2. балавагго

1. анануссутасуттам̣

11. ‘‘пубба̄хам̣, бхиккхаве, анануссутесу дхаммесу абхин̃н̃а̄воса̄напа̄рамиппатто пат̣иджа̄на̄ми. пан̃чима̄ни, бхиккхаве, татха̄гатасса татха̄гатабала̄ни, йехи балехи саманна̄гато татха̄гато а̄сабхам̣ т̣ха̄нам̣ пат̣иджа̄на̄ти, париса̄су сӣхана̄дам̣ надати, брахмачаккам̣ паваттети. катама̄ни пан̃ча? саддха̄балам̣, хирӣбалам̣, оттаппабалам̣, вӣрийабалам̣, пан̃н̃а̄балам̣ – има̄ни кхо, бхиккхаве, пан̃ча татха̄гатасса татха̄гатабала̄ни йехи балехи саманна̄гато татха̄гато а̄сабхам̣ т̣ха̄нам̣ пат̣иджа̄на̄ти, париса̄су сӣхана̄дам̣ надати, брахмачаккам̣ паваттетӣ’’ти. пат̣хамам̣.

2. кӯт̣асуттам̣

12. ‘‘пан̃чима̄ни, бхиккхаве, секхабала̄ни. катама̄ни пан̃ча? саддха̄балам̣, хирӣбалам̣, оттаппабалам̣, вӣрийабалам̣, пан̃н̃а̄балам̣ – има̄ни кхо, бхиккхаве, пан̃ча секхабала̄ни. имесам̣ кхо, бхиккхаве, пан̃чаннам̣ секхабала̄нам̣ етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ пан̃н̃а̄балам̣.

‘‘сеййатха̄пи, бхиккхаве, кӯт̣а̄га̄расса етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ кӯт̣ам̣. евамевам̣ кхо, бхиккхаве, имесам̣ пан̃чаннам̣ секхабала̄нам̣ етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ пан̃н̃а̄балам̣.

‘‘тасма̄тиха, бхиккхаве, евам̣ сиккхитаббам̣ – ‘саддха̄балена саманна̄гата̄ бхависса̄ма секхабалена, хирӣбалена… оттаппабалена… вӣрийабалена… пан̃н̃а̄балена саманна̄гата̄ бхависса̄ма секхабалена̄’ти. еван̃хи во, бхиккхаве, сиккхитабба’’нти. дутийам̣.

3. сам̣кхиттасуттам̣

13. ‘‘пан̃чима̄ни, бхиккхаве, бала̄ни. катама̄ни пан̃ча? саддха̄балам̣, вӣрийабалам̣, сатибалам̣, сама̄дхибалам̣, пан̃н̃а̄балам̣ – има̄ни кхо, бхиккхаве, пан̃ча бала̄нӣ’’ти. татийам̣.

4. виттхатасуттам̣

14. ‘‘пан̃чима̄ни, бхиккхаве, бала̄ни. катама̄ни пан̃ча? саддха̄балам̣, вӣрийабалам̣, сатибалам̣, сама̄дхибалам̣, пан̃н̃а̄балам̣.

‘‘катаман̃ча, бхиккхаве, саддха̄балам̣? идха, бхиккхаве, арийаса̄вако саддхо хоти, саддахати татха̄гатасса бодхим̣ – ‘итипи со бхагава̄ арахам̣ самма̄самбуддхо виджджа̄чаран̣асампанно сугато локавидӯ ануттаро пурисадаммаса̄ратхи саттха̄ деваманусса̄нам̣ буддхо бхагава̄’ти. идам̣ вуччати, бхиккхаве, саддха̄балам̣.

‘‘катаман̃ча, бхиккхаве, вӣрийабалам̣? идха, бхиккхаве, арийаса̄вако а̄раддхавӣрийо вихарати акусала̄нам̣ дхамма̄нам̣ паха̄на̄йа, кусала̄нам̣ дхамма̄нам̣ упасампада̄йа тха̄мава̄ дал̣хапараккамо аниккхиттадхуро кусалесу дхаммесу. идам̣ вуччати, бхиккхаве, вӣрийабалам̣.

‘‘катаман̃ча, бхиккхаве, сатибалам̣? идха, бхиккхаве, арийаса̄вако сатима̄ хоти парамена сатинепаккена саманна̄гато, чиракатампи чирабха̄ситампи сарита̄ ануссарита̄. идам̣ вуччати, бхиккхаве, сатибалам̣.

‘‘катаман̃ча, бхиккхаве, сама̄дхибалам̣? идха, бхиккхаве, арийаса̄вако вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати; витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихарати; пӣтийа̄ ча вира̄га̄ упеккхако ча вихарати сато ча сампаджа̄но сукхан̃ча ка̄йена пат̣исам̣ведети йам̣ там̣ арийа̄ а̄чиккханти – ‘упеккхако сатима̄ сукхавиха̄рӣ’ти татийам̣ джха̄нам̣ упасампаджджа вихарати; сукхасса ча паха̄на̄ дуккхасса ча паха̄на̄ пуббева соманассадоманасса̄нам̣ аттхан̇гама̄ адуккхамасукхам̣ упеккха̄сатипа̄рисуддхим̣ чатуттхам̣ джха̄нам̣ упасампаджджа вихарати. идам̣ вуччати, бхиккхаве, сама̄дхибалам̣.

‘‘катаман̃ча, бхиккхаве, пан̃н̃а̄балам̣? идха, бхиккхаве, арийаса̄вако пан̃н̃ава̄ хоти удайаттхага̄минийа̄ пан̃н̃а̄йа саманна̄гато арийа̄йа ниббедхика̄йа самма̄ дуккхаккхайага̄минийа̄. идам̣ вуччати, бхиккхаве, пан̃н̃а̄балам̣. има̄ни кхо, бхиккхаве, пан̃ча бала̄нӣ’’ти. чатуттхам̣.

5. дат̣т̣хаббасуттам̣

15. ‘‘пан̃чима̄ни, бхиккхаве, бала̄ни. катама̄ни пан̃ча? саддха̄балам̣, вӣрийабалам̣, сатибалам̣, сама̄дхибалам̣, пан̃н̃а̄балам̣. каттха ча, бхиккхаве, саддха̄балам̣ дат̣т̣хаббам̣? чатӯсу сота̄паттийан̇гесу. еттха саддха̄балам̣ дат̣т̣хаббам̣. каттха ча, бхиккхаве, вӣрийабалам̣ дат̣т̣хаббам̣? чатӯсу саммаппадха̄несу. еттха вӣрийабалам̣ дат̣т̣хаббам̣. каттха ча, бхиккхаве, сатибалам̣ дат̣т̣хаббам̣? чатӯсу сатипат̣т̣ха̄несу. еттха сатибалам̣ дат̣т̣хаббам̣. каттха ча, бхиккхаве, сама̄дхибалам̣ дат̣т̣хаббам̣? чатӯсу джха̄несу. еттха сама̄дхибалам̣ дат̣т̣хаббам̣. каттха ча, бхиккхаве, пан̃н̃а̄балам̣ дат̣т̣хаббам̣? чатӯсу арийасаччесу. еттха пан̃н̃а̄балам̣ дат̣т̣хаббам̣. има̄ни кхо, бхиккхаве, пан̃ча бала̄нӣ’’ти. пан̃чамам̣.

6. пунакӯт̣асуттам̣

16. ‘‘пан̃чима̄ни, бхиккхаве, бала̄ни. катама̄ни пан̃ча? саддха̄балам̣, вӣрийабалам̣, сатибалам̣, сама̄дхибалам̣, пан̃н̃а̄балам̣ – има̄ни кхо, бхиккхаве, пан̃ча бала̄ни. имесам̣ кхо, бхиккхаве, пан̃чаннам̣ бала̄нам̣ етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ пан̃н̃а̄балам̣. сеййатха̄пи, бхиккхаве, кӯт̣а̄га̄расса етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ кӯт̣ам̣. евамевам̣ кхо, бхиккхаве, имесам̣ пан̃чаннам̣ бала̄нам̣ етам̣ аггам̣ етам̣ сан̇га̄хикам̣ етам̣ сан̇гха̄танийам̣, йадидам̣ пан̃н̃а̄бала’’нти. чхат̣т̣хам̣.

7. пат̣хамахитасуттам̣

17. ‘‘пан̃чахи, бхиккхаве, дхаммехи саманна̄гато бхиккху аттахита̄йа пат̣ипанно хоти, но парахита̄йа. катамехи пан̃чахи? идха, бхиккхаве, бхиккху аттана̄ сӣласампанно хоти, но парам̣ сӣласампада̄йа сама̄дапети; аттана̄ сама̄дхисампанно хоти, но парам̣ сама̄дхисампада̄йа сама̄дапети; аттана̄ пан̃н̃а̄сампанно хоти, но парам̣ пан̃н̃а̄сампада̄йа сама̄дапети; аттана̄ вимуттисампанно хоти, но парам̣ вимуттисампада̄йа сама̄дапети; аттана̄ вимуттин̃а̄н̣адассанасампанно хоти, но парам̣ вимуттин̃а̄н̣адассанасампада̄йа сама̄дапети. имехи кхо, бхиккхаве, пан̃чахи ан̇гехи саманна̄гато бхиккху аттахита̄йа пат̣ипанно хоти, но парахита̄йа̄’’ти. саттамам̣.

8. дутийахитасуттам̣

18. ‘‘пан̃чахи, бхиккхаве, дхаммехи саманна̄гато бхиккху парахита̄йа пат̣ипанно хоти, но аттахита̄йа. катамехи пан̃чахи? идха, бхиккхаве, бхиккху аттана̄ на сӣласампанно хоти, парам̣ сӣласампада̄йа сама̄дапети; аттана̄ на сама̄дхисампанно хоти, парам̣ сама̄дхисампада̄йа сама̄дапети; аттана̄ на пан̃н̃а̄сампанно хоти, парам̣ пан̃н̃а̄сампада̄йа сама̄дапети; аттана̄ на вимуттисампанно хоти, парам̣ вимуттисампада̄йа сама̄дапети; аттана̄ на вимуттин̃а̄н̣адассанасампанно хоти, парам̣ вимуттин̃а̄н̣адассанасампада̄йа сама̄дапети. имехи кхо, бхиккхаве, пан̃чахи дхаммехи саманна̄гато бхиккху парахита̄йа пат̣ипанно хоти, но аттахита̄йа̄’’ти. ат̣т̣хамам̣.

9. татийахитасуттам̣

19. ‘‘пан̃чахи, бхиккхаве, дхаммехи саманна̄гато бхиккху нева аттахита̄йа пат̣ипанно хоти, но парахита̄йа. катамехи пан̃чахи? идха, бхиккхаве, бхиккху аттана̄ на сӣласампанно хоти, но парам̣ сӣласампада̄йа сама̄дапети; аттана̄ на сама̄дхисампанно хоти, но парам̣ сама̄дхисампада̄йа сама̄дапети; аттана̄ на пан̃н̃а̄сампанно хоти, но парам̣ пан̃н̃а̄сампада̄йа сама̄дапети; аттана̄ на вимуттисампанно хоти, но парам̣ вимуттисампада̄йа сама̄дапети; аттана̄ на вимуттин̃а̄н̣адассанасампанно хоти, но парам̣ вимуттин̃а̄н̣адассанасампада̄йа сама̄дапети. имехи кхо, бхиккхаве, пан̃чахи дхаммехи саманна̄гато бхиккху нева аттахита̄йа пат̣ипанно хоти, но парахита̄йа̄’’ти. навамам̣.

10. чатуттхахитасуттам̣

20. ‘‘пан̃чахи, бхиккхаве, дхаммехи саманна̄гато бхиккху аттахита̄йа ча пат̣ипанно хоти парахита̄йа ча. катамехи пан̃чахи? идха, бхиккхаве, бхиккху аттана̄ ча сӣласампанно хоти, паран̃ча сӣласампада̄йа сама̄дапети; аттана̄ ча сама̄дхисампанно хоти, паран̃ча сама̄дхисампада̄йа сама̄дапети, аттана̄ ча пан̃н̃а̄сампанно хоти, паран̃ча пан̃н̃а̄сампада̄йа сама̄дапети; аттана̄ ча вимуттисампанно хоти, паран̃ча вимуттисампада̄йа сама̄дапети; аттана̄ ча вимуттин̃а̄н̣адассанасампанно хоти, паран̃ча вимуттин̃а̄н̣адассанасампада̄йа сама̄дапети. имехи кхо, бхиккхаве, пан̃чахи дхаммехи саманна̄гато бхиккху аттахита̄йа ча пат̣ипанно хоти парахита̄йа ча̄’’ти. дасамам̣.

балавагго дутийо.