6. дутийарохитассасуттам̣

46. атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ рохитассо девапутто абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хито кхо, бхиккхаве, рохитассо девапутто мам̣ етадавоча – ‘йаттха ну кхо, бханте [сам̣. ни. 1.107], на джа̄йати на джӣйати на мӣйати на чавати на упападжджати, сакка̄ ну кхо со, бханте, гаманена локасса анто н̃а̄тум̣ ва̄ дат̣т̣хум̣ ва̄ па̄пун̣итум̣ ва̄’ти? евам̣ вутте ахам̣, бхиккхаве, рохитассам̣ девапуттам̣ етадавочам̣ – ‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’ти. евам̣ вутте, бхиккхаве, рохитассо девапутто мам̣ етадавоча – ‘аччхарийам̣, бханте, аббхутам̣, бханте! йа̄ва субха̄ситамидам̣, бханте, бхагавата̄ – йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄ми’’’.

‘‘бхӯтапубба̄хам̣, бханте, рохитассо на̄ма иси ахосим̣ бходжапутто иддхима̄ веха̄сан̇гамо. тасса майхам̣, бханте, еварӯпо джаво ахоси, сеййатха̄пи на̄ма дал̣хадхамма̄ дхануггахо сиккхито катахаттхо катӯпа̄сано лахукена асанена аппакасирена тирийам̣ та̄лаччха̄йам̣ атипа̄теййа. тасса майхам̣, бханте, еварӯпо падавӣтиха̄ро ахоси, сеййатха̄пи на̄ма пураттхима̄ самудда̄ паччхимо самуддо. тасса майхам̣, бханте, еварӯпена джавена саманна̄гатасса еварӯпена ча падавӣтиха̄рена еварӯпам̣ иччха̄гатам̣ уппаджджи – ахам̣ гаманена локасса антам̣ па̄пун̣исса̄мӣ’’ти. со кхо ахам̣, бханте, ан̃н̃атрева аситапӣтакха̄йитаса̄йита̄ ан̃н̃атра учча̄рапасса̄вакамма̄ ан̃н̃атра нидда̄киламатхапат̣ивинодана̄ вассасата̄йуко вассасатаджӣвӣ вассасатам̣ гантва̄ аппатва̄ва локасса антам̣ антара̄йева ка̄лан̇като.

‘‘аччхарийам̣, бханте, аббхутам̣, бханте! йа̄ва субха̄ситамидам̣, бханте, бхагавата̄ – ‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣ там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’’’ти. евам̣ вутте ахам̣, бхиккхаве, рохитассам̣ девапуттам̣ етадавочам̣ –

‘‘‘йаттха кхо, а̄вусо, на джа̄йати на джӣйати на мӣйати на чавати на упападжджати, на̄хам̣, там̣ гаманена локасса антам̣ н̃а̄теййам̣ дат̣т̣хеййам̣ паттеййанти вада̄мӣ’ти. на ча̄хам̣, а̄вусо, аппатва̄ва локасса антам̣ дуккхассантакирийам̣ вада̄ми. апи ча̄хам̣, а̄вусо, имасмим̣йева бйа̄маматте кал̣еваре сасан̃н̃имхи саманаке локан̃ча пан̃н̃а̄пеми локасамудайан̃ча локаниродхан̃ча локаниродхага̄минин̃ча пат̣ипада’’нти.

‘‘гаманена на паттаббо, локассанто куда̄чанам̣;

на ча аппатва̄ локантам̣, дуккха̄ аттхи памочанам̣.

‘‘тасма̄ хаве локавидӯ сумедхо,

локантагӯ вуситабрахмачарийо;

локасса антам̣ самита̄ви н̃атва̄,

на̄сӣсатӣ локамимам̣ паран̃ча̄’’ти. чхат̣т̣хам̣;