3. саппурисасуттам̣

73. ‘‘чатӯхи, бхиккхаве, дхаммехи саманна̄гато асаппурисо ведитаббо. катамехи чатӯхи? идха, бхиккхаве, асаппурисо йо хоти парасса аван̣н̣о там̣ апут̣т̣хопи па̄ту кароти, ко пана ва̄до пут̣т̣хасса! пут̣т̣хо кхо пана пан̃ха̄бхинӣто аха̄петва̄ аламбитва̄ парипӯрам̣ виттха̄рена парасса аван̣н̣ам̣ бха̄сита̄ хоти. ведитаббаметам̣, бхиккхаве, асаппурисо айам̣ бхаванти.

‘‘пуна чапарам̣, бхиккхаве, асаппурисо йо хоти парасса ван̣н̣о там̣ пут̣т̣хопи на па̄ту кароти, ко пана ва̄до апут̣т̣хасса! пут̣т̣хо кхо пана пан̃ха̄бхинӣто ха̄петва̄ ламбитва̄ апарипӯрам̣ авиттха̄рена парасса ван̣н̣ам̣ бха̄сита̄ хоти. ведитаббаметам̣, бхиккхаве, асаппурисо айам̣ бхаванти.

‘‘пуна чапарам̣, бхиккхаве, асаппурисо йо хоти аттано аван̣н̣о там̣ пут̣т̣хопи на па̄ту кароти, ко пана ва̄до апут̣т̣хасса! пут̣т̣хо кхо пана пан̃ха̄бхинӣто ха̄петва̄ ламбитва̄ апарипӯрам̣ авиттха̄рена аттано аван̣н̣ам̣ бха̄сита̄ хоти. ведитаббаметам̣, бхиккхаве, асаппурисо айам̣ бхаванти.

‘‘пуна чапарам̣, бхиккхаве, асаппурисо йо хоти аттано ван̣н̣о там̣ апут̣т̣хопи па̄ту кароти, ко пана ва̄до пут̣т̣хасса! пут̣т̣хо кхо пана пан̃ха̄бхинӣто аха̄петва̄ аламбитва̄ парипӯрам̣ виттха̄рена аттано ван̣н̣ам̣ бха̄сита̄ хоти. ведитаббаметам̣, бхиккхаве, асаппурисо айам̣ бхаванти. имехи кхо, бхиккхаве, чатӯхи дхаммехи саманна̄гато асаппурисо ведитаббо.

‘‘чатӯхи, бхиккхаве, дхаммехи саманна̄гато саппурисо ведитаббо. катамехи чатӯхи? идха, бхиккхаве, саппурисо йо хоти парасса аван̣н̣о там̣ пут̣т̣хопи на па̄ту кароти, ко пана ва̄до апут̣т̣хасса! пут̣т̣хо кхо пана пан̃ха̄бхинӣто ха̄петва̄ ламбитва̄ апарипӯрам̣ авиттха̄рена парасса аван̣н̣ам̣ бха̄сита̄ хоти. ведитаббаметам̣, бхиккхаве, саппурисо айам̣ бхаванти.

‘‘пуна чапарам̣, бхиккхаве, саппурисо йо хоти парасса ван̣н̣о там̣ апут̣т̣хопи па̄ту кароти, ко пана ва̄до пут̣т̣хасса! пут̣т̣хо кхо пана пан̃ха̄бхинӣто аха̄петва̄ аламбитва̄ парипӯрам̣ виттха̄рена парасса ван̣н̣ам̣ бха̄сита̄ хоти. ведитаббаметам̣, бхиккхаве, саппурисо айам̣ бхаванти.

‘‘пуна чапарам̣, бхиккхаве, саппурисо йо хоти аттано аван̣н̣о там̣ апут̣т̣хопи па̄ту кароти, ко пана ва̄до пут̣т̣хасса! пут̣т̣хо кхо пана пан̃ха̄бхинӣто аха̄петва̄ аламбитва̄ парипӯрам̣ виттха̄рена аттано аван̣н̣ам̣ бха̄сита̄ хоти. ведитаббаметам̣, бхиккхаве, саппурисо айам̣ бхаванти.

‘‘пуна чапарам̣, бхиккхаве, саппурисо йо хоти аттано ван̣н̣о там̣ пут̣т̣хопи на па̄ту кароти, ко пана ва̄до апут̣т̣хасса! пут̣т̣хо кхо пана пан̃ха̄бхинӣто ха̄петва̄ ламбитва̄ апарипӯрам̣ авиттха̄рена аттано ван̣н̣ам̣ бха̄сита̄ хоти. ведитаббаметам̣, бхиккхаве, саппурисо айам̣ бхаванти. имехи кхо, бхиккхаве, чатӯхи дхаммехи саманна̄гато саппурисо ведитаббо.

‘‘сеййатха̄пи, бхиккхаве, вадхука̄ йан̃н̃адева раттим̣ ва̄ дивам̣ ва̄ а̄нӣта̄ хоти, та̄вадевасса̄ тиббам̣ хироттаппам̣ паччупат̣т̣хитам̣ хоти сассуйа̄пи сасурепи са̄микепи антамасо да̄сакаммакарапорисесу. са̄ апарена самайена сам̣ва̄саманва̄йа висса̄саманва̄йа сассумпи сасурампи са̄микампи евама̄ха – ‘апетха, ким̣ пана тумхе джа̄на̄тха̄’ти! евамевам̣ кхо, бхиккхаве, идхекаччо бхиккху йан̃н̃адева раттим̣ ва̄ дивам̣ ва̄ ага̄расма̄ анага̄рийам̣ паббаджито хоти, та̄вадевасса тиббам̣ хироттаппам̣ паччупат̣т̣хитам̣ хоти бхиккхӯсу бхиккхунӣсу упа̄сакесу упа̄сика̄су антамасо а̄ра̄микасаман̣уддесесу. со апарена самайена сам̣ва̄саманва̄йа висса̄саманва̄йа а̄чарийампи упаджджха̄йампи евама̄ха – ‘апетха, ким̣ пана тумхе джа̄на̄тха̄’ти! тасма̄тиха, бхиккхаве, евам̣ сиккхитаббам̣ – ‘адхуна̄гатавадхука̄самена четаса̄ вихарисса̄ма̄’ти. еван̃хи во, бхиккхаве, сиккхитабба’’нти. татийам̣.