ – тасса да̄йа̄до бхависса̄мӣ’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄? аттхи, бхиккхаве, сатта̄нам̣ ка̄йадуччаритам̣ вачӣдуччаритам̣ манодуччаритам̣. тасса там̣ т̣ха̄нам̣ абхин̣хам̣ паччавеккхато саббасо ва̄ дуччаритам̣ пахӣйати тану ва̄ пана хоти. идам̣ кхо, бхиккхаве, аттхавасам̣ пат̣ичча ‘каммассакомхи, каммада̄йа̄до каммайони каммабандху каммапат̣исаран̣о, йам̣ каммам̣ карисса̄ми – калйа̄н̣ам̣ ва̄ па̄пакам̣ ва̄ – тасса да̄йа̄до бхависса̄мӣ’ти абхин̣хам̣ паччавеккхитаббам̣ иттхийа̄ ва̄ пурисена ва̄ гахат̣т̣хена ва̄ паббаджитена ва̄.

‘‘са кхо [саче (пӣ. ка.)] со, бхиккхаве, арийаса̄вако ити пат̣исан̃чиккхати – ‘на кхо ахан̃н̃евеко джара̄дхаммо [ахан̃чевеко джара̄дхаммомхи (ка.)] джарам̣ анатӣто, атха кхо йа̄вата̄ сатта̄нам̣ а̄гати гати чути упапатти саббе сатта̄ джара̄дхамма̄ джарам̣ анатӣта̄’ти. тасса там̣ т̣ха̄нам̣ абхин̣хам̣ паччавеккхато магго сан̃джа̄йати. со там̣ маггам̣ а̄севати бха̄вети бахулӣкароти. тасса там̣ маггам̣ а̄севато бха̄вайато бахулӣкарото сам̣йоджана̄ни саббасо пахӣйанти анусайа̄ бйантӣхонти.

‘‘са кхо со, бхиккхаве, арийаса̄вако ити пат̣исан̃чиккхати – ‘на кхо ахан̃н̃евеко бйа̄дхидхаммо бйа̄дхим̣ анатӣто, атха кхо йа̄вата̄ сатта̄нам̣ а̄гати гати чути упапатти саббе сатта̄ бйа̄дхидхамма̄ бйа̄дхим̣ анатӣта̄’ти. тасса там̣ т̣ха̄нам̣ абхин̣хам̣ паччавеккхато магго сан̃джа̄йати. со там̣ маггам̣ а̄севати бха̄вети бахулӣкароти. тасса там̣ маггам̣ а̄севато бха̄вайато бахулӣкарото сам̣йоджана̄ни саббасо пахӣйанти, анусайа̄ бйантӣхонти.

‘‘са кхо со, бхиккхаве, арийаса̄вако ити пат̣исан̃чиккхати – ‘на кхо ахан̃н̃евеко маран̣адхаммо маран̣ам̣ анатӣто, атха кхо йа̄вата̄ сатта̄нам̣ а̄гати гати чути упапатти саббе сатта̄ маран̣адхамма̄ маран̣ам̣ анатӣта̄’ти. тасса там̣ т̣ха̄нам̣ абхин̣хам̣ паччавеккхато магго сан̃джа̄йати. со там̣ маггам̣ а̄севати бха̄вети бахулӣкароти. тасса там̣ маггам̣ а̄севато бха̄вайато бахулӣкарото сам̣йоджана̄ни саббасо пахӣйанти, анусайа̄ бйантӣхонти.

‘‘са кхо со, бхиккхаве, арийаса̄вако ити пат̣исан̃чиккхати – ‘на кхо майхевекасса саббехи пийехи мана̄пехи на̄на̄бха̄во вина̄бха̄во, атха кхо йа̄вата̄ сатта̄нам̣ а̄гати гати чути упапатти саббесам̣ сатта̄нам̣ пийехи мана̄пехи на̄на̄бха̄во вина̄бха̄во’ти. тасса там̣ т̣ха̄нам̣ абхин̣хам̣ паччавеккхато магго сан̃джа̄йати. со там̣ маггам̣ а̄севати бха̄вети бахулӣкароти. тасса там̣ маггам̣ а̄севато бха̄вайато бахулӣкарото сам̣йоджана̄ни саббасо пахӣйанти, анусайа̄ бйантӣхонти.

‘‘са кхо со, бхиккхаве, арийаса̄вако ити пат̣исан̃чиккхати – ‘на кхо ахан̃н̃евеко каммассако каммада̄йа̄до каммайони каммабандху каммаппат̣исаран̣о, йам̣ каммам̣ карисса̄ми – калйа̄н̣ам̣ ва̄ па̄пакам̣ ва̄ – тасса да̄йа̄до бхависса̄ми; атха кхо йа̄вата̄ сатта̄нам̣ а̄гати гати чути упапатти саббе сатта̄ каммассака̄ каммада̄йа̄да̄ каммайони каммабандху каммаппат̣исаран̣а̄, йам̣ каммам̣ кариссанти – калйа̄н̣ам̣ ва̄ па̄пакам̣ ва̄ – тасса да̄йа̄да̄ бхависсантӣ’ти. тасса там̣ т̣ха̄нам̣ абхин̣хам̣ паччавеккхато магго сан̃джа̄йати. со там̣ маггам̣ а̄севати бха̄вети бахулӣкароти. тасса там̣ маггам̣ а̄севато бха̄вайато бахулӣкарото сам̣йоджана̄ни саббасо пахӣйанти, анусайа̄ бйантӣхонтӣ’’ти.

‘‘бйа̄дхидхамма̄ джара̄дхамма̄, атхо маран̣адхаммино;

йатха̄ дхамма̄ татха̄ сатта̄ [санта̄ (сйа̄. кам̣.)], джигуччханти путхуджджана̄.

‘‘ахан̃че там̣ джигуччхеййам̣, евам̣ дхаммесу па̄н̣ису;

на метам̣ патирӯпасса, мама евам̣ виха̄рино.

‘‘сохам̣ евам̣ вихаранто, н̃атва̄ дхаммам̣ нирӯпадхим̣;

а̄рогйе йоббанасмин̃ча, джӣвитасмин̃ча йе мада̄.

‘‘саббе маде абхибхосми, неккхаммам̣ дат̣т̣ху кхемато [неккхамме дат̣т̣ху кхематам̣ (а. ни. 3.39) убхайаттхапи ат̣т̣хакатха̄йа самети];

тасса ме аху усса̄хо, нибба̄нам̣ абхипассато.

‘‘на̄хам̣ бхаббо етарахи, ка̄ма̄ни пат̣исевитум̣;

аниватти [аниваттӣ (?)] бхависса̄ми, брахмачарийапара̄йан̣о’’ти. саттамам̣;