4. сам̣варасуттам̣

14. ‘‘чатта̄рима̄ни, бхиккхаве, падха̄на̄ни. катама̄ни чатта̄ри? сам̣вараппадха̄нам̣, паха̄наппадха̄нам̣, бха̄вана̄ппадха̄нам̣, анураккхан̣а̄ппадха̄нам̣. катаман̃ча, бхиккхаве, сам̣вараппадха̄нам̣? идха, бхиккхаве, бхиккху чаккхуна̄ рӯпам̣ дисва̄ на нимиттагга̄хӣ хоти на̄нубйан̃джанагга̄хӣ. йатва̄дхикаран̣аменам̣ чаккхундрийам̣ асам̣вутам̣ вихарантам̣ абхиджджха̄доманасса̄ па̄пака̄ акусала̄ дхамма̄ анва̄ссавеййум̣, тасса сам̣вара̄йа пат̣ипаджджати, раккхати чаккхундрийам̣, чаккхундрийе сам̣варам̣ а̄паджджати. сотена саддам̣ сутва̄… гха̄нена гандхам̣ гха̄йитва̄… дживха̄йа расам̣ са̄йитва̄… ка̄йена пхот̣т̣хаббам̣ пхуситва̄… манаса̄ дхаммам̣ вин̃н̃а̄йа на нимиттагга̄хӣ хоти на̄нубйан̃джанагга̄хӣ, йатва̄дхикаран̣аменам̣ маниндрийам̣ асам̣вутам̣ вихарантам̣ абхиджджха̄доманасса̄ па̄пака̄ акусала̄ дхамма̄ анва̄ссавеййум̣, тасса сам̣вара̄йа пат̣ипаджджати, раккхати маниндрийам̣, маниндрийе сам̣варам̣ а̄паджджати. идам̣ вуччати, бхиккхаве, сам̣вараппадха̄нам̣.

‘‘катаман̃ча, бхиккхаве, паха̄наппадха̄нам̣? идха, бхиккхаве, бхиккху уппаннам̣ ка̄мавитаккам̣ на̄дхива̄сети паджахати винодети бйантӣкароти анабха̄вам̣ гамети; уппаннам̣ бйа̄па̄давитаккам̣…пе… уппаннам̣ вихим̣са̄витаккам̣…пе… уппаннуппанне па̄паке акусале дхамме на̄дхива̄сети паджахати винодети бйантӣкароти анабха̄вам̣ гамети. идам̣ вуччати, бхиккхаве, паха̄наппадха̄нам̣.

‘‘катаман̃ча, бхиккхаве, бха̄вана̄ппадха̄нам̣? идха, бхиккхаве, бхиккху сатисамбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣, дхаммавичайасамбоджджхан̇гам̣ бха̄вети… вӣрийасамбоджджхан̇гам̣ бха̄вети… пӣтисамбоджджхан̇гам̣ бха̄вети… пассаддхисамбоджджхан̇гам̣ бха̄вети… сама̄дхисамбоджджхан̇гам̣ бха̄вети… упеккха̄самбоджджхан̇гам̣ бха̄вети вивеканисситам̣ вира̄ганисситам̣ ниродханисситам̣ воссаггапарин̣а̄мим̣. идам̣ вуччати, бхиккхаве, бха̄вана̄ппадха̄нам̣.

‘‘катаман̃ча, бхиккхаве, анураккхан̣а̄ппадха̄нам̣? идха, бхиккхаве, бхиккху уппаннам̣ бхаддакам̣ сама̄дхинимиттам̣ анураккхати ат̣т̣хикасан̃н̃ам̣ пул̣авакасан̃н̃ам̣ винӣлакасан̃н̃ам̣ виччхиддакасан̃н̃ам̣ уддхума̄такасан̃н̃ам̣. идам̣ вуччати, бхиккхаве, анураккхан̣а̄ппадха̄нам̣. има̄ни кхо, бхиккхаве, чатта̄ри падха̄на̄нӣ’’ти.

‘‘сам̣варо ча паха̄нан̃ча, бха̄вана̄ анураккхан̣а̄;

ете падха̄на̄ чатта̄ро, десита̄диччабандхуна̄;

йехи бхиккху идха̄та̄пӣ, кхайам̣ дуккхасса па̄пун̣е’’ти. чатуттхам̣;