3. сон̣ака̄йанасуттам̣

234. атха кхо сикха̄моггалла̄но бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо сикха̄моггалла̄но бра̄хман̣о бхагавантам̣ етадавоча –

‘‘пурима̄ни, бхо готама, диваса̄ни пуриматара̄ни сон̣ака̄йано ма̄н̣аво йена̄хам̣ тенупасан̇ками; упасан̇камитва̄ мам̣ етадавоча – ‘саман̣о готамо саббакамма̄нам̣ акирийам̣ пан̃н̃апети, саббакамма̄нам̣ кхо пана акирийам̣ пан̃н̃апенто уччхедам̣ а̄ха локасса – каммасачча̄йам̣ [каммасачча̄йӣ (ка.)], бхо, локо каммасама̄рамбхат̣т̣ха̄йӣ’’’ти.

‘‘дассанампи кхо ахам̣, бра̄хман̣а, сон̣ака̄йанасса ма̄н̣авасса на̄бхиджа̄на̄ми; куто паневарӯпо катха̄салла̄по! чатта̄рима̄ни, бра̄хман̣а, камма̄ни майа̄ сайам̣ абхин̃н̃а̄ саччхикатва̄ паведита̄ни. катама̄ни чатта̄ри? аттхи, бра̄хман̣а, каммам̣ кан̣хам̣ кан̣хавипа̄кам̣; аттхи, бра̄хман̣а, каммам̣ суккам̣ суккавипа̄кам̣; аттхи, бра̄хман̣а, каммам̣ кан̣хасуккам̣ кан̣хасуккавипа̄кам̣; аттхи, бра̄хман̣а, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати.

‘‘катаман̃ча, бра̄хман̣а, каммам̣ кан̣хам̣ кан̣хавипа̄кам̣? идха, бра̄хман̣а, екаччо сабйа̄баджджхам̣ ка̄йасан̇кха̄рам̣ абхисан̇кхароти, сабйа̄баджджхам̣ вачӣсан̇кха̄рам̣ абхисан̇кхароти, сабйа̄баджджхам̣ маносан̇кха̄рам̣ абхисан̇кхароти. со сабйа̄баджджхам̣ ка̄йасан̇кха̄рам̣ абхисан̇кхаритва̄, сабйа̄баджджхам̣ вачӣсан̇кха̄рам̣ абхисан̇кхаритва̄, сабйа̄баджджхам̣ маносан̇кха̄рам̣ абхисан̇кхаритва̄ сабйа̄баджджхам̣ локам̣ упападжджати. таменам̣ сабйа̄баджджхам̣ локам̣ упапаннам̣ сама̄нам̣ сабйа̄баджджха̄ пхасса̄ пхусанти. со сабйа̄баджджхехи пхассехи пхут̣т̣хо сама̄но сабйа̄баджджхам̣ веданам̣ ведийати екантадуккхам̣, сеййатха̄пи сатта̄ нерайика̄. идам̣ вуччати, бра̄хман̣а, каммам̣ кан̣хам̣ кан̣хавипа̄кам̣.

‘‘катаман̃ча, бра̄хман̣а, каммам̣ суккам̣ суккавипа̄кам̣? идха, бра̄хман̣а, екаччо абйа̄баджджхам̣ ка̄йасан̇кха̄рам̣ абхисан̇кхароти, абйа̄баджджхам̣ вачӣсан̇кха̄рам̣ абхисан̇кхароти, абйа̄баджджхам̣ маносан̇кха̄рам̣ абхисан̇кхароти. со абйа̄баджджхам̣ ка̄йасан̇кха̄рам̣ абхисан̇кхаритва̄, абйа̄баджджхам̣ вачӣсан̇кха̄рам̣ абхисан̇кхаритва̄, абйа̄баджджхам̣ маносан̇кха̄рам̣ абхисан̇кхаритва̄ абйа̄баджджхам̣ локам̣ упападжджати. таменам̣ абйа̄баджджхам̣ локам̣ упапаннам̣ сама̄нам̣ абйа̄баджджха̄ пхасса̄ пхусанти. со абйа̄баджджхехи пхассехи пхут̣т̣хо сама̄но абйа̄баджджхам̣ веданам̣ ведийати екантасукхам̣, сеййатха̄пи дева̄ субхакин̣ха̄. идам̣ вуччати, бра̄хман̣а, каммам̣ суккам̣ суккавипа̄кам̣.

‘‘катаман̃ча, бра̄хман̣а, каммам̣ кан̣хасуккам̣ кан̣хасуккавипа̄кам̣? идха, бра̄хман̣а, екаччо сабйа̄баджджхампи абйа̄баджджхампи ка̄йасан̇кха̄рам̣ абхисан̇кхароти, сабйа̄баджджхампи абйа̄баджджхампи вачӣсан̇кха̄рам̣ абхисан̇кхароти, сабйа̄баджджхампи абйа̄баджджхампи маносан̇кха̄рам̣ абхисан̇кхароти. со сабйа̄баджджхампи абйа̄баджджхампи ка̄йасан̇кха̄рам̣ абхисан̇кхаритва̄, сабйа̄баджджхампи абйа̄баджджхампи вачӣсан̇кха̄рам̣ абхисан̇кхаритва̄, сабйа̄баджджхампи абйа̄баджджхампи маносан̇кха̄рам̣ абхисан̇кхаритва̄ сабйа̄баджджхампи абйа̄баджджхампи локам̣ упападжджати. таменам̣ сабйа̄баджджхампи абйа̄баджджхампи локам̣ упапаннам̣ сама̄нам̣ сабйа̄баджджха̄пи абйа̄баджджха̄пи пхасса̄ пхусанти. со сабйа̄баджджхехипи абйа̄баджджхехипи пхассехи пхут̣т̣хо сама̄но сабйа̄баджджхампи абйа̄баджджхампи веданам̣ ведийати вокин̣н̣асукхадуккхам̣, сеййатха̄пи манусса̄ екачче ча дева̄ екачче ча винипа̄тика̄. идам̣ вуччати, бра̄хман̣а, каммам̣ кан̣хасуккам̣ кан̣хасуккавипа̄кам̣.

‘‘катаман̃ча, бра̄хман̣а, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати? татра, бра̄хман̣а, йамидам̣ каммам̣ кан̣хам̣ кан̣хавипа̄кам̣ тасса паха̄на̄йа йа̄ четана̄, йамидам̣ каммам̣ суккам̣ суккавипа̄кам̣ тасса паха̄на̄йа йа̄ четана̄, йамидам̣ каммам̣ кан̣хасуккам̣ кан̣хасуккавипа̄кам̣ тасса паха̄на̄йа йа̄ четана̄ – идам̣ вуччати, бра̄хман̣а, каммам̣ акан̣хаасуккам̣ акан̣хаасуккавипа̄кам̣ каммаккхайа̄йа сам̣ваттати. има̄ни кхо, бра̄хман̣а, чатта̄ри камма̄ни майа̄ сайам̣ абхин̃н̃а̄ саччхикатва̄ паведита̄нӣ’’ти. татийам̣.