1. чарасуттам̣

11. [итиву. 110] ‘‘чарато чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху адхива̄сети, наппаджахати на винодети на бйантӣкароти [бйантикароти (пӣ.), бйантим̣ кароти (ка.)] на анабха̄вам̣ гамети, чарампи, бхиккхаве, бхиккху евам̣бхӯто ‘ана̄та̄пӣ анотта̄пӣ сататам̣ самитам̣ кусӣто хӣнавӣрийо’ти вуччати.

‘‘т̣хитасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху адхива̄сети, наппаджахати на винодети на бйантӣкароти на анабха̄вам̣ гамети, т̣хитопи, бхиккхаве, бхиккху евам̣бхӯто ‘ана̄та̄пӣ анотта̄пӣ сататам̣ самитам̣ кусӣто хӣнавӣрийо’ти вуччати.

‘‘нисиннасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху адхива̄сети, наппаджахати на винодети на бйантӣкароти на анабха̄вам̣ гамети, нисиннопи, бхиккхаве, бхиккху евам̣бхӯто ‘ана̄та̄пӣ анотта̄пӣ сататам̣ самитам̣ кусӣто хӣнавӣрийо’ти вуччати.

‘‘сайа̄насса чепи, бхиккхаве, бхиккхуно джа̄гарасса уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху адхива̄сети, наппаджахати на винодети на бйантӣкароти на анабха̄вам̣ гамети, сайа̄нопи, бхиккхаве, бхиккху джа̄гаро евам̣бхӯто ‘ана̄та̄пӣ анотта̄пӣ сататам̣ самитам̣ кусӣто хӣнавӣрийо’ти вуччати.

‘‘чарато чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху на̄дхива̄сети, паджахати винодети бйантӣкароти анабха̄вам̣ гамети, чарампи, бхиккхаве, бхиккху евам̣бхӯто ‘а̄та̄пӣ отта̄пӣ сататам̣ самитам̣ а̄раддхавӣрийо пахитатто’ти вуччати.

‘‘т̣хитасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху на̄дхива̄сети, паджахати винодети бйантӣкароти анабха̄вам̣ гамети, т̣хитопи, бхиккхаве, бхиккху евам̣бхӯто ‘а̄та̄пӣ отта̄пӣ сататам̣ самитам̣ а̄раддхавӣрийо пахитатто’ти вуччати.

‘‘нисиннасса чепи, бхиккхаве, бхиккхуно уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху на̄дхива̄сети, паджахати винодети бйантӣкароти анабха̄вам̣ гамети, нисиннопи, бхиккхаве, бхиккху евам̣бхӯто ‘а̄та̄пӣ отта̄пӣ сататам̣ самитам̣ а̄раддхавӣрийо пахитатто’ти вуччати.

‘‘сайа̄насса чепи, бхиккхаве, бхиккхуно джа̄гарасса уппаджджати ка̄мавитакко ва̄ бйа̄па̄давитакко ва̄ вихим̣са̄витакко ва̄. там̣ че бхиккху на̄дхива̄сети, паджахати винодети бйантӣкароти анабха̄вам̣ гамети, сайа̄нопи, бхиккхаве, бхиккху джа̄гаро евам̣бхӯто ‘а̄та̄пӣ отта̄пӣ сататам̣ самитам̣ а̄раддхавӣрийо пахитатто’ти вуччатӣ’’ти.

‘‘чарам̣ ва̄ йади ва̄ тит̣т̣хам̣, нисинно уда ва̄ сайам̣;

йо витаккам̣ витаккети, па̄пакам̣ геханисситам̣.

‘‘куммаггаппат̣ипанно со, моханеййесу муччхито;

абхаббо та̄дисо бхиккху, пхут̣т̣хум̣ самбодхимуттамам̣.

‘‘йо ча чарам̣ ва̄ тит̣т̣хам̣ ва̄, нисинно уда ва̄ сайам̣;

витаккам̣ самайитва̄на, витаккӯпасаме рато;

бхаббо со та̄дисо бхиккху, пхут̣т̣хум̣ самбодхимуттама’’нти. пат̣хамам̣;