5. чхава̄ла̄тасуттам̣

95. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? неваттахита̄йа пат̣ипанно но парахита̄йа, парахита̄йа пат̣ипанно но аттахита̄йа, аттахита̄йа пат̣ипанно но парахита̄йа, аттахита̄йа чева [аттахита̄йа ча (сӣ. сйа̄. кам̣. пӣ.)] пат̣ипанно парахита̄йа ча.

‘‘сеййатха̄пи, бхиккхаве, чхава̄ла̄там̣ убхато падиттам̣ [а̄диттам̣ (ка.)], маджджхе гӯтхагатам̣, нева га̄ме кат̣т̣хаттхам̣ пхарати на аран̃н̃е ( ) [(кат̣т̣хаттхам̣ пхарати) каттхачи]; татхӯпама̄хам̣, бхиккхаве, имам̣ пуггалам̣ вада̄ми йва̄йам̣ пуггало неваттахита̄йа пат̣ипанно но парахита̄йа.

‘‘татра, бхиккхаве, йва̄йам̣ пуггало парахита̄йа пат̣ипанно но аттахита̄йа, айам̣ имесам̣ двиннам̣ пуггала̄нам̣ абхиккантатаро ча пан̣ӣтатаро ча. татра, бхиккхаве, йва̄йам̣ пуггало аттахита̄йа пат̣ипанно но парахита̄йа, айам̣ имесам̣ тин̣н̣ам̣ пуггала̄нам̣ абхиккантатаро ча пан̣ӣтатаро ча. татра, бхиккхаве, йва̄йам̣ пуггало аттахита̄йа чева пат̣ипанно парахита̄йа ча, айам̣ имесам̣ чатуннам̣ пуггала̄нам̣ агго ча сет̣т̣хо ча па̄моккхо [моккхо (пӣ.) сам̣. ни. 3.662-663; а. ни. 5.181] ча уттамо ча паваро ча.

‘‘сеййатха̄пи, бхиккхаве, гава̄ кхӣрам̣, кхӣрамха̄ дадхи, дадхимха̄ наванӣтам̣, наванӣтамха̄ саппи, саппимха̄ саппиман̣д̣о, саппиман̣д̣о [саппимха̄ саппиман̣д̣о (ка.)] таттха [татра (сам̣. ни. 3.662-662)] аггамаккха̄йати; евамевам̣ кхо, бхиккхаве, йва̄йам̣ пуггало аттахита̄йа чева пат̣ипанно парахита̄йа ча, айам̣ имесам̣ чатуннам̣ пуггала̄нам̣ агго ча сет̣т̣хо ча па̄моккхо ча уттамо ча паваро ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. пан̃чамам̣.