7. а̄раккхасуттам̣

117. ‘‘чатӯсу, бхиккхаве, т̣ха̄несу аттарӯпена аппама̄до сати четасо а̄раккхо каран̣ӣйо. катамесу чатӯсу? ‘ма̄ ме раджанӣйесу дхаммесу читтам̣ раджджӣ’ти аттарӯпена аппама̄до сати четасо а̄раккхо каран̣ӣйо; ‘ма̄ ме досанӣйесу дхаммесу читтам̣ дуссӣ’ти аттарӯпена аппама̄до сати четасо а̄раккхо каран̣ӣйо; ‘ма̄ ме моханӣйесу дхаммесу читтам̣ муйхӣ’ти аттарӯпена аппама̄до сати четасо а̄раккхо каран̣ӣйо; ‘ма̄ ме маданӣйесу дхаммесу читтам̣ маджджӣ’ти аттарӯпена аппама̄до сати четасо а̄раккхо каран̣ӣйо.

‘‘йато кхо, бхиккхаве, бхиккхуно раджанӣйесу дхаммесу читтам̣ на раджджати вӣтара̄гатта̄, досанӣйесу дхаммесу читтам̣ на дуссати вӣтадосатта̄, моханӣйесу дхаммесу читтам̣ на муйхати вӣтамохатта̄, маданӣйесу дхаммесу читтам̣ на маджджати вӣтамадатта̄, со на чхамбхати на кампати на ведхати на санта̄сам̣ а̄паджджати, на ча пана саман̣авачанахетупи гаччхатӣ’’ти. саттамам̣.