1. сам̣кхиттасуттам̣

1. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘пан̃чима̄ни, бхиккхаве, секхабала̄ни [секкхабала̄ни (ка.)]. катама̄ни пан̃ча? саддха̄балам̣, хирӣбалам̣ [хирибалам̣ (сӣ. пӣ.)], оттаппабалам̣, вӣрийабалам̣ [вирийабалам̣ (сӣ. сйа̄. кам̣. пӣ.)], пан̃н̃а̄балам̣ – има̄ни кхо, бхиккхаве, пан̃ча секхабала̄ни.

‘‘тасма̄тиха, бхиккхаве, евам̣ сиккхитаббам̣ – ‘саддха̄балена саманна̄гата̄ бхависса̄ма секхабалена, хирӣбалена саманна̄гата̄ бхависса̄ма секхабалена, оттаппабалена саманна̄гата̄ бхависса̄ма секхабалена, вӣрийабалена саманна̄гата̄ бхависса̄ма секхабалена, пан̃н̃а̄балена саманна̄гата̄ бхависса̄ма секхабалена̄’ти. еван̃хи во, бхиккхаве, сиккхитабба’’нти. идамавоча бхагава̄. аттамана̄ те бхиккхӯ бхагавато бха̄ситам̣ абхинандунти. пат̣хамам̣.