(13) 3. бхайавагго

1. атта̄нува̄дасуттам̣

121. ‘‘чатта̄рима̄ни, бхиккхаве, бхайа̄ни. катама̄ни чатта̄ри? атта̄нува̄дабхайам̣, пара̄нува̄дабхайам̣, дан̣д̣абхайам̣, дуггатибхайам̣.

‘‘катаман̃ча, бхиккхаве, атта̄нува̄дабхайам̣? идха, бхиккхаве, екаччо ити пат̣исан̃чиккхати – ‘ахан̃чева [ахан̃че (?)] кхо пана ка̄йена дуччаритам̣ чареййам̣, ва̄ча̄йа дуччаритам̣ чареййам̣, манаса̄ дуччаритам̣ чареййам̣, кин̃ча там̣ йам̣ мам̣ [кин̃ча там̣ мам̣ (сӣ.), кин̃ча мам̣ (сйа̄. кам̣.), кин̃ча там̣ каммам̣ (пӣ. ка.)] атта̄ сӣлато на упавадеййа̄’ти! со атта̄нува̄дабхайасса бхӣто ка̄йадуччаритам̣ паха̄йа ка̄йасучаритам̣ бха̄вети, вачӣдуччаритам̣ паха̄йа вачӣсучаритам̣ бха̄вети, манодуччаритам̣ паха̄йа маносучаритам̣ бха̄вети, суддхам̣ атта̄нам̣ парихарати. идам̣ вуччати, бхиккхаве, атта̄нува̄дабхайам̣.

‘‘катаман̃ча, бхиккхаве, пара̄нува̄дабхайам̣? идха, бхиккхаве, екаччо ити пат̣исан̃чиккхати – ‘ахан̃чева кхо пана ка̄йена дуччаритам̣ чареййам̣, ва̄ча̄йа дуччаритам̣ чареййам̣, манаса̄ дуччаритам̣ чареййам̣, кин̃ча там̣ йам̣ мам̣ паре сӣлато на упавадеййу’нти! со пара̄нува̄дабхайасса бхӣто ка̄йадуччаритам̣ паха̄йа ка̄йасучаритам̣ бха̄вети, вачӣдуччаритам̣ паха̄йа вачӣсучаритам̣ бха̄вети, манодуччаритам̣ паха̄йа маносучаритам̣ бха̄вети, суддхам̣ атта̄нам̣ парихарати. идам̣ вуччати, бхиккхаве, пара̄нува̄дабхайам̣.

‘‘катаман̃ча, бхиккхаве, дан̣д̣абхайам̣? идха, бхиккхаве, екаччо пассати чорам̣ а̄гуча̄рим̣, ра̄джа̄но гахетва̄ вивидха̄ каммака̄ран̣а̄ ка̄ренте, каса̄хипи та̄л̣енте, веттехипи та̄л̣енте, аддхадан̣д̣акехипи та̄л̣енте, хаттхампи чхинданте, па̄дампи чхинданте, хаттхапа̄дампи чхинданте, кан̣н̣ампи чхинданте, на̄сампи чхинданте, кан̣н̣ана̄сампи чхинданте, билан̇гатха̄ликампи каронте, сан̇кхамун̣д̣икампи каронте, ра̄хумукхампи каронте, джотима̄ликампи каронте, хаттхападжджотикампи каронте, еракаваттикампи каронте, чӣракава̄сикампи каронте, ен̣еййакампи каронте, балисамам̣сикампи каронте, каха̄пан̣акампи каронте, кха̄ра̄патаччхикампи каронте, палигхапариваттикампи каронте, пала̄лапӣт̣хакампи каронте, таттенапи телена осин̃чанте, сунакхехипи кха̄да̄пенте, джӣвантампи сӯле утта̄сенте, асина̄пи сӣсам̣ чхинданте.

‘‘тасса евам̣ хоти – ‘йатха̄рӯпа̄нам̣ кхо па̄пака̄нам̣ камма̄нам̣ хету чорам̣ а̄гуча̄рим̣ ра̄джа̄но гахетва̄ вивидха̄ каммака̄ран̣а̄ ка̄ренти, каса̄хипи та̄л̣енти…пе… асина̄пи сӣсам̣ чхинданти, ахан̃чева кхо пана еварӯпам̣ па̄пакаммам̣ кареййам̣, мампи ра̄джа̄но гахетва̄ еварӯпа̄ вивидха̄ каммака̄ран̣а̄ ка̄реййум̣, каса̄хипи та̄л̣еййум̣, веттехипи та̄л̣еййум̣, аддхадан̣д̣акехипи та̄л̣еййум̣, хаттхампи чхиндеййум̣, па̄дампи чхиндеййум̣, хаттхапа̄дампи чхиндеййум̣, кан̣н̣ампи чхиндеййум̣, на̄сампи чхиндеййум̣, кан̣н̣ана̄сампи чхиндеййум̣, билан̇гатха̄ликампи кареййум̣, сан̇кхамун̣д̣икампи кареййум̣; ра̄хумукхампи кареййум̣, джотима̄ликампи кареййум̣, хаттхападжджотикампи кареййум̣, еракаваттикампи кареййум̣, чӣракава̄сикампи кареййум̣, ен̣еййакампи кареййум̣, балисамам̣сикампи кареййум̣, каха̄пан̣акампи кареййум̣, кха̄ра̄патаччхикампи кареййум̣, палигхапариваттикампи кареййум̣, пала̄лапӣт̣хакампи кареййум̣, таттенапи телена осин̃чеййум̣, сунакхехипи кха̄да̄пеййум̣, джӣвантампи сӯле утта̄сеййум̣, асина̄пи сӣсам̣ чхиндеййу’нти. со дан̣д̣абхайасса бхӣто на паресам̣ па̄бхатам̣ вилумпанто чарати. ка̄йадуччаритам̣ паха̄йа…пе… суддхам̣ атта̄нам̣ парихарати. идам̣ вуччати, бхиккхаве, дан̣д̣абхайам̣.

‘‘катаман̃ча, бхиккхаве, дуггатибхайам̣? идха, бхиккхаве, екаччо ити пат̣исан̃чиккхати – ‘ка̄йадуччаритасса кхо па̄пако випа̄ко абхисампара̄йам̣, вачӣдуччаритасса па̄пако випа̄ко абхисампара̄йам̣, манодуччаритасса па̄пако випа̄ко абхисампара̄йам̣. ахан̃чева кхо пана ка̄йена дуччаритам̣ чареййам̣, ва̄ча̄йа дуччаритам̣ чареййам̣, манаса̄ дуччаритам̣ чареййам̣, кин̃ча там̣ йа̄хам̣ на ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджеййа’нти! со дуггатибхайасса бхӣто ка̄йадуччаритам̣ паха̄йа ка̄йасучаритам̣ бха̄вети, вачӣдуччаритам̣ паха̄йа вачӣсучаритам̣ бха̄вети, манодуччаритам̣ паха̄йа маносучаритам̣ бха̄вети, суддхам̣ атта̄нам̣ парихарати. идам̣ вуччати, бхиккхаве, дуггатибхайам̣. има̄ни кхо, бхиккхаве, чатта̄ри бхайа̄нӣ’’ти. пат̣хамам̣.

2. ӯмибхайасуттам̣

122. ‘‘чатта̄рима̄ни, бхиккхаве, бхайа̄ни удакорохантасса [удакороханте (ма. ни. 2.161)] па̄т̣икан̇кхитабба̄ни. катама̄ни чатта̄ри? ӯмибхайам̣, кумбхӣлабхайам̣, а̄ват̣т̣абхайам̣, сусука̄бхайам̣ – има̄ни кхо, бхиккхаве, чатта̄ри бхайа̄ни удакорохантасса па̄т̣икан̇кхитабба̄ни. евамевам̣ кхо, бхиккхаве, чатта̄ри бхайа̄ни идхекаччасса кулапуттасса имасмим̣ дхаммавинайе ага̄расма̄ [саддха̄ ага̄расма̄ (сӣ. сйа̄. кам̣.)] анага̄рийам̣ паббаджитасса [паббаджато (сӣ.)] па̄т̣икан̇кхитабба̄ни. катама̄ни чатта̄ри? ӯмибхайам̣, кумбхӣлабхайам̣, а̄ват̣т̣абхайам̣, сусука̄бхайам̣.

‘‘катаман̃ча, бхиккхаве, ӯмибхайам̣? идха, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето; аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти! таменам̣ татха̄ паббаджитам̣ сама̄нам̣ сабрахмача̄рино оваданти ануса̄санти – ‘евам̣ те абхиккамитаббам̣, евам̣ те пат̣иккамитаббам̣, евам̣ те а̄локетаббам̣, евам̣ те вилокетаббам̣, евам̣ те самин̃джитаббам̣, евам̣ те паса̄ритаббам̣, евам̣ те сан̇гха̄т̣ипаттачӣварам̣ дха̄ретабба’нти. тасса евам̣ хоти – ‘майам̣ кхо пуббе ага̄рийабхӯта̄ сама̄на̄ ан̃н̃е овада̄мапи ануса̄са̄мапи. име панамха̄кам̣ путтаматта̄ ман̃н̃е наттаматта̄ ман̃н̃е овадитаббам̣ ануса̄ситаббам̣ ман̃н̃антӣ’ти. со купито анаттамано сиккхам̣ паччаккха̄йа хӣна̄йа̄ваттати. айам̣ вуччати, бхиккхаве, бхиккху ӯмибхайасса бхӣто сиккхам̣ паччаккха̄йа хӣна̄йа̄ватто. ӯмибхайанти кхо, бхиккхаве, кодхӯпа̄йа̄сассетам̣ адхивачанам̣. идам̣ вуччати, бхиккхаве, ӯмибхайам̣.

‘‘катаман̃ча, бхиккхаве, кумбхӣлабхайам̣? идха, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето; аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти! таменам̣ татха̄ паббаджитам̣ сама̄нам̣ сабрахмача̄рино оваданти ануса̄санти – ‘идам̣ те кха̄дитаббам̣, идам̣ те на кха̄дитаббам̣, идам̣ те бхун̃джитаббам̣, идам̣ те на бхун̃джитаббам̣, идам̣ те са̄йитаббам̣, идам̣ те на са̄йитаббам̣, идам̣ те па̄таббам̣, идам̣ те на па̄таббам̣, каппийам̣ те кха̄дитаббам̣, акаппийам̣ те на кха̄дитаббам̣, каппийам̣ те бхун̃джитаббам̣, акаппийам̣ те на бхун̃джитаббам̣, каппийам̣ те са̄йитаббам̣, акаппийам̣ те на са̄йитаббам̣, каппийам̣ те па̄таббам̣, акаппийам̣ те на па̄таббам̣, ка̄ле те кха̄дитаббам̣, вика̄ле те на кха̄дитаббам̣, ка̄ле те бхун̃джитаббам̣, вика̄ле те на бхун̃джитаббам̣, ка̄ле те са̄йитаббам̣, вика̄ле те на са̄йитаббам̣, ка̄ле те па̄таббам̣, вика̄ле те на па̄табба’нти. тасса евам̣ хоти – ‘майам̣ кхо пуббе ага̄рийабхӯта̄ сама̄на̄ йам̣ иччха̄ма там̣ кха̄да̄ма, йам̣ на иччха̄ма на там̣ кха̄да̄ма; йам̣ иччха̄ма там̣ бхун̃джа̄ма, йам̣ на иччха̄ма на там̣ бхун̃джа̄ма; йам̣ иччха̄ма там̣ са̄йа̄ма, йам̣ на иччха̄ма на там̣ са̄йа̄ма; йам̣ иччха̄ма там̣ пива̄ма, йам̣ на иччха̄ма на там̣ пива̄ма; каппийампи кха̄да̄ма акаппийампи кха̄да̄ма каппийампи бхун̃джа̄ма акаппийампи бхун̃джа̄ма каппийампи са̄йа̄ма акаппийампи са̄йа̄ма каппийампи пива̄ма акаппийампи пива̄ма, ка̄лепи кха̄да̄ма вика̄лепи кха̄да̄ма ка̄лепи бхун̃джа̄ма вика̄лепи бхун̃джа̄ма ка̄лепи са̄йа̄ма вика̄лепи са̄йа̄ма ка̄лепи пива̄ма вика̄лепи пива̄ма; йампи но саддха̄ гахапатика̄ дива̄ вика̄ле пан̣ӣтам̣ кха̄данӣйам̣ ва̄ бходжанӣйам̣ ва̄ денти, татрапиме [таттхапиме (ма. ни. 2.163)] мукха̄варан̣ам̣ ман̃н̃е каронтӣ’ти. со купито анаттамано сиккхам̣ паччаккха̄йа хӣна̄йа̄ваттати. айам̣ вуччати, бхиккхаве, бхиккху кумбхӣлабхайасса бхӣто сиккхам̣ паччаккха̄йа хӣна̄йа̄ватто. кумбхӣлабхайанти кхо, бхиккхаве, одарикаттассетам̣ адхивачанам̣. идам̣ вуччати, бхиккхаве, кумбхӣлабхайам̣.

‘‘катаман̃ча, бхиккхаве, а̄ват̣т̣абхайам̣? идха, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи, дуккхехи доманассехи упа̄йа̄сехи дуккхотин̣н̣о дуккхапарето; аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти! со евам̣ паббаджито сама̄но пуббан̣хасамайам̣ нива̄сетва̄ паттачӣварама̄да̄йа га̄мам̣ ва̄ нигамам̣ ва̄ пин̣д̣а̄йа пависати араккхитенева ка̄йена араккхита̄йа ва̄ча̄йа араккхитена читтена анупат̣т̣хита̄йа сатийа̄ асам̣вутехи индрийехи. со таттха пассати гахапатим̣ ва̄ гахапатипуттам̣ ва̄ пан̃чахи ка̄магун̣ехи самаппитам̣ саман̇гӣбхӯтам̣ парича̄райама̄нам̣. тасса евам̣ хоти – ‘майам̣ кхо пуббе ага̄рийабхӯта̄ сама̄на̄ пан̃чахи ка̄магун̣ехи самаппита̄ саман̇гӣбхӯта̄ парича̄римха̄; сам̣виджджанти кхо пана ме куле бхога̄. сакка̄ бхоге ча бхун̃джитум̣ пун̃н̃а̄ни ча ка̄тум̣. йам̣нӯна̄хам̣ сиккхам̣ паччаккха̄йа хӣна̄йа̄ваттитва̄ бхоге ча бхун̃джеййам̣ пун̃н̃а̄ни ча кареййа’нти! со сиккхам̣ паччаккха̄йа хӣна̄йа̄ваттати. айам̣ вуччати, бхиккхаве, бхиккху а̄ват̣т̣абхайасса бхӣто сиккхам̣ паччаккха̄йа хӣна̄йа̄ватто. а̄ват̣т̣абхайанти кхо, бхиккхаве, пан̃чаннетам̣ ка̄магун̣а̄нам̣ адхивачанам̣. идам̣ вуччати, бхиккхаве, а̄ват̣т̣абхайам̣.

‘‘катаман̃ча, бхиккхаве, сусука̄бхайам̣? идха, бхиккхаве, екаччо кулапутто саддха̄ ага̄расма̄ анага̄рийам̣ паббаджито хоти – ‘отин̣н̣омхи джа̄тийа̄ джара̄йа маран̣ена сокехи паридевехи дуккхехи доманассехи упа̄йа̄сехи, дуккхотин̣н̣о дуккхапарето; аппева на̄ма имасса кеваласса дуккхаккхандхасса антакирийа̄ пан̃н̃а̄йетха̄’ти! со евам̣ паббаджито сама̄но пуббан̣хасамайам̣ нива̄сетва̄ паттачӣварама̄да̄йа га̄мам̣ ва̄ нигамам̣ ва̄ пин̣д̣а̄йа пависати араккхитенева ка̄йена араккхита̄йа ва̄ча̄йа араккхитена читтена анупат̣т̣хита̄йа сатийа̄ асам̣вутехи индрийехи. со таттха пассати ма̄туга̄мам̣ дунниваттхам̣ ва̄ дуппа̄рутам̣ ва̄. тасса ма̄туга̄мам̣ дисва̄ дунниваттхам̣ ва̄ дуппа̄рутам̣ ва̄ ра̄го читтам̣ ануддхам̣сети. со ра̄га̄нуддхам̣ситена читтена сиккхам̣ паччаккха̄йа хӣна̄йа̄ваттати. айам̣ вуччати, бхиккхаве, бхиккху сусука̄бхайасса бхӣто сиккхам̣ паччаккха̄йа хӣна̄йа̄ватто. сусука̄бхайанти кхо, бхиккхаве, ма̄туга̄массетам̣ адхивачанам̣. идам̣ вуччати, бхиккхаве, сусука̄бхайам̣. има̄ни кхо, бхиккхаве, чатта̄ри бхайа̄ни идхекаччасса кулапуттасса имасмим̣ дхаммавинайе ага̄расма̄ анага̄рийам̣ паббаджитасса па̄т̣икан̇кхитабба̄нӣ’’ти. дутийам̣.

3. пат̣хамана̄на̄каран̣асуттам̣

123. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? [катха̄. 671 а̄дайо] идха, бхиккхаве, екаччо пуггало вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно ка̄лам̣ курума̄но брахмака̄йика̄нам̣ дева̄нам̣ сахабйатам̣ упападжджати. брахмака̄йика̄нам̣, бхиккхаве, дева̄нам̣ каппо а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати [йадидам̣ чутийа̄ упапаттийа̄ ча̄ти (ка.) а. ни. 3.117 пасситаббам̣].

‘‘пуна чапарам̣, бхиккхаве, идхекаччо пуггало витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно ка̄лам̣ курума̄но а̄бхассара̄нам̣ дева̄нам̣ сахабйатам̣ упападжджати. а̄бхассара̄нам̣, бхиккхаве, дева̄нам̣ две каппа̄ а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати.

‘‘пуна чапарам̣, бхиккхаве, идхекаччо пуггало пӣтийа̄ ча вира̄га̄ упеккхако ча вихарати сато ча сампаджа̄но сукхан̃ча ка̄йена пат̣исам̣ведети йам̣ там̣ арийа̄ а̄чиккханти – ‘упеккхако сатима̄ сукхавиха̄рӣ’ти татийам̣ джха̄нам̣ упасампаджджа вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно, ка̄лам̣ курума̄но субхакин̣ха̄нам̣ дева̄нам̣ сахабйатам̣ упападжджати. субхакин̣ха̄нам̣, бхиккхаве, дева̄нам̣ чатта̄ро каппа̄ а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати.

‘‘пуна чапарам̣, бхиккхаве, идхекаччо пуггало сукхасса ча паха̄на̄ дуккхасса ча паха̄на̄ пуббева соманассадоманасса̄нам̣ аттхан̇гама̄ адуккхамасукхам̣ упеккха̄сатипа̄рисуддхим̣ чатуттхам̣ джха̄нам̣ упасампаджджа вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно ка̄лам̣ курума̄но вехаппхала̄нам̣ дева̄нам̣ сахабйатам̣ упападжджати. вехаппхала̄нам̣, бхиккхаве, дева̄нам̣ пан̃ча каппасата̄ни а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. татийам̣.

4. дутийана̄на̄каран̣асуттам̣

124. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало вивиччева ка̄мехи…пе… пат̣хамам̣ джха̄нам̣ упасампаджджа вихарати. со йадева таттха хоти рӯпагатам̣ ведана̄гатам̣ сан̃н̃а̄гатам̣ сан̇кха̄рагатам̣ вин̃н̃а̄н̣агатам̣, те дхамме аниччато дуккхато рогато ган̣д̣ато саллато агхато а̄ба̄дхато парато палокато сун̃н̃ато анаттато саманупассати. со ка̄йасса бхеда̄ парам̣ маран̣а̄ суддха̄ва̄са̄нам̣ дева̄нам̣ сахабйатам̣ упападжджати. айам̣, бхиккхаве, упапатти аса̄дха̄ран̣а̄ путхуджджанехи.

‘‘пуна чапарам̣, бхиккхаве, идхекаччо пуггало витаккавича̄ра̄нам̣ вӯпасама̄…пе… дутийам̣ джха̄нам̣…пе… татийам̣ джха̄нам̣…пе… чатуттхам̣ джха̄нам̣ упасампаджджа вихарати. со йадева таттха хоти рӯпагатам̣ ведана̄гатам̣ сан̃н̃а̄гатам̣ сан̇кха̄рагатам̣ вин̃н̃а̄н̣агатам̣, те дхамме аниччато дуккхато рогато ган̣д̣ато саллато агхато а̄ба̄дхато парато палокато сун̃н̃ато анаттато саманупассати. со ка̄йасса бхеда̄ парам̣ маран̣а̄ суддха̄ва̄са̄нам̣ дева̄нам̣ сахабйатам̣ упападжджати. айам̣, бхиккхаве, упапатти аса̄дха̄ран̣а̄ путхуджджанехи. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. чатуттхам̣.

5. пат̣хамаметта̄суттам̣

125. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало метта̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ метта̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно ка̄лам̣ курума̄но брахмака̄йика̄нам̣ дева̄нам̣ сахабйатам̣ упападжджати. брахмака̄йика̄нам̣, бхиккхаве, дева̄нам̣ каппо а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати.

‘‘пуна чапарам̣, бхиккхаве, идхекаччо пуггало карун̣а̄сахагатена четаса̄…пе… мудита̄сахагатена четаса̄…пе… упеккха̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ упеккха̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. со тадасса̄дети, там̣ ника̄мети, тена ча виттим̣ а̄паджджати. таттха т̣хито тададхимутто таббахулавиха̄рӣ апарихӣно ка̄лам̣ курума̄но а̄бхассара̄нам̣ [сйа̄мапоттхаке пана карун̣а̄дайо тайо виха̄ра̄ а̄бхассара̄дӣхи тӣхи висум̣ висум̣ йоджетва̄ парипун̣н̣амева дасситам̣] дева̄нам̣ сахабйатам̣ упападжджати. а̄бхассара̄нам̣, бхиккхаве, дева̄нам̣ две каппа̄ а̄йуппама̄н̣ам̣…пе… субхакин̣ха̄нам̣ [сйа̄мапоттхаке пана карун̣а̄дайо тайо виха̄ра̄ а̄бхассара̄дӣхи тӣхи висум̣ висум̣ йоджетва̄ парипун̣н̣амева дасситам̣] дева̄нам̣ сахабйатам̣ упападжджати. субхакин̣ха̄нам̣, бхиккхаве, дева̄нам̣ чатта̄ро каппа̄ а̄йуппама̄н̣ам̣…пе… вехаппхала̄нам̣ дева̄нам̣ сахабйатам̣ упападжджати. вехаппхала̄нам̣, бхиккхаве, дева̄нам̣ пан̃ча каппасата̄ни а̄йуппама̄н̣ам̣. таттха путхуджджано йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ нирайампи гаччхати тираччха̄найонимпи гаччхати петтивисайампи гаччхати. бхагавато пана са̄вако таттха йа̄вата̄йукам̣ т̣хатва̄ йа̄ватакам̣ тесам̣ дева̄нам̣ а̄йуппама̄н̣ам̣ там̣ саббам̣ кхепетва̄ тасмим̣йева бхаве паринибба̄йати. айам̣ кхо, бхиккхаве, висесо айам̣ адхиппайа̄со идам̣ на̄на̄каран̣ам̣ сутавато арийаса̄вакасса ассутавата̄ путхуджджанена, йадидам̣ гатийа̄ упапаттийа̄ сати. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. пан̃чамам̣.

6. дутийаметта̄суттам̣

126. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало метта̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ метта̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. со йадева таттха хоти рӯпагатам̣ ведана̄гатам̣ сан̃н̃а̄гатам̣ сан̇кха̄рагатам̣ вин̃н̃а̄н̣агатам̣ те дхамме аниччато дуккхато рогато ган̣д̣ато саллато агхато а̄ба̄дхато парато палокато сун̃н̃ато анаттато саманупассати. со ка̄йасса бхеда̄ парам̣ маран̣а̄ суддха̄ва̄са̄нам̣ дева̄нам̣ сахабйатам̣ упападжджати. айам̣, бхиккхаве, упапатти аса̄дха̄ран̣а̄ путхуджджанехи.

‘‘пуна чапарам̣, бхиккхаве, идхекаччо пуггало карун̣а̄…пе… мудита̄…пе… упеккха̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ упеккха̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. со йадева таттха хоти рӯпагатам̣ ведана̄гатам̣ сан̃н̃а̄гатам̣ сан̇кха̄рагатам̣ вин̃н̃а̄н̣агатам̣ те дхамме аниччато дуккхато рогато ган̣д̣ато саллато агхато а̄ба̄дхато парато палокато сун̃н̃ато анаттато саманупассати. со ка̄йасса бхеда̄ парам̣ маран̣а̄ суддха̄ва̄са̄нам̣ дева̄нам̣ сахабйатам̣ упападжджати. айам̣, бхиккхаве, упапатти аса̄дха̄ран̣а̄ путхуджджанехи. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. чхат̣т̣хам̣.

7. пат̣хамататха̄гатааччхарийасуттам̣

127. ‘‘татха̄гатасса, бхиккхаве, арахато самма̄самбуддхасса па̄тубха̄ва̄ чатта̄ро аччхарийа̄ аббхута̄ дхамма̄ [аббхутадхамма̄ (сйа̄. кам̣. ка.)] па̄тубхаванти. катаме чатта̄ро? йада̄, бхиккхаве, бодхисатто тусита̄ ка̄йа̄ чавитва̄ сато сампаджа̄но ма̄тукуччхим̣ оккамати, атха садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йа̄пи та̄ локантарика̄ агха̄ асам̣вута̄ андхака̄ра̄ андхака̄ратимиса̄ йаттхапимесам̣ [йаттхимесам̣ (сӣ. сйа̄. кам̣.)] чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ а̄бха̄ на̄нубхонти, таттхапи аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йепи таттха сатта̄ упапанна̄ тепи тенобха̄сена ан̃н̃аман̃н̃ам̣ сан̃джа̄нанти – ‘ан̃н̃епи кира, бхо, санти сатта̄ идхӯпапанна̄’ти. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ пат̣хамо аччхарийо аббхуто дхаммо [аббхутадхаммо (сйа̄. кам̣. ка.)] па̄тубхавати.

‘‘пуна чапарам̣, бхиккхаве, йада̄ бодхисатто сато сампаджа̄но ма̄тукуччхимха̄ никкхамати, атха садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йа̄пи та̄ локантарика̄ агха̄ асам̣вута̄ андхака̄ра̄ андхака̄ратимиса̄ йаттхапимесам̣ чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ а̄бха̄ на̄нубхонти, таттхапи аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йепи таттха сатта̄ упапанна̄ тепи тенобха̄сена ан̃н̃аман̃н̃ам̣ сан̃джа̄нанти – ‘ан̃н̃епи кира, бхо, санти сатта̄ идхӯпапанна̄’ти. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ дутийо аччхарийо аббхуто дхаммо па̄тубхавати.

‘‘пуна чапарам̣, бхиккхаве, йада̄ татха̄гато ануттарам̣ самма̄самбодхим̣ абхисамбуджджхати, атха садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йа̄пи та̄ локантарика̄ агха̄ асам̣вута̄ андхака̄ра̄ андхака̄ратимиса̄ йаттхапимесам̣ чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ а̄бха̄ на̄нубхонти, таттхапи аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йепи таттха сатта̄ упапанна̄ тепи тенобха̄сена ан̃н̃аман̃н̃ам̣ сан̃джа̄нанти – ‘ан̃н̃епи кира, бхо, санти сатта̄ идхӯпапанна̄’ти. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ татийо аччхарийо аббхуто дхаммо па̄тубхавати.

‘‘пуна чапарам̣, бхиккхаве, йада̄ татха̄гато ануттарам̣ дхаммачаккам̣ паваттети, атха садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йа̄пи та̄ локантарика̄ агха̄ асам̣вута̄ андхака̄ра̄ андхака̄ратимиса̄ йаттхапимесам̣ чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ а̄бха̄ на̄нубхонти, таттхапи аппама̄н̣о ул̣а̄ро обха̄со па̄тубхавати атиккаммева дева̄нам̣ дева̄нубха̄вам̣. йепи таттха сатта̄ упапанна̄ тепи тенобха̄сена ан̃н̃аман̃н̃ам̣ сан̃джа̄нанти – ‘ан̃н̃епи кира, бхо, санти сатта̄ идхӯпапанна̄’ти. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ чатуттхо аччхарийо аббхуто дхаммо па̄тубхавати. татха̄гатасса, бхиккхаве, арахато самма̄самбуддхасса па̄тубха̄ва̄ име чатта̄ро аччхарийа̄ аббхута̄ дхамма̄ па̄тубхавантӣ’’ти. саттамам̣.

8. дутийататха̄гатааччхарийасуттам̣

128. ‘‘татха̄гатасса, бхиккхаве, арахато самма̄самбуддхасса па̄тубха̄ва̄ чатта̄ро аччхарийа̄ аббхута̄ дхамма̄ па̄тубхаванти. катаме чатта̄ро? а̄лайа̄ра̄ма̄ [а̄лайара̄ма̄ (ан̃н̃асуттесу)], бхиккхаве, паджа̄ а̄лайарата̄ а̄лайасаммудита̄; са̄ татха̄гатена ана̄лайе дхамме десийама̄не суссӯсати сотам̣ одахати ан̃н̃а̄ читтам̣ упат̣т̣хапети. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ пат̣хамо аччхарийо аббхуто дхаммо па̄тубхавати.

‘‘ма̄на̄ра̄ма̄, бхиккхаве, паджа̄ ма̄нарата̄ ма̄насаммудита̄. са̄ татха̄гатена ма̄навинайе дхамме десийама̄не суссӯсати сотам̣ одахати ан̃н̃а̄ читтам̣ упат̣т̣хапети. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ дутийо аччхарийо аббхуто дхаммо па̄тубхавати.

‘‘анупасама̄ра̄ма̄, бхиккхаве, паджа̄ анупасамарата̄ анупасамасаммудита̄. са̄ татха̄гатена опасамике дхамме десийама̄не суссӯсати сотам̣ одахати ан̃н̃а̄ читтам̣ упат̣т̣хапети. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ татийо аччхарийо аббхуто дхаммо па̄тубхавати.

‘‘авиджджа̄гата̄, бхиккхаве, паджа̄ ан̣д̣абхӯта̄ парийонаддха̄. са̄ татха̄гатена авиджджа̄винайе дхамме десийама̄не суссӯсати сотам̣ одахати ан̃н̃а̄ читтам̣ упат̣т̣хапети. татха̄гатасса, бхиккхаве, арахато самма̄самбуддхасса па̄тубха̄ва̄ айам̣ чатуттхо аччхарийо аббхуто дхаммо па̄тубхавати. татха̄гатасса, бхиккхаве, арахато самма̄самбуддхасса па̄тубха̄ва̄ име чатта̄ро аччхарийа̄ аббхута̄ дхамма̄ па̄тубхавантӣ’’ти. ат̣т̣хамам̣.

9. а̄нандааччхарийасуттам̣

129. ‘‘чатта̄роме, бхиккхаве, аччхарийа̄ аббхута̄ дхамма̄ а̄нанде. катаме чатта̄ро? саче, бхиккхаве, бхиккхупариса̄ а̄нандам̣ дассана̄йа упасан̇камати, дассаненапи са̄ аттамана̄ хоти. татра че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, бхиккхупариса̄ хоти, атха а̄нандо тун̣хӣ бхавати.

‘‘саче, бхиккхаве, бхиккхунипариса̄ а̄нандам̣ дассана̄йа упасан̇камати, дассаненапи са̄ аттамана̄ хоти. таттха че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, бхиккхунипариса̄ хоти, атха а̄нандо тун̣хӣ бхавати.

‘‘саче, бхиккхаве, упа̄сакапариса̄ а̄нандам̣ дассана̄йа упасан̇камати, дассаненапи са̄ аттамана̄ хоти. татра че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, упа̄сакапариса̄ хоти, атха а̄нандо тун̣хӣ бхавати.

‘‘саче, бхиккхаве, упа̄сика̄париса̄ а̄нандам̣ дассана̄йа упасан̇камати, дассаненапи са̄ аттамана̄ хоти. татра че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, упа̄сика̄париса̄ хоти, атха а̄нандо тун̣хӣ бхавати. име кхо, бхиккхаве, чатта̄ро аччхарийа̄ аббхута̄ дхамма̄ а̄нанде’’ти. навамам̣.

10. чаккаваттиаччхарийасуттам̣

130. ‘‘чатта̄роме, бхиккхаве, аччхарийа̄ аббхута̄ дхамма̄ ран̃н̃е чаккаваттимхи. катаме чатта̄ро? саче, бхиккхаве, кхаттийапариса̄ ра̄джа̄нам̣ чаккаваттим̣ дассана̄йа упасан̇камати, дассаненапи са̄ аттамана̄ хоти. татра че ра̄джа̄ чаккаваттӣ бха̄сати, бха̄ситенапи са̄ аттамана̄ хоти. атитта̄ва, бхиккхаве, кхаттийапариса̄ хоти, атха ра̄джа̄ чаккаваттӣ тун̣хӣ бхавати.

‘‘саче, бхиккхаве, бра̄хман̣апариса̄ ра̄джа̄нам̣ чаккаваттим̣ дассана̄йа упасан̇камати, дассаненапи са̄ аттамана̄ хоти. татра че ра̄джа̄ чаккаваттӣ бха̄сати, бха̄ситенапи са̄ аттамана̄ хоти. атитта̄ва, бхиккхаве, бра̄хман̣апариса̄ хоти, атха ра̄джа̄ чаккаваттӣ тун̣хӣ бхавати.

‘‘саче, бхиккхаве, гахапатипариса̄ ра̄джа̄нам̣ чаккаваттим̣ дассана̄йа упасан̇камати, дассаненапи са̄ аттамана̄ хоти. татра че ра̄джа̄ чаккаваттӣ бха̄сати, бха̄ситенапи са̄ аттамана̄ хоти. атитта̄ва, бхиккхаве, гахапатипариса̄ хоти, атха ра̄джа̄ чаккаваттӣ тун̣хӣ бхавати.

‘‘саче, бхиккхаве, саман̣апариса̄ ра̄джа̄нам̣ чаккаваттим̣ дассана̄йа упасан̇камати, дассаненапи са̄ аттамана̄ хоти. татра че ра̄джа̄ чаккаваттӣ бха̄сати, бха̄ситенапи са̄ аттамана̄ хоти. атитта̄ва, бхиккхаве, саман̣апариса̄ хоти, атха ра̄джа̄ чаккаваттӣ тун̣хӣ бхавати. име кхо, бхиккхаве, чатта̄ро аччхарийа̄ аббхута̄ дхамма̄ ран̃н̃е чаккаваттимхи.

‘‘евамевам̣ кхо, бхиккхаве, чатта̄ро [чатта̄роме (ка.)] аччхарийа̄ аббхута̄ дхамма̄ а̄нанде. катаме чатта̄ро? саче, бхиккхаве, бхиккхупариса̄ а̄нандам̣ дассана̄йа упасан̇камати, дассаненапи са̄ аттамана̄ хоти. татра че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, бхиккхупариса̄ хоти, атха а̄нандо тун̣хӣ бхавати.

‘‘саче, бхиккхаве, бхиккхунипариса̄…пе… саче, бхиккхаве, упа̄сакапариса̄…пе… саче, бхиккхаве, упа̄сика̄париса̄ а̄нандам̣ дассана̄йа упасан̇камати, дассаненапи са̄ аттамана̄ хоти. татра че а̄нандо дхаммам̣ бха̄сати, бха̄ситенапи са̄ аттамана̄ хоти. атитта̄ва, бхиккхаве, упа̄сика̄париса̄ хоти, атха а̄нандо тун̣хӣ бхавати. име кхо, бхиккхаве, чатта̄ро аччхарийа̄ аббхута̄ дхамма̄ а̄нанде’’ти. дасамам̣.

бхайавагго татийо.