2. виттха̄расуттам̣

233. ‘‘чатта̄рима̄ни, бхиккхаве, камма̄ни майа̄ сайам̣ абхин̃н̃а̄ саччхикатва̄ паведита̄ни. катама̄ни чатта̄ри? аттхи, бхиккхаве, каммам̣ кан̣хам̣ кан̣хавипа̄кам̣; аттхи, бхиккхаве, каммам̣ суккам̣ суккавипа̄кам̣; аттхи, бхиккхаве, каммам̣ кан̣хасуккам̣ кан̣хасуккавипа̄кам̣; аттхи, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати.

‘‘катаман̃ча, бхиккхаве, каммам̣ кан̣хам̣ кан̣хавипа̄кам̣? идха, бхиккхаве, екаччо сабйа̄баджджхам̣ [сабйа̄паджджхам̣ (саббаттха)] ка̄йасан̇кха̄рам̣ абхисан̇кхароти, сабйа̄баджджхам̣ вачӣсан̇кха̄рам̣ абхисан̇кхароти, сабйа̄баджджхам̣ маносан̇кха̄рам̣ абхисан̇кхароти. со сабйа̄баджджхам̣ ка̄йасан̇кха̄рам̣ абхисан̇кхаритва̄, сабйа̄баджджхам̣ вачӣсан̇кха̄рам̣ абхисан̇кхаритва̄, сабйа̄баджджхам̣ маносан̇кха̄рам̣ абхисан̇кхаритва̄ сабйа̄баджджхам̣ локам̣ упападжджати. таменам̣ сабйа̄баджджхам̣ локам̣ упапаннам̣ сама̄нам̣ сабйа̄баджджха̄ пхасса̄ пхусанти. со сабйа̄баджджхехи пхассехи пхут̣т̣хо сама̄но сабйа̄баджджхам̣ веданам̣ ведийати [ведайати (ка.) а. ни. 6.63] екантадуккхам̣, сеййатха̄пи сатта̄ нерайика̄. идам̣ вуччати, бхиккхаве, каммам̣ кан̣хам̣ кан̣хавипа̄кам̣.

‘‘катаман̃ча, бхиккхаве, каммам̣ суккам̣ суккавипа̄кам̣? идха, бхиккхаве, екаччо абйа̄баджджхам̣ ка̄йасан̇кха̄рам̣ абхисан̇кхароти, абйа̄баджджхам̣ вачӣсан̇кха̄рам̣ абхисан̇кхароти, абйа̄баджджхам̣ маносан̇кха̄рам̣ абхисан̇кхароти. со абйа̄баджджхам̣ ка̄йасан̇кха̄рам̣ абхисан̇кхаритва̄, абйа̄баджджхам̣ вачӣсан̇кха̄рам̣ абхисан̇кхаритва̄, абйа̄баджджхам̣ маносан̇кха̄рам̣ абхисан̇кхаритва̄ абйа̄баджджхам̣ локам̣ упападжджати. таменам̣ абйа̄баджджхам̣ локам̣ упапаннам̣ сама̄нам̣ абйа̄баджджха̄ пхасса̄ пхусанти. со абйа̄баджджхехи пхассехи пхут̣т̣хо сама̄но абйа̄баджджхам̣ веданам̣ ведийати екантасукхам̣, сеййатха̄пи дева̄ субхакин̣ха̄. идам̣ вуччати, бхиккхаве, каммам̣ суккам̣ суккавипа̄кам̣.

‘‘катаман̃ча, бхиккхаве, каммам̣ кан̣хасуккам̣ кан̣хасуккавипа̄кам̣? идха, бхиккхаве, екаччо сабйа̄баджджхампи абйа̄баджджхампи ка̄йасан̇кха̄рам̣ абхисан̇кхароти, сабйа̄баджджхампи абйа̄баджджхампи вачӣсан̇кха̄рам̣ абхисан̇кхароти, сабйа̄баджджхампи абйа̄баджджхампи маносан̇кха̄рам̣ абхисан̇кхароти. со сабйа̄баджджхампи абйа̄баджджхампи ка̄йасан̇кха̄рам̣ абхисан̇кхаритва̄, сабйа̄баджджхампи абйа̄баджджхампи вачӣсан̇кха̄рам̣ абхисан̇кхаритва̄, сабйа̄баджджхампи абйа̄баджджхампи маносан̇кха̄рам̣ абхисан̇кхаритва̄ сабйа̄баджджхампи абйа̄баджджхампи локам̣ упападжджати. таменам̣ сабйа̄баджджхампи абйа̄баджджхампи локам̣ упапаннам̣ сама̄нам̣ сабйа̄баджджха̄пи абйа̄баджджха̄пи пхасса̄ пхусанти. со сабйа̄баджджхехипи абйа̄баджджхехипи пхассехи пхут̣т̣хо сама̄но сабйа̄баджджхампи абйа̄баджджхампи веданам̣ ведийати вокин̣н̣асукхадуккхам̣, сеййатха̄пи манусса̄ екачче ча дева̄ екачче ча винипа̄тика̄. идам̣ вуччати, бхиккхаве, каммам̣ кан̣хасуккам̣ кан̣хасуккавипа̄кам̣.

‘‘катаман̃ча, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати? татра, бхиккхаве, йамидам̣ каммам̣ кан̣хам̣ кан̣хавипа̄кам̣ тасса паха̄на̄йа йа̄ четана̄, йамидам̣ [йампидам̣ (сӣ. сйа̄. кам̣. пӣ.)] каммам̣ суккам̣ суккавипа̄кам̣ тасса паха̄на̄йа йа̄ четана̄, йамидам̣ [йампидам̣ (сӣ. сйа̄. кам̣. пӣ.)] каммам̣ кан̣хасуккам̣ кан̣хасуккавипа̄кам̣ тасса паха̄на̄йа йа̄ четана̄ – идам̣ вуччати, бхиккхаве, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати. има̄ни кхо, бхиккхаве, чатта̄ри камма̄ни майа̄ сайам̣ абхин̃н̃а̄ саччхикатва̄ паведита̄нӣ’’ти. дутийам̣.