1. анануссутасуттам̣

11. ‘‘пубба̄хам̣, бхиккхаве, анануссутесу дхаммесу абхин̃н̃а̄воса̄напа̄рамиппатто пат̣иджа̄на̄ми. пан̃чима̄ни, бхиккхаве, татха̄гатасса татха̄гатабала̄ни, йехи балехи саманна̄гато татха̄гато а̄сабхам̣ т̣ха̄нам̣ пат̣иджа̄на̄ти, париса̄су сӣхана̄дам̣ надати, брахмачаккам̣ паваттети. катама̄ни пан̃ча? саддха̄балам̣, хирӣбалам̣, оттаппабалам̣, вӣрийабалам̣, пан̃н̃а̄балам̣ – има̄ни кхо, бхиккхаве, пан̃ча татха̄гатасса татха̄гатабала̄ни йехи балехи саманна̄гато татха̄гато а̄сабхам̣ т̣ха̄нам̣ пат̣иджа̄на̄ти, париса̄су сӣхана̄дам̣ надати, брахмачаккам̣ паваттетӣ’’ти. пат̣хамам̣.