1. асурасуттам̣

91. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? асуро асурапарива̄ро, асуро девапарива̄ро, дево асурапарива̄ро, дево девапарива̄ро.

‘‘катхан̃ча, бхиккхаве, пуггало асуро хоти асурапарива̄ро? идха, бхиккхаве, екаччо пуггало дуссӣло хоти па̄падхаммо, париса̄писса хоти дуссӣла̄ па̄падхамма̄. евам̣ кхо, бхиккхаве, пуггало асуро хоти асурапарива̄ро.

‘‘катхан̃ча, бхиккхаве, пуггало асуро хоти девапарива̄ро? идха, бхиккхаве, екаччо пуггало дуссӣло хоти па̄падхаммо, париса̄ ча кхвасса хоти сӣлаватӣ калйа̄н̣адхамма̄. евам̣ кхо, бхиккхаве, пуггало асуро хоти девапарива̄ро.

‘‘катхан̃ча, бхиккхаве, пуггало дево хоти асурапарива̄ро? идха, бхиккхаве, екаччо пуггало сӣлава̄ хоти калйа̄н̣адхаммо, париса̄ ча кхвасса хоти дуссӣла̄ па̄падхамма̄. евам̣ кхо, бхиккхаве, пуггало дево хоти асурапарива̄ро.

‘‘катхан̃ча, бхиккхаве, пуггало дево хоти девапарива̄ро? идха, бхиккхаве, екаччо пуггало сӣлава̄ хоти калйа̄н̣адхаммо, париса̄писса хоти сӣлаватӣ калйа̄н̣адхамма̄. евам̣ кхо, бхиккхаве, пуггало дево хоти, девапарива̄ро. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. пат̣хамам̣.