5. пат̣хамасамаджӣвӣсуттам̣

55. евам̣ ме сутам̣ – екам̣ самайам̣ бхагава̄ бхаггесу вихарати сусума̄рагире [сум̣сума̄рагире (сӣ. сйа̄. кам̣. пӣ.)] бхесакал̣а̄ване [бхесакала̄ване (сӣ. пӣ. ка.)] мигада̄йе. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена накулапитуно гахапатисса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо накулапита̄ ча гахапати накулама̄та̄ ча гахапата̄нӣ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинно кхо накулапита̄ гахапати бхагавантам̣ етадавоча –

‘‘йато ме, бханте, накулама̄та̄ гахапата̄нӣ дахарассева дахара̄ а̄нӣта̄, на̄бхиджа̄на̄ми накулама̄тарам̣ гахапата̄ним̣ манаса̄пи атичарита̄, куто пана ка̄йена! иччхеййа̄ма майам̣, бханте, дит̣т̣хе чева дхамме ан̃н̃аман̃н̃ам̣ пасситум̣ абхисампара̄йан̃ча ан̃н̃аман̃н̃ам̣ пасситу’’нти. накулама̄та̄пи кхо гахапата̄нӣ бхагавантам̣ етадавоча – ‘‘йатохам̣, бханте, накулапитуно гахапатисса дахарассева дахара̄ а̄нӣта̄, на̄бхиджа̄на̄ми накулапитарам̣ гахапатим̣ манаса̄пи атичарита̄, куто пана ка̄йена! иччхеййа̄ма майам̣, бханте, дит̣т̣хе чева дхамме ан̃н̃аман̃н̃ам̣ пасситум̣ абхисампара̄йан̃ча ан̃н̃аман̃н̃ам̣ пасситу’’нти.

‘‘а̄кан̇кхеййум̣ че, гахапатайо, убхо джа̄нипатайо дит̣т̣хе чева дхамме ан̃н̃аман̃н̃ам̣ пасситум̣ абхисампара̄йан̃ча ан̃н̃аман̃н̃ам̣ пасситум̣ убхова [убхо ча (сӣ. пӣ.)] ассу самасаддха̄ самасӣла̄ самача̄га̄ самапан̃н̃а̄, те дит̣т̣хе чева дхамме ан̃н̃аман̃н̃ам̣ пассанти абхисампара̄йан̃ча ан̃н̃аман̃н̃ам̣ пассантӣ’’ти [пассиссантӣти (ка.)].

‘‘убхо саддха̄ вадан̃н̃ӯ ча, сан̃н̃ата̄ дхаммаджӣвино;

те хонти джа̄нипатайо, ан̃н̃аман̃н̃ам̣ пийам̣вада̄.

‘‘аттха̄сам̣ пачура̄ хонти, пха̄сукам̣ упаджа̄йати;

амитта̄ думмана̄ хонти, убхиннам̣ самасӣлинам̣.

‘‘идха дхаммам̣ чаритва̄на, самасӣлаббата̄ убхо;

нандино девалокасмим̣, моданти ка̄мака̄мино’’ти. пан̃чамам̣;