10. гихиса̄мӣчисуттам̣

60. атха кхо ана̄тхапин̣д̣ико гахапати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ана̄тхапин̣д̣икам̣ гахапатим̣ бхагава̄ етадавоча –

‘‘чатӯхи кхо, гахапати, дхаммехи саманна̄гато арийаса̄вако гихиса̄мӣчипат̣ипадам̣ пат̣ипанно хоти йасопат̣ила̄бхиним̣ саггасам̣ваттаникам̣. катамехи чатӯхи? идха, гахапати, арийаса̄вако бхиккхусан̇гхам̣ паччупат̣т̣хито хоти чӣварена, бхиккхусан̇гхам̣ паччупат̣т̣хито хоти пин̣д̣апа̄тена, бхиккхусан̇гхам̣ паччупат̣т̣хито хоти сена̄санена, бхиккхусан̇гхам̣ паччупат̣т̣хито хоти гила̄наппаччайабхесаджджапариккха̄рена. имехи кхо, гахапати, чатӯхи дхаммехи саманна̄гато арийаса̄вако гихиса̄мӣчипат̣ипадам̣ пат̣ипанно хоти йасопат̣ила̄бхиним̣ саггасам̣ваттаника’’нти.

‘‘гихиса̄мӣчипат̣ипадам̣, пат̣ипаджджанти пан̣д̣ита̄;

саммаггате сӣлаванте, чӣварена упат̣т̣хита̄.

пин̣д̣апа̄тасайанена, гила̄наппаччайена ча;

тесам̣ дива̄ ча ратто ча, сада̄ пун̃н̃ам̣ павад̣д̣хати;

сагган̃ча каматит̣т̣ха̄нам̣ [сагган̃ча саппатит̣т̣ха̄нам̣ (ка.)], каммам̣ катва̄на бхаддака’’нти. дасамам̣;

пун̃н̃а̄бхисандавагго пат̣хамо.