6. дон̣асуттам̣

36. екам̣ самайам̣ бхагава̄ антара̄ ча уккат̣т̣хам̣ антара̄ ча сетабйам̣ аддха̄намаггаппат̣ипанно хоти. дон̣опи судам̣ бра̄хман̣о антара̄ ча уккат̣т̣хам̣ антара̄ ча сетабйам̣ аддха̄намаггаппат̣ипанно хоти. аддаса̄ кхо дон̣о бра̄хман̣о бхагавато па̄десу чакка̄ни сахасса̄ра̄ни санемика̄ни сана̄бхика̄ни сабба̄ка̄рапарипӯра̄ни; дисва̄насса етадахоси – ‘‘аччхарийам̣ вата, бхо, аббхутам̣ вата, бхо! на ватима̄ни мануссабхӯтасса пада̄ни бхависсантӣ’’ти!! атха кхо бхагава̄ магга̄ оккамма ан̃н̃атарасмим̣ руккхамӯле нисӣди паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. атха кхо дон̣о бра̄хман̣о бхагавато пада̄ни анугаччханто аддаса бхагавантам̣ ан̃н̃атарасмим̣ руккхамӯле нисиннам̣ па̄са̄дикам̣ паса̄данӣйам̣ сантиндрийам̣ сантама̄насам̣ уттамадаматхасаматхамануппаттам̣ дантам̣ гуттам̣ сам̣йатиндрийам̣ [йатиндрийам̣ (маха̄ва. 257)] на̄гам̣. дисва̄на йена бхагава̄ тенупасан̇ками; упасан̇камитва̄ бхагавантам̣ етадавоча –

‘‘дево но бхавам̣ бхависсатӣ’’ти? ‘‘на кхо ахам̣, бра̄хман̣а, дево бхависса̄мӣ’’ти. ‘‘гандхаббо но бхавам̣ бхависсатӣ’’ти? ‘‘на кхо ахам̣, бра̄хман̣а, гандхаббо бхависса̄мӣ’’ти. ‘‘йаккхо но бхавам̣ бхависсатӣ’’ти? ‘‘на кхо ахам̣, бра̄хман̣а, йаккхо бхависса̄мӣ’’ти. ‘‘мануссо но бхавам̣ бхависсатӣ’’ти? ‘‘на кхо ахам̣, бра̄хман̣а, мануссо бхависса̄мӣ’’ти.

‘‘‘дево но бхавам̣ бхависсатӣ’ти, ити пут̣т̣хо сама̄но – ‘на кхо ахам̣, бра̄хман̣а, дево бхависса̄мӣ’ти вадеси. ‘гандхаббо но бхавам̣ бхависсатӣ’ти, ити пут̣т̣хо сама̄но – ‘на кхо ахам̣, бра̄хман̣а, гандхаббо бхависса̄мӣ’ти вадеси. ‘йаккхо но бхавам̣ бхависсатӣ’ти, ити пут̣т̣хо сама̄но – ‘на кхо ахам̣, бра̄хман̣а, йаккхо бхависса̄мӣ’ти вадеси. ‘мануссо но бхавам̣ бхависсатӣ’ти, ити пут̣т̣хо сама̄но – ‘на кхо ахам̣, бра̄хман̣а, мануссо бхависса̄мӣ’ти вадеси. атха ко чарахи бхавам̣ бхависсатӣ’’ти?

‘‘йесам̣ кхо ахам̣, бра̄хман̣а, а̄сава̄нам̣ аппахӣнатта̄ дево бхавеййам̣, те ме а̄сава̄ пахӣна̄ уччхиннамӯла̄ та̄ла̄ваттхуката̄ анабха̄вам̣ката̄ а̄йатим̣ ануппа̄дадхамма̄. йесам̣ кхо ахам̣, бра̄хман̣а, а̄сава̄нам̣ аппахӣнатта̄ гандхаббо бхавеййам̣… йаккхо бхавеййам̣… мануссо бхавеййам̣, те ме а̄сава̄ пахӣна̄ уччхиннамӯла̄ та̄ла̄ваттхуката̄ анабха̄вам̣ката̄ а̄йатим̣ ануппа̄дадхамма̄. сеййатха̄пи, бра̄хман̣а, уппалам̣ ва̄ падумам̣ ва̄ пун̣д̣арӣкам̣ ва̄ удаке джа̄там̣ удаке сам̣вад̣д̣хам̣ удака̄ аччуггамма тит̣т̣хати анупалиттам̣ удакена; евамевам̣ кхо ахам̣, бра̄хман̣а, локе джа̄то локе сам̣вад̣д̣хо локам̣ абхибхуййа вихара̄ми анупалитто локена. буддхоти мам̣, бра̄хман̣а, дха̄рехӣ’’ти.

‘‘йена девӯпапатйасса, гандхаббо ва̄ вихан̇гамо;

йаккхаттам̣ йена гаччхеййам̣, мануссаттан̃ча аббадже;

те майхам̣, а̄сава̄ кхӣн̣а̄, виддхаста̄ винал̣ӣката̄.

‘‘пун̣д̣арӣкам̣ йатха̄ ваггу, тойена нупалиппати [нупалимпати (ка.)];

нупалиппа̄ми [нупалимпа̄ми (ка.)] локена, тасма̄ буддхосми бра̄хман̣а̄’’ти. чхат̣т̣хам̣;