1. кесисуттам̣

111. атха кхо кеси ассадаммаса̄ратхи йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо кесим̣ ассадаммаса̄ратхим̣ бхагава̄ етадавоча – ‘‘твам̣ кхоси, кеси, пан̃н̃а̄то ассадаммаса̄ратхӣти [сан̃н̃а̄то ассадаммаса̄ратхи (сӣ. сйа̄. кам̣. пӣ.)]. катхам̣ пана твам̣, кеси, ассадаммам̣ винесӣ’’ти? ‘‘ахам̣ кхо, бханте, ассадаммам̣ сан̣хенапи винеми, пхарусенапи винеми, сан̣хапхарусенапи винемӣ’’ти. ‘‘саче те, кеси, ассадаммо сан̣хена винайам̣ на упети, пхарусена винайам̣ на упети, сан̣хапхарусена винайам̣ на упети, кинти нам̣ каросӣ’’ти? ‘‘саче ме, бханте, ассадаммо сан̣хена винайам̣ на упети, пхарусена винайам̣ на упети, сан̣хапхарусена винайам̣ на упети; хана̄ми нам̣, бханте. там̣ кисса хету? ма̄ ме а̄чарийакуласса аван̣н̣о ахосӣ’’ти.

‘‘бхагава̄ пана, бханте, ануттаро пурисадаммаса̄ратхи. катхам̣ пана, бханте, бхагава̄ пурисадаммам̣ винетӣ’’ти? ‘‘ахам̣ кхо, кеси, пурисадаммам̣ сан̣хенапи винеми, пхарусенапи винеми, сан̣хапхарусенапи винеми. татридам̣, кеси, сан̣хасмим̣ – ити ка̄йасучаритам̣ ити ка̄йасучаритасса випа̄ко, ити вачӣсучаритам̣ ити вачӣсучаритасса випа̄ко, ити маносучаритам̣ ити маносучаритасса випа̄ко, ити дева̄, ити манусса̄ти. татридам̣, кеси, пхарусасмим̣ – ити ка̄йадуччаритам̣ ити ка̄йадуччаритасса випа̄ко, ити вачӣдуччаритам̣ ити вачӣдуччаритасса випа̄ко, ити манодуччаритам̣ ити манодуччаритасса випа̄ко, ити нирайо, ити тираччха̄найони, ити петтивисайо’’ти.

‘‘татридам̣, кеси, сан̣хапхарусасмим̣ – ити ка̄йасучаритам̣ ити ка̄йасучаритасса випа̄ко, ити ка̄йадуччаритам̣ ити ка̄йадуччаритасса випа̄ко, ити вачӣсучаритам̣ ити вачӣсучаритасса випа̄ко, ити вачӣдуччаритам̣ ити вачӣдуччаритасса випа̄ко, ити маносучаритам̣ ити маносучаритасса випа̄ко, ити манодуччаритам̣ ити манодуччаритасса випа̄ко, ити дева̄, ити манусса̄, ити нирайо, ити тираччха̄найони, ити петтивисайо’’ти.

‘‘саче те, бханте, пурисадаммо сан̣хена винайам̣ на упети, пхарусена винайам̣ на упети, сан̣хапхарусена винайам̣ на упети, кинти нам̣ бхагава̄ каротӣ’’ти? ‘‘саче ме, кеси, пурисадаммо сан̣хена винайам̣ на упети, пхарусена винайам̣ на упети, сан̣хапхарусена винайам̣ на упети, хана̄ми нам̣, кесӣ’’ти. ‘‘на кхо, бханте, бхагавато па̄н̣а̄типа̄то каппати. атха ча пана бхагава̄ евама̄ха – ‘хана̄ми, нам̣ кесӣ’’’ти! ‘‘саччам̣, кеси! на татха̄гатасса па̄н̣а̄типа̄то каппати. апи ча йо пурисадаммо сан̣хена винайам̣ на упети, пхарусена винайам̣ на упети, сан̣хапхарусена винайам̣ на упети, на там̣ татха̄гато ваттаббам̣ ануса̄ситаббам̣ ман̃н̃ати, на̄пи вин̃н̃ӯ сабрахмача̄рӣ ваттаббам̣ ануса̄ситаббам̣ ман̃н̃анти. вадхо хесо, кеси, арийасса винайе – йам̣ на татха̄гато ваттаббам̣ ануса̄ситаббам̣ ман̃н̃ати, на̄пи вин̃н̃ӯ сабрахмача̄рӣ ваттаббам̣ ануса̄ситаббам̣ ман̃н̃антӣ’’ти.

‘‘со хи нӯна, бханте, сухато хоти – йам̣ на татха̄гато ваттаббам̣ ануса̄ситаббам̣ ман̃н̃ати, на̄пи вин̃н̃ӯ сабрахмача̄рӣ ваттаббам̣ ануса̄ситаббам̣ ман̃н̃антӣти. абхиккантам̣, бханте, абхиккантам̣, бханте…пе… упа̄сакам̣ мам̣, бханте, бхагава̄ дха̄рету аджджатагге па̄н̣упетам̣ саран̣ам̣ гата’’нти. пат̣хамам̣.