8. балӣбаддасуттам̣
108. ‘‘чатта̄роме, бхиккхаве, балӣбадда̄ [баливадда̄ (сӣ. сйа̄. кам̣. пӣ.), балибаддха̄ (ка.) пу. па. 162]. катаме чатта̄ро? сагавачан̣д̣о но парагавачан̣д̣о, парагавачан̣д̣о но сагавачан̣д̣о, сагавачан̣д̣о ча парагавачан̣д̣о ча, нева сагавачан̣д̣о но парагавачан̣д̣о – име кхо, бхиккхаве, чатта̄ро балӣбадда̄. евамевам̣ кхо, бхиккхаве, чатта̄ро балӣбаддӯпама̄ пуггала̄ санто сам̣виджджама̄на̄ локасмим̣. катаме чатта̄ро? сагавачан̣д̣о но парагавачан̣д̣о, парагавачан̣д̣о но сагавачан̣д̣о, сагавачан̣д̣о ча парагавачан̣д̣о ча, нева сагавачан̣д̣о но парагавачан̣д̣о.
‘‘катхан̃ча, бхиккхаве, пуггало сагавачан̣д̣о хоти, но парагавачан̣д̣о? идха, бхиккхаве, екаччо пуггало сакапарисам̣ уббеджета̄ хоти, но парапарисам̣. евам̣ кхо, бхиккхаве, пуггало сагавачан̣д̣о хоти, но парагавачан̣д̣о. сеййатха̄пи со, бхиккхаве, балӣбаддо сагавачан̣д̣о, но парагавачан̣д̣о; татхӯпама̄хам̣, бхиккхаве, имам̣ пуггалам̣ вада̄ми.
‘‘катхан̃ча, бхиккхаве, пуггало парагавачан̣д̣о хоти, но сагавачан̣д̣о? идха, бхиккхаве, екаччо пуггало парапарисам̣ уббеджета̄ хоти, но сакапарисам̣. евам̣ кхо, бхиккхаве, пуггало парагавачан̣д̣о хоти, но сагавачан̣д̣о. сеййатха̄пи со, бхиккхаве, балӣбаддо парагавачан̣д̣о, но сагавачан̣д̣о; татхӯпама̄хам̣, бхиккхаве, имам̣ пуггалам̣ вада̄ми.
‘‘катхан̃ча, бхиккхаве, пуггало сагавачан̣д̣о ча хоти парагавачан̣д̣о ча? идха, бхиккхаве, екаччо пуггало сакапарисам̣ уббеджета̄ хоти парапарисан̃ча. евам̣ кхо, бхиккхаве, пуггало сагавачан̣д̣о ча хоти парагавачан̣д̣о ча. сеййатха̄пи со, бхиккхаве, балӣбаддо сагавачан̣д̣о ча парагавачан̣д̣о ча; татхӯпама̄хам̣, бхиккхаве, имам̣ пуггалам̣ вада̄ми.
‘‘катхан̃ча, бхиккхаве, пуггало нева сагавачан̣д̣о хоти но парагавачан̣д̣о? идха, бхиккхаве, екаччо пуггало нева сакапарисам̣ уббеджета̄ хоти, но парапарисан̃ча. евам̣ кхо, бхиккхаве, пуггало нева сагавачан̣д̣о хоти, но парагавачан̣д̣о. сеййатха̄пи со, бхиккхаве, балӣбаддо нева сагавачан̣д̣о, но парагавачан̣д̣о; татхӯпама̄хам̣, бхиккхаве, имам̣ пуггалам̣ вада̄ми. име кхо, бхиккхаве, чатта̄ро балӣбаддӯпама̄ пуггала̄ санто сам̣виджджама̄на̄ локасми’’нти. ат̣т̣хамам̣.