8. джамба̄лӣсуттам̣

178. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со сакка̄йаниродхам̣ манаси кароти. тасса сакка̄йаниродхам̣ манаси карото сакка̄йаниродхе читтам̣ на паккхандати наппасӣдати на сантит̣т̣хати на̄дхимуччати. тасса кхо евам̣ [тасса ко етам̣ (сӣ. сйа̄. кам̣. пӣ.), евам̣ кхо тасса (?) ‘‘евам̣ хи тасса̄ бхиккхаве джамба̄лийа̄’’ти па̄т̣хо вийа], бхиккхаве, бхиккхуно на сакка̄йаниродхо па̄т̣икан̇кхо. сеййатха̄пи, бхиккхаве, пурисо лепагатена [ласагатена (сӣ. пӣ.)] хаттхена са̄кхам̣ ган̣хеййа, тасса со хаттхо саджджеййапи ган̣хеййапи [гайхеййапи (?)] баджджхеййапи [кхаджджеййапи (сӣ.)]; евамевам̣ кхо, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со сакка̄йаниродхам̣ манаси кароти. тасса сакка̄йаниродхам̣ манаси карото сакка̄йаниродхе читтам̣ на паккхандати наппасӣдати на сантит̣т̣хати на̄дхимуччати. тасса кхо евам̣, бхиккхаве, бхиккхуно на сакка̄йаниродхо па̄т̣икан̇кхо.

‘‘идха пана, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со сакка̄йаниродхам̣ манаси кароти. тасса сакка̄йаниродхам̣ манаси карото сакка̄йаниродхе читтам̣ паккхандати пасӣдати сантит̣т̣хати адхимуччати. тасса кхо евам̣, бхиккхаве, бхиккхуно сакка̄йаниродхо па̄т̣икан̇кхо. сеййатха̄пи, бхиккхаве, пурисо суддхена хаттхена са̄кхам̣ ган̣хеййа, тасса со хаттхо нева саджджеййа на ган̣хеййа на баджджхеййа; евамевам̣ кхо, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со сакка̄йаниродхам̣ манаси кароти. тасса сакка̄йаниродхам̣ манаси карото сакка̄йаниродхе читтам̣ паккхандати пасӣдати сантит̣т̣хати адхимуччати. тасса кхо евам̣, бхиккхаве, бхиккхуно сакка̄йаниродхо па̄т̣икан̇кхо.

‘‘идха пана, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со авиджджа̄ппабхедам̣ манаси кароти. тасса авиджджа̄ппабхедам̣ манаси карото авиджджа̄ппабхеде читтам̣ на паккхандати наппасӣдати на сантит̣т̣хати на̄дхимуччати. тасса кхо евам̣, бхиккхаве, бхиккхуно на авиджджа̄ппабхедо па̄т̣икан̇кхо. сеййатха̄пи, бхиккхаве, джамба̄лӣ анекавассаган̣ика̄. тасса̄ пурисо йа̄ни чева а̄йамукха̄ни та̄ни пидахеййа, йа̄ни ча апа̄йамукха̄ни та̄ни вивареййа, дево ча на самма̄ дха̄рам̣ ануппавеччхеййа. еван̃хи тасса̄, бхиккхаве, джамба̄лийа̄ на а̄л̣иппабхедо па̄т̣икан̇кхо. евамевам̣ кхо, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со авиджджа̄ппабхедам̣ манаси кароти. тасса авиджджа̄ппабхедам̣ манаси карото авиджджа̄ппабхеде читтам̣ на паккхандати наппасӣдати на сантит̣т̣хати на̄дхимуччати. тасса кхо евам̣, бхиккхаве, бхиккхуно на авиджджа̄ппабхедо па̄т̣икан̇кхо.

‘‘идха пана, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со авиджджа̄ппабхедам̣ манаси кароти. тасса авиджджа̄ппабхедам̣ манаси карото авиджджа̄ппабхеде читтам̣ паккхандати пасӣдати сантит̣т̣хати адхимуччати. тасса кхо евам̣, бхиккхаве, бхиккхуно авиджджа̄ппабхедо па̄т̣икан̇кхо. сеййатха̄пи, бхиккхаве, джамба̄лӣ анекавассаган̣ика̄. тасса̄ пурисо йа̄ни чева а̄йамукха̄ни та̄ни вивареййа, йа̄ни ча апа̄йамукха̄ни та̄ни пидахеййа, дево ча самма̄ дха̄рам̣ ануппавеччхеййа. еван̃хи тасса̄, бхиккхаве, джамба̄лийа̄ а̄л̣иппабхедо па̄т̣икан̇кхо. евамевам̣ кхо, бхиккхаве, бхиккху ан̃н̃атарам̣ сантам̣ четовимуттим̣ упасампаджджа вихарати. со авиджджа̄ппабхедам̣ манаси кароти. тасса авиджджа̄ппабхедам̣ манаси карото авиджджа̄ппабхеде читтам̣ паккхандати пасӣдати сантит̣т̣хати адхимуччати. тасса кхо евам̣, бхиккхаве, бхиккхуно авиджджа̄ппабхедо па̄т̣икан̇кхо. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. ат̣т̣хамам̣.