10. пемасуттам̣

200. ‘‘чатта̄рима̄ни, бхиккхаве, (пема̄ни) [( ) наттхи сӣ. сйа̄. кам̣. пӣ. поттхакесу] джа̄йанти. катама̄ни чатта̄ри? пема̄ пемам̣ джа̄йати, пема̄ досо джа̄йати, доса̄ пемам̣ джа̄йати, доса̄ досо джа̄йати.

‘‘катхан̃ча, бхиккхаве, пема̄ пемам̣ джа̄йати? идха, бхиккхаве, пуггало пуггаласса ит̣т̣хо хоти канто мана̄по. там̣ паре ит̣т̣хена кантена мана̄пена самуда̄чаранти. тасса евам̣ хоти – ‘йо кхо мйа̄йам̣ пуггало ит̣т̣хо канто мана̄по, там̣ паре ит̣т̣хена кантена мана̄пена самуда̄чарантӣ’ти. со тесу пемам̣ джанети. евам̣ кхо, бхиккхаве, пема̄ пемам̣ джа̄йати.

‘‘катхан̃ча, бхиккхаве, пема̄ досо джа̄йати? идха, бхиккхаве, пуггало пуггаласса ит̣т̣хо хоти канто мана̄по. там̣ паре анит̣т̣хена акантена амана̄пена самуда̄чаранти. тасса евам̣ хоти – ‘йо кхо мйа̄йам̣ пуггало ит̣т̣хо канто мана̄по, там̣ паре анит̣т̣хена акантена амана̄пена самуда̄чарантӣ’ти. со тесу досам̣ джанети. евам̣ кхо, бхиккхаве, пема̄ досо джа̄йати.

‘‘катхан̃ча, бхиккхаве, доса̄ пемам̣ джа̄йати? идха, бхиккхаве, пуггало пуггаласса анит̣т̣хо хоти аканто амана̄по. там̣ паре анит̣т̣хена акантена амана̄пена самуда̄чаранти. тасса евам̣ хоти – ‘йо кхо мйа̄йам̣ пуггало анит̣т̣хо аканто амана̄по, там̣ паре анит̣т̣хена акантена амана̄пена самуда̄чарантӣ’ти. со тесу пемам̣ джанети. евам̣ кхо, бхиккхаве, доса̄ пемам̣ джа̄йати.

‘‘катхан̃ча, бхиккхаве, доса̄ досо джа̄йати? идха, бхиккхаве, пуггало пуггаласса анит̣т̣хо хоти аканто амана̄по. там̣ паре ит̣т̣хена кантена мана̄пена самуда̄чаранти. тасса евам̣ хоти – ‘йо кхо мйа̄йам̣ пуггало анит̣т̣хо аканто амана̄по, там̣ паре ит̣т̣хена кантена мана̄пена самуда̄чарантӣ’ти. со тесу досам̣ джанети. евам̣ кхо, бхиккхаве, доса̄ досо джа̄йати. има̄ни кхо, бхиккхаве, чатта̄ри пема̄ни джа̄йанти.

‘‘йасмим̣, бхиккхаве, самайе бхиккху вивиччева ка̄мехи…пе… пат̣хамам̣ джха̄нам̣ упасампаджджа вихарати, йамписса пема̄ пемам̣ джа̄йати тамписса тасмим̣ самайе на хоти, йописса пема̄ досо джа̄йати сописса тасмим̣ самайе на хоти, йамписса доса̄ пемам̣ джа̄йати тамписса тасмим̣ самайе на хоти, йописса доса̄ досо джа̄йати сописса тасмим̣ самайе на хоти.

‘‘йасмим̣, бхиккхаве, самайе бхиккху витаккавича̄ра̄нам̣ вӯпасама̄…пе… дутийам̣ джха̄нам̣…пе… татийам̣ джха̄нам̣…пе… чатуттхам̣ джха̄нам̣ упасампаджджа вихарати, йамписса пема̄ пемам̣ джа̄йати тамписса тасмим̣ самайе на хоти, йописса пема̄ досо джа̄йати сописса тасмим̣ самайе на хоти, йамписса доса̄ пемам̣ джа̄йати тамписса тасмим̣ самайе на хоти, йописса доса̄ досо джа̄йати сописса тасмим̣ самайе на хоти.

‘‘йасмим̣, бхиккхаве, самайе бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати, йамписса пема̄ пемам̣ джа̄йати тамписса пахӣнам̣ хоти уччхиннамӯлам̣ та̄ла̄ваттхукатам̣ анабха̄вам̣катам̣ а̄йатим̣ ануппа̄дадхаммам̣, йописса пема̄ досо джа̄йати сописса пахӣно хоти уччхиннамӯло та̄ла̄ваттхукато анабха̄вам̣като а̄йатим̣ ануппа̄дадхаммо, йамписса доса̄ пемам̣ джа̄йати тамписса пахӣнам̣ хоти уччхиннамӯлам̣ та̄ла̄ваттхукатам̣ анабха̄вам̣катам̣ а̄йатим̣ ануппа̄дадхаммам̣, йописса доса̄ досо джа̄йати сописса пахӣно хоти уччхиннамӯло та̄ла̄ваттхукато анабха̄вам̣като а̄йатим̣ ануппа̄дадхаммо. айам̣ вуччати, бхиккхаве, бхиккху нева уссенети на пат̣исенети [на пат̣иссенети (сӣ. пӣ.)] на дхӯпа̄йати на паджджалати на сампаджджха̄йати [на ападжджха̄йати (сӣ.), на паджджха̄йати (сйа̄. кам̣. пӣ.)].

‘‘катхан̃ча, бхиккхаве, бхиккху уссенети? идха, бхиккхаве, бхиккху рӯпам̣ аттато саманупассати, рӯпавантам̣ ва̄ атта̄нам̣, аттани ва̄ рӯпам̣, рӯпасмим̣ ва̄ атта̄нам̣; веданам̣ аттато саманупассати, ведана̄вантам̣ ва̄ атта̄нам̣, аттани ва̄ веданам̣, ведана̄йа ва̄ атта̄нам̣; сан̃н̃ам̣ аттато саманупассати, сан̃н̃а̄вантам̣ ва̄ атта̄нам̣, аттани ва̄ сан̃н̃ам̣, сан̃н̃а̄йа ва̄ атта̄нам̣; сан̇кха̄ре аттато саманупассати, сан̇кха̄равантам̣ ва̄ атта̄нам̣, аттани ва̄ сан̇кха̄ре, сан̇кха̄ресу ва̄ атта̄нам̣; вин̃н̃а̄н̣ам̣ аттато саманупассати, вин̃н̃а̄н̣авантам̣ ва̄ атта̄нам̣, аттани ва̄ вин̃н̃а̄н̣ам̣, вин̃н̃а̄н̣асмим̣ ва̄ атта̄нам̣. евам̣ кхо, бхиккхаве, бхиккху уссенети.

‘‘катхан̃ча, бхиккхаве, бхиккху на уссенети? идха, бхиккхаве, бхиккху на рӯпам̣ аттато саманупассати, на рӯпавантам̣ ва̄ атта̄нам̣, на аттани ва̄ рӯпам̣, на рӯпасмим̣ ва̄ атта̄нам̣; на веданам̣ аттато саманупассати, на ведана̄вантам̣ ва̄ атта̄нам̣, на аттани ва̄ веданам̣, на ведана̄йа ва̄ атта̄нам̣; на сан̃н̃ам̣ аттато саманупассати, на сан̃н̃а̄вантам̣ ва̄ атта̄нам̣, на аттани ва̄ сан̃н̃ам̣, на сан̃н̃а̄йа ва̄ атта̄нам̣; на сан̇кха̄ре аттато саманупассати, на сан̇кха̄равантам̣ ва̄ атта̄нам̣, на аттани ва̄ сан̇кха̄ре, на сан̇кха̄ресу ва̄ атта̄нам̣; на вин̃н̃а̄н̣ам̣ аттато саманупассати, на вин̃н̃а̄н̣авантам̣ ва̄ атта̄нам̣, на аттани ва̄ вин̃н̃а̄н̣ам̣, на вин̃н̃а̄н̣асмим̣ ва̄ атта̄нам̣. евам̣ кхо, бхиккхаве, бхиккху на уссенети.

‘‘катхан̃ча, бхиккхаве, бхиккху пат̣исенети? идха, бхиккхаве, бхиккху аккосантам̣ паччаккосати, росантам̣ пат̣иросати, бхан̣д̣антам̣ пат̣ибхан̣д̣ати. евам̣ кхо, бхиккхаве, бхиккху пат̣исенети.

‘‘катхан̃ча, бхиккхаве, бхиккху на пат̣исенети? идха, бхиккхаве, бхиккху аккосантам̣ на паччаккосати, росантам̣ на пат̣иросати, бхан̣д̣антам̣ на пат̣ибхан̣д̣ати. евам̣ кхо, бхиккхаве, бхиккху на пат̣исенети.

‘‘катхан̃ча, бхиккхаве, бхиккху дхӯпа̄йати? асмӣти, бхиккхаве, сати иттхасмӣти хоти, евам̣смӣти хоти, ан̃н̃атха̄смӣти хоти, асасмӣти хоти, сатасмӣти хоти, санти хоти, иттхам̣ санти хоти, евам̣ санти хоти, ан̃н̃атха̄ санти хоти, апихам̣ санти хоти, апихам̣ иттхам̣ санти хоти, апихам̣ евам̣ санти хоти, апихам̣ ан̃н̃атха̄ санти хоти, бхависсанти хоти, иттхам̣ бхависсанти хоти, евам̣ бхависсанти хоти, ан̃н̃атха̄ бхависсанти хоти. евам̣ кхо, бхиккхаве, бхиккху дхӯпа̄йати.

‘‘катхан̃ча, бхиккхаве, бхиккху на дхӯпа̄йати? асмӣти, бхиккхаве, асати иттхасмӣти на хоти, евам̣смӣти на хоти, ан̃н̃атха̄смӣти на хоти, асасмӣти на хоти, сатасмӣти на хоти, санти на хоти, иттхам̣ санти на хоти, евам̣ санти на хоти, ан̃н̃атха̄ санти на хоти, апихам̣ санти на хоти, апихам̣ иттхам̣ санти на хоти, апихам̣ евам̣ санти на хоти, апихам̣ ан̃н̃атха̄ санти на хоти, бхависсанти на хоти, иттхам̣ бхависсанти на хоти, евам̣ бхависсанти на хоти, ан̃н̃атха̄ бхависсанти на хоти. евам̣ кхо, бхиккхаве, бхиккху на дхӯпа̄йати.

‘‘катхан̃ча, бхиккхаве, бхиккху паджджалати? имина̄ асмӣти, бхиккхаве, сати имина̄ иттхасмӣти хоти, имина̄ евам̣смӣти хоти, имина̄ ан̃н̃атха̄смӣти хоти, имина̄ асасмӣти хоти, имина̄ сатасмӣти хоти, имина̄ санти хоти, имина̄ иттхам̣ санти хоти, имина̄ евам̣ санти хоти, имина̄ ан̃н̃атха̄ санти хоти, имина̄ апихам̣ санти хоти, имина̄ апихам̣ иттхам̣ санти хоти, имина̄ апихам̣ евам̣ санти хоти, имина̄ апихам̣ ан̃н̃атха̄ санти хоти, имина̄ бхависсанти хоти, имина̄ иттхам̣ бхависсанти хоти, имина̄ евам̣ бхависсанти хоти, имина̄ ан̃н̃атха̄ бхависсанти хоти. евам̣ кхо, бхиккхаве, бхиккху паджджалати.

‘‘катхан̃ча, бхиккхаве, бхиккху на паджджалати? имина̄ асмӣти, бхиккхаве, асати имина̄ иттхасмӣти на хоти, имина̄ евам̣смӣти на хоти, имина̄ ан̃н̃атха̄смӣти на хоти, имина̄ асасмӣти на хоти, имина̄ сатасмӣти на хоти, имина̄ санти на хоти, имина̄ иттхам̣ санти на хоти, имина̄ евам̣ санти на хоти, имина̄ ан̃н̃атха̄ санти на хоти, имина̄ апихам̣ санти на хоти, имина̄ апихам̣ иттхам̣ санти на хоти, имина̄ апихам̣ евам̣ санти на хоти, имина̄ апихам̣ ан̃н̃атха̄ санти на хоти, имина̄ бхависсанти на хоти, имина̄ иттхам̣ бхависсанти на хоти, имина̄ евам̣ бхависсанти на хоти, имина̄ ан̃н̃атха̄ бхависсанти на хоти. евам̣ кхо, бхиккхаве, бхиккху на паджджалати.

‘‘катхан̃ча, бхиккхаве, бхиккху сампаджджха̄йати? идха, бхиккхаве, бхиккхуно асмима̄но пахӣно на хоти уччхиннамӯло та̄ла̄ваттхукато анабха̄вам̣като а̄йатим̣ ануппа̄дадхаммо. евам̣ кхо, бхиккхаве, бхиккху сампаджджха̄йати.

‘‘катхан̃ча, бхиккхаве, бхиккху на сампаджджха̄йати? идха, бхиккхаве, бхиккхуно асмима̄но пахӣно хоти уччхиннамӯло та̄ла̄ваттхукато анабха̄вам̣като а̄йатим̣ ануппа̄дадхаммо. евам̣ кхо, бхиккхаве, бхиккху на сампаджджха̄йатӣ’’ти. дасамам̣.

маха̄вагго пан̃чамо.