7. сама̄дхисуттам̣

27. ‘‘сама̄дхим̣, бхиккхаве, бха̄ветха аппама̄н̣ам̣ нипака̄ патиссата̄. сама̄дхим̣, бхиккхаве, бха̄вайатам̣ аппама̄н̣ам̣ нипака̄нам̣ патиссата̄нам̣ пан̃ча н̃а̄н̣а̄ни паччаттан̃н̃ева уппаджджанти. катама̄ни пан̃ча? ‘айам̣ сама̄дхи паччуппаннасукхо чева а̄йатин̃ча сукхавипа̄ко’ти паччаттан̃н̃ева н̃а̄н̣ам̣ уппаджджати, ‘айам̣ сама̄дхи арийо нира̄мисо’ти паччаттан̃н̃ева н̃а̄н̣ам̣ уппаджджати, ‘айам̣ сама̄дхи ака̄пурисасевито’ти [маха̄пурисасевитоти (ка.)] паччаттан̃н̃ева н̃а̄н̣ам̣ уппаджджати, ‘айам̣ сама̄дхи санто пан̣ӣто пат̣иппассаддхаладдхо екодибха̄ва̄дхигато, на сан̇кха̄раниггайхава̄ритагато’ти [на ча сасан̇кха̄раниггайхава̄ритаппатитоти (сӣ.), на ча сасан̇кха̄раниггайхава̄ритапаттоти (сйа̄.), на ча сасан̇кха̄раниггайхава̄рива̄ват̣оти (ка.), на сасан̇кха̄раниггайхава̄рийа̄дхигатоти (?) дӣ. ни. 3.355; а. ни. 3.102; 9.27] паччаттан̃н̃ева н̃а̄н̣ам̣ уппаджджати, ‘сато кхо пана̄хам̣ имам̣ сама̄паджджа̄ми сато вут̣т̣хаха̄мӣ’ти [со кхо пана̄хам̣ имам̣ сама̄дхим̣ сатова сама̄паджджа̄ми, сато ут̣т̣хаха̄мӣти (сӣ. сйа̄. кам̣.)] паччаттан̃н̃ева н̃а̄н̣ам̣ уппаджджати.

‘‘сама̄дхим̣, бхиккхаве, бха̄ветха аппама̄н̣ам̣ нипака̄ патиссата̄. сама̄дхим̣, бхиккхаве, бха̄вайатам̣ аппама̄н̣ам̣ нипака̄нам̣ патиссата̄нам̣ има̄ни пан̃ча н̃а̄н̣а̄ни паччаттан̃н̃ева уппаджджантӣ’’ти. саттамам̣.