8. сам̣йоджанасуттам̣

88. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? саман̣амачало, саман̣апун̣д̣арӣко, саман̣ападумо, саман̣есу саман̣асукхума̄ло.

‘‘катхан̃ча, бхиккхаве, пуггало [пу. па. 190 (тхокам̣ висадисам̣)] саман̣амачало хоти? идха, бхиккхаве, бхиккху тин̣н̣ам̣ сам̣йоджана̄нам̣ париккхайа̄ сота̄панно хоти авинипа̄тадхаммо нийато самбодхипара̄йан̣о. евам̣ кхо, бхиккхаве, пуггало саман̣амачало хоти.

‘‘катхан̃ча, бхиккхаве, пуггало саман̣апун̣д̣арӣко хоти? идха бхиккхаве, бхиккху тин̣н̣ам̣ сам̣йоджана̄нам̣ париккхайа̄, ра̄гадосамоха̄нам̣ танутта̄ сакада̄га̄мӣ хоти, сакидева имам̣ локам̣ а̄гантва̄ дуккхассантам̣ кароти. евам̣ кхо, бхиккхаве, пуггало саман̣апун̣д̣арӣко хоти.

‘‘катхан̃ча, бхиккхаве, пуггало саман̣ападумо хоти? идха, бхиккхаве, бхиккху пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ опапа̄тико хоти таттха паринибба̄йӣ ана̄ваттидхаммо тасма̄ лока̄. евам̣ кхо, бхиккхаве, пуггало саман̣ападумо хоти.

‘‘катхан̃ча, бхиккхаве, пуггало саман̣есу саман̣асукхума̄ло хоти? идха, бхиккхаве, бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати. евам̣ кхо, бхиккхаве, пуггало саман̣есу саман̣асукхума̄ло хоти. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. ат̣т̣хамам̣.