6. сокхуммасуттам̣

16. ‘‘чатта̄рима̄ни, бхиккхаве, сокхумма̄ни. катама̄ни чатта̄ри? идха, бхиккхаве, бхиккху рӯпасокхуммена саманна̄гато хоти парамена; тена ча рӯпасокхуммена ан̃н̃ам̣ рӯпасокхуммам̣ уттаритарам̣ ва̄ пан̣ӣтатарам̣ ва̄ на саманупассати; тена ча рӯпасокхуммена ан̃н̃ам̣ рӯпасокхуммам̣ уттаритарам̣ ва̄ пан̣ӣтатарам̣ ва̄ на паттхети. ведана̄сокхуммена саманна̄гато хоти парамена; тена ча ведана̄сокхуммена ан̃н̃ам̣ ведана̄сокхуммам̣ уттаритарам̣ ва̄ пан̣ӣтатарам̣ ва̄ на саманупассати; тена ча ведана̄сокхуммена ан̃н̃ам̣ ведана̄сокхуммам̣ уттаритарам̣ ва̄ пан̣ӣтатарам̣ ва̄ на паттхети. сан̃н̃а̄сокхуммена саманна̄гато хоти парамена; тена ча сан̃н̃а̄сокхуммена ан̃н̃ам̣ сан̃н̃а̄сокхуммам̣ уттаритарам̣ ва̄ пан̣ӣтатарам̣ ва̄ на саманупассати; тена ча сан̃н̃а̄сокхуммена ан̃н̃ам̣ сан̃н̃а̄сокхуммам̣ уттаритарам̣ ва̄ пан̣ӣтатарам̣ ва̄ на паттхети. сан̇кха̄расокхуммена саманна̄гато хоти парамена; тена ча сан̇кха̄расокхуммена ан̃н̃ам̣ сан̇кха̄расокхуммам̣ уттаритарам̣ ва̄ пан̣ӣтатарам̣ ва̄ на саманупассати; тена ча сан̇кха̄расокхуммена ан̃н̃ам̣ сан̇кха̄расокхуммам̣ уттаритарам̣ ва̄ пан̣ӣтатарам̣ ва̄ на паттхети. има̄ни кхо, бхиккхаве, чатта̄ри сокхумма̄нӣ’’ти.

‘‘рӯпасокхумматам̣ н̃атва̄, ведана̄нан̃ча самбхавам̣;

сан̃н̃а̄ йато самудети, аттхам̣ гаччхати йаттха ча;

сан̇кха̄ре парато н̃атва̄, дуккхато но ча аттато.

‘‘са ве саммаддасо бхиккху, санто сантипаде рато;

дха̄рети антимам̣ дехам̣, джетва̄ ма̄рам̣ сава̄хини’’нти. чхат̣т̣хам̣;