10. асса̄джа̄нӣйасуттам̣

143. ‘‘тайо ча, бхиккхаве, бхадре асса̄джа̄нӣйе десесса̄ми тайо ча бхадре пуриса̄джа̄нӣйе. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘катаме ча, бхиккхаве, тайо бхадра̄ асса̄джа̄нӣйа̄? идха, бхиккхаве, екаччо бхадро асса̄джа̄нӣйо …пе… джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо бхадра̄ асса̄джа̄нӣйа̄.

‘‘катаме ча бхиккхаве, тайо бхадра̄ пуриса̄джа̄нӣйа̄? идха, бхиккхаве, екаччо бхадро пуриса̄джа̄нӣйо…пе… джавасампанно ча хоти ван̣н̣асампанно ча а̄рохапарин̣а̄хасампанно ча.

‘‘катхан̃ча, бхиккхаве, бхадро пуриса̄джа̄нӣйо…пе… джавасампанно ча хоти ван̣н̣асампанно ча а̄рохапарин̣а̄хасампанно ча? идха, бхиккхаве, бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати. идамасса джавасмим̣ вада̄ми. абхидхамме кхо пана абхивинайе пан̃хам̣ пут̣т̣хо виссаджджети, но сам̣са̄дети. идамасса ван̣н̣асмим̣ вада̄ми. ла̄бхӣ кхо пана хоти чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣. идамасса а̄рохапарин̣а̄хасмим̣ вада̄ми. евам̣ кхо, бхиккхаве, бхадро пуриса̄джа̄нӣйо джавасампанно ча хоти ван̣н̣асампанно ча а̄рохапарин̣а̄хасампанно ча. име кхо, бхиккхаве, тайо бхадра̄ пуриса̄джа̄нӣйа̄’’ти. дасамам̣.